ਰੂਸ ਵਿੱਚ ਮੈਕ ਡੀ ਅਤੇ ਸਟਾਰਬਕਸ ਨੇ ਕੈਫੇ ਨੂੰ ਕੀਤਾ ਬੰਦ, ਕੋਕਾ ਕੋਲਾ ਨੇ ਵੀ ਰੋਕਿਆ ਆਪਣਾ ਕੰਮ

ਮਾਸਕੋ- ਯੂਕਰੇਨ ‘ਚ ਲਗਾਤਾਰ ਹੋ ਰਹੇ ਹਮਲਿਆਂ ਦੇ ਮੱਦੇਨਜ਼ਰ ਰੂਸ ‘ਤੇ ਪੱਛਮੀ ਦੇਸ਼ਾਂ ਦੀਆਂ ਪਾਬੰਦੀਆਂ ਦਾ ਸਿਲਸਿਲਾ ਜਾਰੀ ਹੈ, ਹੁਣ ਇਸ ‘ਚ ਮੈਕ ਡੋਨਾਲਡ, ਕੋਕਾ ਕੋਲਾ, ਪੈਪਸੀ ਅਤੇ ਸਟਾਰਬਕਸ ਦਾ ਨਾਂ ਵੀ ਜੁੜ ਗਿਆ ਹੈ। ਦਰਅਸਲ, ਮੈਕ ਡੀ ਅਤੇ ਸਟਾਰਬਕਸ ਨੇ ਰੂਸ ਵਿੱਚ ਆਪਣੇ ਸਾਰੇ ਕੈਫੇ ਬੰਦ ਕਰਨ ਦਾ ਐਲਾਨ ਕੀਤਾ ਹੈ।

ਕੋਕਾ-ਕੋਲਾ ਨੇ ਮੰਗਲਵਾਰ ਨੂੰ ਕਿਹਾ ਕਿ ਉਹ ਰੂਸ ‘ਚ ਆਪਣੇ ਉਤਪਾਦਾਂ ਦੀ ਵਿਕਰੀ ‘ਤੇ ਪਾਬੰਦੀ ਲਗਾ ਰਹੀ ਹੈ। ਕੋਕਾ-ਕੋਲਾ ਨੇ ਕਿਹਾ ਕਿ ਰੂਸ ਅਤੇ ਯੂਕਰੇਨ ਵਿੱਚ ਕੰਪਨੀ ਦੇ ਕਾਰੋਬਾਰ ਨੇ 2021 ਵਿੱਚ ਕੰਪਨੀ ਦੇ ਮਾਲੀਏ ਵਿੱਚ 1 ਤੋਂ 2 ਪ੍ਰਤੀਸ਼ਤ ਤੱਕ ਦਾ ਯੋਗਦਾਨ ਪਾਇਆ। ਇਸ ਤੋਂ ਪਹਿਲਾਂ, ਮੈਕਡੋਨਲਡ ਨੇ ਰੂਸ ਵਿੱਚ ਆਪਣੇ ਸਾਰੇ 847 ਰੈਸਟੋਰੈਂਟਾਂ ਨੂੰ ਅਸਥਾਈ ਤੌਰ ‘ਤੇ ਬੰਦ ਕਰਨ ਦਾ ਫੈਸਲਾ ਕੀਤਾ ਸੀ।

ਸਾਰੀਆਂ ਚਾਰ ਕੰਪਨੀਆਂ ਰੂਸ ਵਿੱਚ ਵੱਡੇ ਪੱਧਰ ‘ਤੇ ਕੰਮ ਕਰਦੀਆਂ ਹਨ। ਮੈਕਡੋਨਲਡਜ਼ ਨੇ ਕਿਹਾ ਕਿ ਉਹ ਆਪਣੇ 62,000 ਕਰਮਚਾਰੀਆਂ ਨੂੰ ਤਨਖਾਹ ਦੇ ਰਿਹਾ ਹੈ। ਰੂਸ ਵਿੱਚ 847 ਰੈਸਟੋਰੈਂਟਾਂ ਵਾਲੇ ਮੈਕਡੋਨਲਡਜ਼ ਦਾ ਪਹਿਲਾ ਸਟੋਰ 1990 ਵਿੱਚ ਪੁਸ਼ਕਿਨ ਸਕੁਆਇਰ, ਮਾਸਕੋ ਵਿੱਚ ਖੋਲ੍ਹਿਆ ਗਿਆ ਸੀ।

