ਓਰੈਂਜਵਿੱਲ: ਕੈਨੇਡਾ ‘ਚ ਲਗਾਤਾਰ ਕਾਰ ਚੋਰੀ ਦੀਆਂ ਘਟਨਾਵਾਂ ‘ਚ ਵਾਧਾ ਹੁੰਦਾ ਜਾ ਰਿਹਾ ਹੈ। ਇਸੇ ਦੇ ਚਲਦਿਆਂ ਤਿੰਨ ਪੰਜਾਬੀ ਨੌਜਵਾਨਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ, ਜਿਹੜੇ ਕਿ ਚੋਰੀ ਦੀ ਇੱਕ ਗੱਡੀ ਵਿੱਚ ਸੁੱਤੇ ਪਏ ਸੀ। ਗ੍ਰਿਫਤਾਰ ਕੀਤੇ ਗਏ ਨੌਜਵਾਨਾਂ ਦੀ ਪਛਾਣ ਬਰੈਂਪਟਨ ਦੇ 26 ਸਾਲਾ ਕਰਨਬੀਰ ਸਿੰਘ, 23 ਸਾਲਾ ਵਿਕਰਮਜੀਤ ਸਿੰਘ ਅਤੇ 24 ਸਾਲਾ ਗੁਰਮੀਤ ਸਿੰਘ ਵਜੋਂ ਕੀਤੀ ਗਈ ਹੈ।
ਓਨਟਾਰੀਓ ਪ੍ਰੋਵਿੰਸ਼ੀਅਲ ਪੁਲਿਸ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਸਵੇਰੇ ਪੌਣੇ 10 ਵਜੇ ਇੱਕ ਵਿਅਕਤੀ ਨੇ ਫੋਨ ਕਰਕੇ ਦੱਸਿਆ ਕਿ ਓਰੈਂਜਵਿੱਲ ਵਿੱਚ ਬਰੌਡਵੇਅ ਦੀ ਪਾਰਕਿੰਗ ਲੌਟ ਵਿੱਚ ਇੱਕ ਗੱਡੀ ਖੜ੍ਹੀ ਹੈ, ਜਿਸ ਵਿੱਚ ਤਿੰਨ ਵਿਅਕਤੀ ਸੁੱਤੇ ਪਏ ਹਨ। ਪੁਲਿਸ ਵਲੋਂ ਇਨ੍ਹਾਂ ਨੂੰ ਗ੍ਰਿਫਤਾਰ ਕਰਕੇ ਵੱਖ-ਵੱਖ ਦੋਸ਼ ਆਇਦ ਕਰ ਦਿੱਤੇ ਗਏ ਹਨ।
ਦੱਸਣਯੋਗ ਹੈ ਕਿ ਇਸ ਤੋਂ ਪਹਿਲਾਂ ਬਰੈਂਪਟਨ ਤੋਂ ਚੋਰੀ ਹੋਏ ਟਰੱਕ ਦੇ ਮਾਮਲੇ ‘ਚ 2 ਪੰਜਾਬੀਆਂ ਖਿਲਾਫ ਦੋਸ਼ ਆਇਦ ਕੀਤੇ ਗਏ ਸਨ, ਜਿਨ੍ਹਾਂ ਦੀ ਪਛਾਣ 44 ਸਾਲਾ ਜਸਵਿੰਦਰ ਅਟਵਾਲ ਅਤੇ 30 ਸਾਲ ਦੇ ਨਵਤੇਜ ਸਿੰਘ ਵਜੋਂ ਕੀਤੀ ਗਈ ਸੀ। ਜਾਣਕਾਰੀ ਮੁਤਾਬਕ ਪਹਿਲੀ ਸਤੰਬਰ ਨੂੰ ਓਨਟਾਰੀਓ ਪ੍ਰੋਵਿੰਸ਼ੀਅਲ ਪੁਲਿਸ ਦੇ ਇੱਕ ਅਫ਼ਸਰ ਨੂੰ ਗਸ਼ਤ ਦੌਰਾਨ ਬਗੈਰ ਨੰਬਰ ਪਲੇਟਾਂ ਵਾਲਾ ਇੱਕ ਟਰੱਕ ਨਜ਼ਰ ਆਇਆ ਜੋ ਕੈਲੇਡਨ ਦੇ ਮਰਚੈਂਟ ਰੋਡ ’ਤੇ ਖੜ੍ਹਾ ਸੀ।
ਜਦੋਂ ਪੁਲਿਸ ਅਫ਼ਸਰ ਨੇ ਨੇੜੇ ਜਾ ਕੇ ਦੇਖਿਆ ਤਾਂ ਦੋ ਵਿਅਕਤੀ ਅੰਦਰ ਸੌਂ ਰਹੇ ਸਨ, ਜਿਨ੍ਹਾਂ ਨੂੰ ਉਠਾ ਕੇ ਕਾਗਜ਼ ਪੱਤਰ ਮੰਗੇ ਗਏ ਪਰ ਉਹ ਕੁਝ ਵੀ ਦਿਖਾਉਣ ਵਿਚ ਅਸਫ਼ਲ ਰਹੇ। ਇਸੇ ਦੌਰਾਨ ਦੋਹਾਂ ਨੇ ਟਰੱਕ ਲੈ ਕੇ ਫਰਾਰ ਹੋਣ ਦਾ ਯਤਨ ਕੀਤਾ ਅਤੇ ਪੁਲਿਸ ਦੀ ਗੱਡੀ ਨੂੰ ਟੱਕਰ ਮਾਰ ਦਿੱਤੀ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
