ਅਮਰੀਕਾ ਨੇ ਵੈਨੇਜ਼ੁਏਲਾ ਦੇ ਰਾਸ਼ਟਰਪਤੀ ਨਿਕੋਲਸ ਮਾਦੁਰੋ ਦੇ ਜਹਾਜ਼ ਨੂੰ ਜ਼ਬਤ ਕਰ ਲਿਆ ਹੈ। ਅਮਰੀਕਾ ਨੇ ਕਿਹਾ ਕਿ ਇਹ ਜਹਾਜ਼ 13 ਮਿਲੀਅਨ ਡਾਲਰ ਵਿੱਚ ਗੈਰ-ਕਾਨੂੰਨੀ ਤੌਰ ‘ਤੇ ਖਰੀਦਿਆ ਗਿਆ ਸੀ ਅਤੇ ਗੁਪਤ ਤਰੀਕੇ ਨਾਲ ਦੇਸ਼ ਤੋਂ ਬਾਹਰ ਉਡਾ ਦਿੱਤਾ ਗਿਆ ਸੀ।
ਅਮਰੀਕੀ ਨਿਆਂ ਵਿਭਾਗ ਦੇ ਅਨੁਸਾਰ, ਫਾਲਕਨ 900 ਐਕਸ ਏਅਰਕ੍ਰਾਫਟ ਨੂੰ ਡੋਮਿਨਿਕਨ ਰੀਪਬਲਿਕ ਵਿੱਚ ਜ਼ਬਤ ਕੀਤਾ ਗਿਆ ਸੀ ਅਤੇ ਬਾਅਦ ਵਿੱਚ ਅਮਰੀਕਾ ਦੇ ਫਲੋਰੀਡਾ ਲਈ ਉਡਾਣ ਭਰੀ ਗਈ ਸੀ। ਅਜੇ ਇਹ ਸਪੱਸ਼ਟ ਨਹੀਂ ਹੋਇਆ ਹੈ ਕਿ ਇਹ ਜਹਾਜ਼ ਡੋਮਿਨਿਕਨ ਰੀਪਬਲਿਕ ਕਦੋਂ ਪਹੁੰਚਿਆ। ਟ੍ਰੈਕਿੰਗ ਡੇਟਾ ਦਰਸਾਉਂਦਾ ਹੈ ਕਿ ਇਹ ਰਾਜਧਾਨੀ ਸੈਂਟੋ ਡੋਮਿੰਗੋ ਦੇ ਨੇੜੇ ਇੱਕ ਹਵਾਈ ਅੱਡੇ ਤੋਂ ਉਡਾਣ ਭਰਨ ਤੋਂ ਬਾਅਦ ਸੋਮਵਾਰ ਨੂੰ ਫਲੋਰੀਡਾ ਪਹੁੰਚਿਆ।
ਵੈਨੇਜ਼ੁਏਲਾ ਨੇ ਜ਼ਬਤੀ ਦਾ ਵਿਰੋਧ ਕੀਤਾ ਹੈ, ਇਸ ਨੂੰ “ਡਕੈਤੀ” ਦੀ ਕਾਰਵਾਈ ਕਿਹਾ ਹੈ। ਇੱਕ ਬਿਆਨ ਵਿੱਚ, ਵੈਨੇਜ਼ੁਏਲਾ ਸਰਕਾਰ ਨੇ ਕਿਹਾ ਹੈ ਕਿ ਉਸ ਨੂੰ ਇਸ ਨੁਕਸਾਨ ਦੀ ਭਰਪਾਈ ਲਈ ਕਾਨੂੰਨੀ ਕਾਰਵਾਈ ਕਰਨ ਦਾ ਅਧਿਕਾਰ ਹੈ।
