ਵਾਸ਼ਿੰਗਟਨ: ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਲੋਕਪ੍ਰਿਯਤਾ ਇਰਾਨ ਨਾਲ ਚੱਲ ਰਹੀ ਜੰਗ ਦੇ ਵਿਚਕਾਰ ਲਗਾਤਾਰ ਘਟਦੀ ਨਜ਼ਰ ਆ ਰਹੀ ਹੈ। ਰਾਇਟਰਜ਼/ਇਪਸੋਸ ਦੇ ਤਾਜ਼ਾ ਸਰਵੇ ਮੁਤਾਬਕ ਸਿਰਫ਼ 33 ਫੀਸਦੀ ਅਮਰੀਕੀਆਂ ਨੇ ਟਰੰਪ ਦੇ ਕੰਮਕਾਜ ਨੂੰ ਮਨਜ਼ੂਰੀ ਦਿੱਤੀ ਹੈ, ਜਦਕਿ 64 ਫੀਸਦੀ ਲੋਕਾਂ ਨੇ ਉਨ੍ਹਾਂ ਦੇ ਕੰਮਕਾਜ ਨੂੰ ਨਾਪਸੰਦ ਕੀਤਾ ਹੈ। ਇਹ ਉਨ੍ਹਾਂ ਦੇ ਮੌਜੂਦਾ ਰਾਸ਼ਟਰਪਤੀ ਕਾਰਜਕਾਲ ਦੀ ਸਭ ਤੋਂ ਘੱਟ ਅਪਰੂਵਲ ਰੇਟਿੰਗ ਦੱਸੀ ਜਾ ਰਹੀ ਹੈ।
ਇਸੇ ਮਹੀਨੇ ਹੋਏ ਪਿਛਲੇ ਸਰਵੇ ਵਿੱਚ ਟਰੰਪ ਦੀ ਅਪਰੂਵਲ ਰੇਟਿੰਗ 35 ਫੀਸਦੀ ਸੀ। ਹੁਣ ਇਹ ਘਟ ਕੇ 33 ਫੀਸਦੀ ਰਹਿ ਗਈ ਹੈ। ਇਹ ਪੱਧਰ ਉਨ੍ਹਾਂ ਦੇ ਪਹਿਲੇ ਕਾਰਜਕਾਲ ਦੌਰਾਨ ਦਸੰਬਰ 2017 ਵਿੱਚ ਦਰਜ ਕੀਤੀ ਸਭ ਤੋਂ ਘੱਟ ਰੇਟਿੰਗ ਦੇ ਬਰਾਬਰ ਹੈ।
80 ਫੀਸਦੀ ਅਮਰੀਕੀ ਜੰਗ ਲੰਬੀ ਚੱਲਣ ਦੇ ਹੱਕ ’ਚ ਨਹੀਂ
ਸਰਵੇ ਵਿੱਚ 80 ਫੀਸਦੀ ਅਮਰੀਕੀਆਂ ਨੇ ਕਿਹਾ ਕਿ ਇਰਾਨ ਨਾਲ ਅਮਰੀਕਾ ਦੀ ਜੰਗ ਲੰਬੇ ਸਮੇਂ ਤੱਕ ਚੱਲ ਸਕਦੀ ਹੈ। ਇਨ੍ਹਾਂ ਵਿੱਚ 87 ਫੀਸਦੀ ਡੈਮੋਕ੍ਰੈਟ ਅਤੇ 71 ਫੀਸਦੀ ਰਿਪਬਲਿਕਨ ਸ਼ਾਮਲ ਹਨ। ਸਿਰਫ਼ 16 ਫੀਸਦੀ ਲੋਕਾਂ ਨੂੰ ਉਮੀਦ ਹੈ ਕਿ ਜੰਗ ਕੁਝ ਹਫ਼ਤਿਆਂ ਵਿੱਚ ਖਤਮ ਹੋ ਜਾਵੇਗੀ।
ਇਸ ਤੋਂ ਇਲਾਵਾ ਸਿਰਫ਼ ਹਰ ਪੰਜ ਵਿੱਚੋਂ ਇੱਕ ਅਮਰੀਕੀ ਮੰਨਦਾ ਹੈ ਕਿ ਇਰਾਨ ਖ਼ਿਲਾਫ਼ ਜੰਗ ਸ਼ੁਰੂ ਕਰਨਾ ਸਹੀ ਫੈਸਲਾ ਸੀ।
ਟਰੰਪ ਨੇ ਗੱਲਬਾਤ ਦੀ 60 ਦਿਨਾਂ ਦੀ ਡੈੱਡਲਾਈਨ ਵਧਾਉਣ ਤੋਂ ਕੀਤਾ ਇਨਕਾਰ