ਇਸ ਦੇ ਨਾਲ ਹੀ ਸਟਾਰਬਕਸ ਆਪਣੇ 100 ਕੈਫੇ ਬੰਦ ਕਰਨ ਜਾ ਰਿਹਾ ਹੈ। ਉੱਥੇ ਹੀ ਪੈਪਸੀ ਰੂਸ ਵਿੱਚ ਆਪਣੇ ਪੀਣ ਵਾਲੇ ਬ੍ਰਾਂਡਾਂ ਦੇ ਸਾਰੇ ਵਿਗਿਆਪਨ ਅਤੇ ਵਿਕਰੀ ਨੂੰ ਰੋਕ ਰਹੀ ਹੈ। ਹਾਲਾਂਕਿ, ਇਸ ਨੇ ਦੁੱਧ ਅਤੇ ਬੇਬੀ ਫੂਡ ਵਰਗੀਆਂ ਜ਼ਰੂਰੀ ਚੀਜ਼ਾਂ ਦੀ ਵਿਕਰੀ ਜਾਰੀ ਰੱਖਣ ਦਾ ਫੈਸਲਾ ਕੀਤਾ ਹੈ। 1980 ਦੀਆਂ ਓਲੰਪਿਕ ਖੇਡਾਂ ਤੋਂ ਕੋਕਾ-ਕੋਲਾ ਨੂੰ ਅਧਿਕਾਰਤ ਤੌਰ ’ਤੇ ਡਰਿੰਕ ਦੀ ਮਾਨਤਾ ਮਿਲੀ।

ਦੱਸ ਦੇਈਏ ਸੈਂਕੜੇ ਕੰਪਨੀਆਂ ਪਹਿਲਾਂ ਹੀ ਰੂਸ ਵਿੱਚ ਆਪਣੇ ਕੰਮਕਾਜ ਨੂੰ ਅਸਥਾਈ ਤੌਰ ‘ਤੇ ਰੋਕ ਚੁੱਕੀਆਂ ਹਨ। ਇਸ ਸਿਲਸਿਲੇ ‘ਚ ਐਮਾਜ਼ਾਨ (Amazon.com Inc) ਨੇ ਵੀ ਮੰਗਲਵਾਰ ਨੂੰ ਕਿਹਾ ਕਿ ਉਸ ਨੇ ਆਪਣੀ ਕਲਾਊਡ ਸੇਵਾ ਲਈ ਨਵੇਂ ਗਾਹਕਾਂ ਨੂੰ ਲੈਣਾ ਬੰਦ ਕਰ ਦਿੱਤਾ ਹੈ। ਯੂਨੀਵਰਸਲ ਮਿਊਜ਼ਿਕ ਨੇ ਰੂਸ ਵਿੱਚ ਕੰਮਕਾਜ ਨੂੰ ਵੀ ਰੋਕ ਦਿੱਤਾ, ਜਦੋਂ ਕਿ ਔਨਲਾਈਨ ਡੇਟਿੰਗ ਸੇਵਾ ਬੰਬਲ ਇੰਕ ਨੇ ਰੂਸ ਅਤੇ ਬੇਲਾਰੂਸ ਵਿੱਚ ਆਪਣੇ ਸਟੋਰਾਂ ਤੋਂ ਐਪਸ ਨੂੰ ਹਟਾ ਦਿੱਤਾ। ਇਸ ਤੋਂ ਪਹਿਲਾਂ ਰਾਇਲ ਡੱਚ ਸ਼ੈੱਲ ਨੇ ਰੂਸ ਤੋਂ ਤੇਲ ਖਰੀਦਣ ‘ਤੇ ਪਾਬੰਦੀ ਲਗਾ ਦਿੱਤੀ ਸੀ।

Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.