ਬ੍ਰਿਟੇਨ ਵਿੱਚ ਅਮਰੀਕੀ ਹਵਾਈ ਫੌਜ ਦੇ ਅਹਿਮ ਟਿਕਾਣੇ RAF ਫੇਅਰਫੋਰਡ ਨੇੜੇ ਕਥਿਤ ਅੱਤਵਾਦੀ ਸਾਜ਼ਿਸ਼ ਦੇ ਸ਼ੱਕ ਨੇ ਸੁਰੱਖਿਆ ਏਜੰਸੀਆਂ ਨੂੰ ਚੌਕਸ ਕਰ ਦਿੱਤਾ। ਐਤਵਾਰ ਤੜਕੇ ਤਿੰਨ ਸ਼ੱਕੀ ਵੈਨਾਂ ਏਅਰਬੇਸ ਵੱਲ ਜਾਂਦੀਆਂ ਦੇਖੇ ਜਾਣ ਤੋਂ ਬਾਅਦ ਪੁਲਿਸ ਨੂੰ ਸੂਚਨਾ ਦਿੱਤੀ ਗਈ। ਇਸ ਤੋਂ ਬਾਅਦ ਇਲਾਕੇ ਵਿੱਚ ਵੱਡੀ ਸੁਰੱਖਿਆ ਮੁਹਿੰਮ ਚਲਾਈ ਗਈ ਅਤੇ ਪੰਜ ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ। ਬਾਅਦ ਵਿੱਚ ਪੁੱਛਗਿੱਛ ਤੋਂ ਬਾਅਦ ਉਨ੍ਹਾਂ ਨੂੰ ਜ਼ਮਾਨਤ ’ਤੇ ਰਿਹਾਅ ਕਰ ਦਿੱਤਾ ਗਿਆ, ਹਾਲਾਂਕਿ ਜਾਂਚ ਅਜੇ ਜਾਰੀ ਹੈ।
ਪੁਲਿਸ ਨੂੰ ਸੂਚਨਾ ਦੇਣ ਵਾਲੀ ਮਹਿਲਾ ਨੇ ਦੱਸਿਆ ਕਿ ਉਹ ਇੱਕ ਪਾਰਟੀ ਤੋਂ ਵਾਪਸ ਘਰ ਆ ਰਹੀ ਸੀ। ਘਰ ਦੇ ਨੇੜੇ ਪਹੁੰਚਣ ’ਤੇ ਉਸ ਨੇ ਸੜਕ ’ਤੇ ਤਿੰਨ ਚਿੱਟੀਆਂ ਵੈਨਾਂ ਖੜ੍ਹੀਆਂ ਦੇਖੀਆਂ। ਰਸਤਾ ਬੰਦ ਹੋਣ ਕਾਰਨ ਉਸ ਨੂੰ ਆਪਣੀ ਕਾਰ ਮੋੜਨੀ ਪਈ।
ਮਹਿਲਾ ਮੁਤਾਬਕ, ਕੁਝ ਦੂਰੀ ’ਤੇ ਉਸ ਨੇ ਨਕਾਬ ਪਹਿਨੇ ਕਈ ਲੋਕਾਂ ਨੂੰ ਦੇਖਿਆ। ਕਾਰ ’ਤੇ ਨਜ਼ਰ ਪੈਂਦੇ ਹੀ ਉਹ ਲੋਕ ਭੱਜਣ ਲੱਗੇ। ਕੁਝ ਖੇਤਾਂ ਅਤੇ ਜੰਗਲ ਵੱਲ ਚਲੇ ਗਏ, ਜਦਕਿ ਕੁਝ ਨੇ ਨੇੜਲੇ ਪਿੰਡ ਵੱਲ ਰੁਖ ਕੀਤਾ।
ਉਸ ਨੇ ਪਹਿਲਾਂ ਰੱਖਿਆ ਮੰਤਰਾਲੇ ਦੀ ਪੁਲਿਸ ਹੈਲਪਲਾਈਨ ’ਤੇ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ, ਪਰ ਜਵਾਬ ਨਹੀਂ ਮਿਲਿਆ। ਇਸ ਤੋਂ ਬਾਅਦ ਉਸ ਨੇ ਰਾਤ 1:36 ਵਜੇ ਐਮਰਜੈਂਸੀ ਨੰਬਰ 999 ’ਤੇ ਫੋਨ ਕੀਤਾ। ਉਸ ਦੇ ਮੁਤਾਬਕ ਕਰੀਬ 10 ਮਿੰਟਾਂ ਵਿੱਚ ਹਥਿਆਰਬੰਦ ਪੁਲਿਸ ਪਿੰਡ ਵਿੱਚ ਪਹੁੰਚ ਗਈ।
85 ਘਰ ਖਾਲੀ ਕਰਵਾਏ, ਬੰਬ ਨਿਰੋਧਕ ਟੀਮ ਨੇ ਕੀਤੀ ਜਾਂਚ