ਟਰੰਪ ਨੇ ਇਰਾਨ ਨਾਲ ਸ਼ਾਂਤੀ ਵਾਰਤਾ ਲਈ ਤੈਅ ਕੀਤੀ 60 ਦਿਨਾਂ ਦੀ ਸਮਾਂਸੀਮਾ ਨੂੰ ਵਧਾਉਣ ਤੋਂ ਇਨਕਾਰ ਕਰ ਦਿੱਤਾ ਹੈ। ਸੋਮਵਾਰ ਨੂੰ ਇਹ ਡੈੱਡਲਾਈਨ ਖਤਮ ਹੋ ਗਈ। ਟਰੰਪ ਨੇ ਕਿਹਾ ਕਿ ਇਰਾਨ ਸਮਝੌਤਾ ਕਰਨਾ ਚਾਹੁੰਦਾ ਹੈ, ਪਰ ਉਹ ਉਸ ਕਿਸਮ ਦੀ ਡੀਲ ਲਈ ਤਿਆਰ ਨਹੀਂ ਹੈ, ਜਿਸ ਨੂੰ ਅਮਰੀਕਾ ਜ਼ਰੂਰੀ ਮੰਨਦਾ ਹੈ।
ਅਮਰੀਕਾ ਦੀ ਮੁੱਖ ਮੰਗ ਇਰਾਨ ਦੇ ਪਰਮਾਣੂ ਪ੍ਰੋਗਰਾਮ ਨੂੰ ਖਤਮ ਕਰਨਾ ਹੈ। ਦੂਜੇ ਪਾਸੇ ਇਰਾਨ ਲਗਾਤਾਰ ਕਹਿੰਦਾ ਆ ਰਿਹਾ ਹੈ ਕਿ ਉਸ ਦਾ ਪਰਮਾਣੂ ਪ੍ਰੋਗਰਾਮ ਸ਼ਾਂਤੀਪੂਰਨ ਊਰਜਾ ਲਈ ਹੈ। ਇਹੀ ਦੋਵਾਂ ਦੇਸ਼ਾਂ ਵਿਚਾਲੇ ਵੱਡਾ ਵਿਵਾਦ ਬਣਿਆ ਹੋਇਆ ਹੈ।
60 ਦਿਨ ਪਹਿਲਾਂ ਹੋਇਆ ਸੀ ਸਮਝੌਤਾ
17 ਜੂਨ ਨੂੰ ਅਮਰੀਕਾ ਅਤੇ ਇਰਾਨ ਵਿਚਾਲੇ ਇੱਕ ਸਮਝੌਤਾ ਮੈਮੋਰੈਂਡਮ ਯਾਨੀ MOU ਹੋਇਆ ਸੀ। ਇਸ ਤਹਿਤ ਦੋਵਾਂ ਦੇਸ਼ਾਂ ਵਿਚਾਲੇ ਗੱਲਬਾਤ ਲਈ 60 ਦਿਨ ਦਾ ਸਮਾਂ ਤੈਅ ਕੀਤਾ ਗਿਆ ਸੀ। ਇਸ ਦੌਰਾਨ ਕਈ ਅਹਿਮ ਮੁੱਦਿਆਂ ਦਾ ਹੱਲ ਲੱਭਣ ਦੀ ਕੋਸ਼ਿਸ਼ ਕੀਤੀ ਜਾਣੀ ਸੀ।
ਪਰ 60 ਦਿਨ ਪੂਰੇ ਹੋਣ ਦੇ ਬਾਵਜੂਦ ਹੋਰਮੁਜ਼ ਸਟ੍ਰੇਟ ਖੋਲ੍ਹਣ, ਇਰਾਨ ਦੇ ਪਰਮਾਣੂ ਪ੍ਰੋਗਰਾਮ ਅਤੇ ਸਥਾਈ ਸ਼ਾਂਤੀ ਸਮਝੌਤੇ ਵਰਗੇ ਮੁੱਦਿਆਂ ’ਤੇ ਸਹਿਮਤੀ ਨਹੀਂ ਬਣ ਸਕੀ।
ਇਰਾਨ ਨੇ ਡੈੱਡਲਾਈਨ ਨੂੰ ਦੱਸਿਆ ਗੈਰ-ਪ੍ਰਸੰਗਿਕ
ਇਰਾਨ ਨੇ ਵੀ 60 ਦਿਨਾਂ ਦੀ ਸਮਾਂਸੀਮਾ ਵਧਾਉਣ ਵਿੱਚ ਦਿਲਚਸਪੀ ਨਹੀਂ ਦਿਖਾਈ। ਇਰਾਨੀ ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਇਸਮਾਈਲ ਬਘਾਈ ਨੇ ਕਿਹਾ ਕਿ ਦੋਵਾਂ ਦੇਸ਼ਾਂ ਵਿਚਾਲੇ ਅਸਲ ਵਿੱਚ ਗੱਲਬਾਤ ਸ਼ੁਰੂ ਹੀ ਨਹੀਂ ਹੋਈ ਸੀ।
ਇਰਾਨ ਦਾ ਦਾਅਵਾ ਹੈ ਕਿ ਅਮਰੀਕਾ ਨੇ ਸਮਝੌਤੇ ਤਹਿਤ ਆਪਣੀਆਂ ਜ਼ਿੰਮੇਵਾਰੀਆਂ ਪੂਰੀਆਂ ਨਹੀਂ ਕੀਤੀਆਂ। ਇਸ ਕਾਰਨ ਤੇਹਰਾਨ ਇਸ 60 ਦਿਨਾਂ ਦੀ ਮਿਆਦ ਨੂੰ ਗੱਲਬਾਤ ਦੀ ਅਸਲ ਡੈੱਡਲਾਈਨ ਨਹੀਂ ਮੰਨਦਾ।