ਅਮਰੀਕੀ ਅਧਿਕਾਰੀਆਂ ਨੇ ਦੱਸਿਆ ਕਿ ਜਹਾਜ਼ ਨੂੰ ਅਮਰੀਕੀ ਨਿਰਯਾਤ ਕੰਟਰੋਲ ਅਤੇ ਪਾਬੰਦੀ ਕਾਨੂੰਨਾਂ ਦੀ ਉਲੰਘਣਾ ਕਰਨ ਦੇ ਸ਼ੱਕ ‘ਚ ਜ਼ਬਤ ਕੀਤਾ ਗਿਆ ਸੀ। ਉਨ੍ਹਾਂ ਕਿਹਾ ਕਿ ਜਾਂਚ ‘ਚ ਪਤਾ ਲੱਗਾ ਹੈ ਕਿ ਮਾਦੁਰੋ ਨਾਲ ਜੁੜੇ ਲੋਕਾਂ ਨੇ ਕਥਿਤ ਤੌਰ ‘ਤੇ 2002-2023 ਦਰਮਿਆਨ ਜਹਾਜ਼ਾਂ ਦੀ ਗੈਰ-ਕਾਨੂੰਨੀ ਖਰੀਦ ਲਈ ਕੈਰੇਬੀਅਨ ਸ਼ੈੱਲ ਕੰਪਨੀ ਦੀ ਮਦਦ ਲਈ ਸੀ। ਜਿਸ ਕੰਪਨੀ ਤੋਂ ਇਹ ਜਹਾਜ਼ ਖਰੀਦਿਆ ਗਿਆ ਸੀ ਉਹ ਫਲੋਰੀਡਾ ਦੀ ਸੀ।
- Advertisement -
ਇਸ ਜਹਾਜ਼ ਨੂੰ ਅਪ੍ਰੈਲ 2023 ‘ਚ ਗੈਰ-ਕਾਨੂੰਨੀ ਤਰੀਕੇ ਨਾਲ ਵੈਨੇਜ਼ੁਏਲਾ ਲਿਆਂਦਾ ਗਿਆ ਸੀ। ਜਦੋਂ ਤੋਂ ਮਾਦੁਰੋ ਨੇ ਜੁਲਾਈ ਵਿੱਚ ਦੁਬਾਰਾ ਆਮ ਚੋਣਾਂ ਜਿੱਤੀਆਂ ਹਨ, ਪੱਛਮੀ ਦੇਸ਼ਾਂ ਨਾਲ ਤਣਾਅ ਵਧ ਗਿਆ ਹੈ। ਅਮਰੀਕਾ ਦਾ ਕਹਿਣਾ ਹੈ ਕਿ ਇਸ ਚੋਣ ਵਿਚ ਧਾਂਦਲੀ ਹੋਈ ਸੀ।
ਇਹ ਪਹਿਲੀ ਵਾਰ ਨਹੀਂ ਹੈ ਜਦੋਂ ਅਮਰੀਕੀ ਸੰਘੀ ਏਜੰਸੀਆਂ ਨੇ ਮਾਦੁਰੋ ‘ਤੇ ਭ੍ਰਿਸ਼ਟਾਚਾਰ ਦੇ ਦੋਸ਼ ਲਗਾਏ ਹਨ। 2020 ਵਿੱਚ, ਯੂਐਸ ਨਿਆਂ ਵਿਭਾਗ ਨੇ ਮਾਦੁਰੋ ਅਤੇ 14 ਹੋਰ ਅਧਿਕਾਰੀਆਂ ‘ਤੇ ਨਾਰਕੋ-ਅੱਤਵਾਦ, ਭ੍ਰਿਸ਼ਟਾਚਾਰ ਅਤੇ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਦੇ ਦੋਸ਼ ਲਗਾਏ ਸਨ। ਅਮਰੀਕੀ ਵਿਦੇਸ਼ ਵਿਭਾਗ ਨੇ ਮਾਦੁਰੋ ਦੀ ਗ੍ਰਿਫਤਾਰੀ ਅਤੇ ਸਜ਼ਾ ਦੇਣ ਲਈ 15 ਮਿਲੀਅਨ ਡਾਲਰ ਦੇ ਇਨਾਮ ਦਾ ਐਲਾਨ ਕੀਤਾ ਹੈ।