ਘਟਨਾ ਤੋਂ ਬਾਅਦ ਇਲਾਕੇ ਵਿੱਚ ਸੁਰੱਖਿਆ ਵਧਾ ਦਿੱਤੀ ਗਈ। ਤਿੰਨੋਂ ਵੈਨਾਂ ਦੇ ਆਲੇ-ਦੁਆਲੇ ਘੇਰਾ ਬਣਾਇਆ ਗਿਆ ਅਤੇ ਬੰਬ ਨਿਰੋਧਕ ਮਾਹਿਰਾਂ ਨੇ ਰੋਬੋਟ ਦੀ ਮਦਦ ਨਾਲ ਵਾਹਨਾਂ ਦੀ ਜਾਂਚ ਕੀਤੀ। ਸਾਵਧਾਨੀ ਵਜੋਂ ਲਗਭਗ 85 ਘਰਾਂ ਨੂੰ ਖਾਲੀ ਕਰਵਾਇਆ ਗਿਆ ਸੀ।
ਪੁਲਿਸ ਨੇ ਸ਼ੁਰੂ ਵਿੱਚ ਪੰਜ ਵਿਅਕਤੀਆਂ ਨੂੰ ਵਿਸਫੋਟਕਾਂ ਨਾਲ ਸਬੰਧਤ ਅਪਰਾਧਾਂ ਦੇ ਸ਼ੱਕ ਵਿੱਚ ਗ੍ਰਿਫ਼ਤਾਰ ਕੀਤਾ ਸੀ। ਬਾਅਦ ਵਿੱਚ ਉਨ੍ਹਾਂ ਖ਼ਿਲਾਫ਼ ਅੱਤਵਾਦੀ ਕਾਰਵਾਈ ਦੀ ਤਿਆਰੀ ਦੇ ਸ਼ੱਕ ਤਹਿਤ ਵੀ ਜਾਂਚ ਕੀਤੀ ਗਈ। ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਮਾਮਲੇ ਦੀ ਜਾਂਚ ਦੇ ਕਈ ਪੱਖਾਂ ’ਤੇ ਕੰਮ ਕੀਤਾ ਜਾ ਰਿਹਾ ਹੈ।
ਬ੍ਰਿਟੇਨ ਦੇ ਰੱਖਿਆ ਮੰਤਰੀ ਵੇਸ ਸਟ੍ਰੀਟਿੰਗ ਨੇ ਸ਼ੱਕੀ ਗਤੀਵਿਧੀ ਦੇਖ ਕੇ ਪੁਲਿਸ ਨੂੰ ਜਾਣਕਾਰੀ ਦੇਣ ਵਾਲੀ ਮਹਿਲਾ ਦੀ ਸ਼ਲਾਘਾ ਕੀਤੀ। ਉਨ੍ਹਾਂ ਕਿਹਾ ਕਿ ਮਹਿਲਾ ਨੇ ਸਮੇਂ ਸਿਰ ਪੁਲਿਸ ਨੂੰ ਸੂਚਿਤ ਕਰਕੇ ਸਮਝਦਾਰੀ ਦਿਖਾਈ।
ਜਦੋਂ ਉਨ੍ਹਾਂ ਤੋਂ ਪੁੱਛਿਆ ਗਿਆ ਕਿ ਮਹਿਲਾ ਵੱਲੋਂ 24 ਘੰਟੇ ਚੱਲਣ ਵਾਲੀ ਸੁਰੱਖਿਆ ਹੈਲਪਲਾਈਨ ’ਤੇ ਕੀਤੀ ਕਾਲ ਦਾ ਜਵਾਬ ਕਿਉਂ ਨਹੀਂ ਮਿਲਿਆ, ਤਾਂ ਉਨ੍ਹਾਂ ਨੇ ਕਿਹਾ ਕਿ ਇਸ ਮਾਮਲੇ ਦੀ ਜਾਂਚ ਚੱਲ ਰਹੀ ਹੈ ਅਤੇ ਇਸ ਪੜਾਅ ’ਤੇ ਇਸ ਬਾਰੇ ਹੋਰ ਜਾਣਕਾਰੀ ਦੇਣਾ ਸੰਭਵ ਨਹੀਂ।
RAF ਫੇਅਰਫੋਰਡ ਇੰਗਲੈਂਡ ਦੇ ਗਲੌਸਟਸ਼ਾਇਰ ਵਿੱਚ ਸਥਿਤ ਹੈ ਅਤੇ ਅਮਰੀਕੀ ਹਵਾਈ ਫੌਜ ਵੱਲੋਂ ਵਰਤਿਆ ਜਾਂਦਾ ਮਹੱਤਵਪੂਰਨ ਏਅਰਬੇਸ ਹੈ। ਹਾਲੀਆ ਈਰਾਨ ਜੰਗ ਦੌਰਾਨ ਵੀ ਇੱਥੋਂ ਅਮਰੀਕੀ ਲੜਾਕੂ ਅਤੇ ਬੰਬਾਰ ਜਹਾਜ਼ਾਂ ਦੀਆਂ ਉਡਾਣਾਂ ਹੋਈਆਂ ਸਨ। ਘਟਨਾ ਤੋਂ ਬਾਅਦ ਏਅਰਬੇਸ ’ਤੇ ਤਾਇਨਾਤ ਅਮਰੀਕੀ ਕਰਮਚਾਰੀਆਂ ਨੂੰ ਸਾਵਧਾਨ ਰਹਿਣ ਲਈ ਕਿਹਾ ਗਿਆ।
