ਬੀਜਿੰਗ: ਵਾਂਗ ਯਾਪਿੰਗ ਨੇ ਸੋਮਵਾਰ ਨੂੁੰ ਸਪੇਸ ਵਾਕ ਕਰਨ ਵਾਲੀ ਚੀਨ ਦੀ ਪਹਿਲੀ ਮਹਿਲਾ ਪੁਲਾੜ ਯਾਤਰੀ ਬਣ ਕੇ ਇਤਿਹਾਸ ਰਚਿਆ ਹੈ। ਚਾਈਨਾ ਮੈਨਡ ਸਪੇਸ ਏਜੰਸੀ (ਸੀਐਮਐਸਏ) ਦੇ ਅਨੁਸਾਰ, ਵੈਂਗ ਅਤੇ ਸਾਥੀ ਪੁਲਾੜ ਯਾਤਰੀ ਝਾਈ ਝੀਗਾਂਗ, ਚੀਨ ਦੇ ਨਵੇਂ ਤਿਆਨਗੋਂਗ ਪੁਲਾੜ ਸਟੇਸ਼ਨ ‘ਤੇ ਮੌਜੂਦ ਤਿੰਨ ਮੈਂਬਰੀ ਟੀਮ ਵਿੱਚੋਂ ਦੋ ਨੇ ਸੋਮਵਾਰ ਸਵੇਰੇ 6.5 ਘੰਟੇ ਦੀ ਸਪੇਸਵਾਕ ਨੂੰ ਸਫਲਤਾਪੂਰਵਕ ਪੂਰਾ ਕੀਤਾ। ਚੀਨ ਦੀ ਸਰਕਾਰੀ ਨਿਊਜ਼ ਏਜੰਸੀ ਸ਼ਿਨਹੁਆ ਦੀ ਰਿਪੋਰਟ ਮੁਤਾਬਕ ਦੋਵੇਂ ਪੁਲਾੜ ਕੇਂਦਰ ਦੇ ਕੋਰ ਮਾਡਿਊਲ ਤਿਯਾਨਹੇ ਤੋਂ ਸੈੱਲ ਤੋਂ ਬਾਹਰ ਨਿਕਲੇ ਤੇ ਸਾਢੇ ਛੇ ਘੰਟੇ ਤਕ ਪੁਲਾੜ ‘ਚ ਚਹਿਲਕਦਮੀ ਕਰਨ ਤੋਂ ਬਾਅਦ ਵਾਪਸ ਪਰਤ ਆਏ। ਸ਼ੇਨਜ਼ੂ-13 ਚਾਲਕ ਦਲ ਦਾ ਤੀਜਾ ਮੈਂਬਰ, ਯੇ ਗੁਆਂਗਫੂ, ਕੋਰ ਮੋਡੀਊਲ ਤੋਂ ਸਪੇਸਵਾਕ ਦਾ ਸਮਰਥਨ ਕਰਨ ਲਈ ਸਪੇਸ ਸਟੇਸ਼ਨ ‘ਤੇ ਰਿਹਾ।
ਚੀਨ ਨੇ 16 ਅਕਤੂਬਰ ਨੂੰ ਤਿੰਨ ਪੁਲਾੜ ਯਾਤਰੀਆਂ ਨੂੰ ਛੇ ਮਹੀਨੇ ਲਈ ਸ਼ੇਨਜੋ-13 ਪੁਲਾੜ ਜਹਾਜ਼ ਰਾਹੀਂ ਰਵਾਨਾ ਕੀਤਾ ਸੀ। ਇਨ੍ਹਾਂ ਨੂੰ ਆਰਬਿਟਿੰਗ ਸਟਰਕਚਰ (ਪੁਲਾੜ ਕੇਂਦਰ) ਦਾ ਕੰਮ ਪੂਰਾ ਕਰਨ ਲਈ ਭੇਜਿਆ ਗਿਆ । ਚੀਨ ਨੂੰ ਉਮੀਦ ਹੈ ਕਿ ਕੇਂਦਰ ਨਿਰਮਾਣ ਦਾ ਕੰਮ ਅਗਲੇ ਸਾਲ ਤਕ ਪੂਰਾ ਹੋ ਜਾਵੇਗਾ। ਇਹ ਪੁਲਾੜ ਕੇਂਦਰ ਲਈ ਚੀਨ ਦਾ ਦੂਜਾ ਮਨੁੱਖੀ ਮਿਸ਼ਨ ਹੈ। ਇਸ ਤੋਂ ਪਹਿਲਾਂ 17 ਸਤੰਬਰ ਨੂੰ ਤਿੰਨ ਹੋਰ ਯਾਤਰੀਆਂ ਨੂੰ ਤਿੰਨ ਮਹੀਨੇ ਲਈ ਪੁਲਾੜ ਕੇਂਦਰ ‘ਤੇ ਭੇਜਿਆ ਗਿਆ ਸੀ। ਇਸ ਦਾ ਨਿਰਮਾਣ ਪੂਰਾ ਹੋਣ ‘ਤੇ ਚੀਨ ਦੁਨੀਆ ਦਾ ਪਹਿਲਾ ਦੇਸ਼ ਬਣ ਜਾਵੇਗਾ ਜਿਸ ਕੋਲ ਆਪਣਾ ਪੁਲਾੜ ਕੇਂਦਰ ਹੋਵੇਗਾ।
2012 ਵਿੱਚ ਸ਼ੇਨਜ਼ੂ-9 ਪੁਲਾੜ ਯਾਨ ਵਿੱਚ ਸ਼ਾਮਲ ਹੋ ਕੇ ਲਿਊ ਯਾਂਗ ਤੋਂ ਬਾਅਦ ਵੈਂਗ ਪੁਲਾੜ ਵਿੱਚ ਚੀਨ ਦੀ ਦੂਜੀ ਮਹਿਲਾ ਹੈ।ਵਾਂਗ ਪੁਲਾੜ ‘ਚ ਚਹਿਲਕਦਮੀ ਕਰਨ ਵਾਲੀ ਦੁਨੀਆ ਦੀ 16ਵੀਂ ਔਰਤ ਹੈ। ਅਕਤੂਬਰ 2019 ਤਕ ਦੀਆਂ ਕੁੱਲ 42 ਸਪੇਸ ਵਾਕ ‘ਚ 15 ਔਰਤਾਂ ਸ਼ਾਮਲ ਰਹੀਆਂ। 1984 ‘ਚ ਸੋਵੀਅਤ ਸੰਘ (ਰੂਸ) ਦੀ ਸਵੇਤਲਾਨਾ ਸਾਵਿਤਸਕਾਯ ਪੁਲਾੜ ‘ਚ ਚਹਿਲਕਦਮੀ ਕਰਨ ਵਾਲੀ ਦੁਨੀਆ ਦੀ ਪਹਿਲੀ ਔਰਤ ਬਣੀ ਸੀ।
