ਗੁਜਰਾਤੀ ਮੂਲ ਦੀ ਔਰਤ ਨੇ ਯੂਕੇ ਦੀਆਂ ਆਮ ਚੋਣਾਂ ‘ਚ ਤੋੜਿਆ 37 ਸਾਲ ਦਾ ਰਿਕਾਰਡ

Prabhjot Kaur
2 Min Read

ਨਿਊਜ਼ ਡੈਸਕ: ਇਸ ਵਾਰ ਬ੍ਰਿਟੇਨ ਦੀਆਂ ਚੋਣਾਂ ‘ਚ ਭਾਰਤੀਆਂ ਦੀ ਦਬਦਬਾ ਰਿਹਾ ਹੈ। ਭਾਰਤੀ ਮੂਲ ਦੇ 26 ਸੰਸਦ ਮੈਂਬਰ ਪਾਰਲੀਮੈਂਟ ਲਈ ਚੁਣੇ ਗਏ ਹਨ। ਕੰਜ਼ਰਵੇਟਿਵ ਪਾਰਟੀ (ਟੋਰੀ) ਭਾਵੇਂ ਚੋਣਾਂ ਹਾਰ ਗਈ ਹੋਵੇ ਪਰ ਉਸ ਦੀ ਭਾਰਤੀ ਮੂਲ ਦੀ ਨਵੀਂ ਚੁਣੀ ਗਈ ਸੰਸਦ ਮੈਂਬਰ ਸ਼ਿਵਾਨੀ ਰਾਜਾ ਦੀ ਕਾਫੀ ਚਰਚਾ ਹੋ ਰਹੀ ਹੈ। ਇਸ ਵਾਰ ਉਹ ਲੈਸਟਰ ਈਸਟ ਸੀਟ ਤੋਂ ਚੋਣ ਜਿੱਤੇ ਹਨ। ਸ਼ਿਵਾਨੀ ਨੇ ਲੰਡਨ ਦੇ ਸਾਬਕਾ ਡਿਪਟੀ ਮੇਅਰ ਰਾਜੇਸ਼ ਅਗਰਵਾਲ ਨੂੰ ਹਰਾਇਆ। ਧਿਆਨ ਦੇਣ ਵਾਲੀ ਗੱਲ ਇਹ ਹੈ ਕਿ 37 ਸਾਲ ਹੋ ਗਏ ਹਨ ਕਿ ਇਸ ਸੀਟ ‘ਤੇ ਕੋਈ ਟੋਰੀ ਆਗੂ ਜਿੱਤਿਆ ਹੈ।

ਲੈਸਟਰ ਈਸਟ ਦੀ ਸੀਟ ‘ਤੇ ਲੇਬਰ ਪਾਰਟੀ ਦੀ ਮਜ਼ਬੂਤ ​​ਪਕੜ ਮੰਨੀ ਜਾ ਰਹੀ ਸੀ। ਇਸ ਸੀਟ ‘ਤੇ 37 ਸਾਲਾਂ ‘ਚ ਪਹਿਲੀ ਵਾਰ ਟੋਰੀਜ਼ ਨੇ ਕਬਜ਼ਾ ਕੀਤਾ ਹੈ। ਲੈਸਟਰ ਈਸਟ ‘ਚ ਸ਼ਿਵਾਨੀ ਰਾਜਾ ਨੂੰ 14526 ਵੋਟਾਂ ਮਿਲੀਆਂ ਹਨ। ਉਨ੍ਹਾਂ ਨੇ ਰਾਜੇਸ਼ ਅਗਰਵਾਲ ਵਿਰੁੱਧ 4 ਹਜ਼ਾਰ ਤੋਂ ਵੱਧ ਵੋਟਾਂ ਨਾਲ ਜਿੱਤ ਦਰਜ ਕੀਤੀ। ਰਾਜਾ ਗੁਜਰਾਤੀ ਮੂਲ ਦਾ ਹੈ। ਉਸ ਦੇ ਪਰਿਵਾਰਕ ਮੈਂਬਰ ਦੀਵ ਵਿੱਚ ਰਹਿੰਦੇ ਸਨ। ਚੋਣਾਂ ਦੌਰਾਨ ਸ਼ਿਵਾਨੀ ਬਰਤਾਨੀਆ ‘ਚ ਰਹਿ ਰਹੇ ਭਾਰਤੀ ਪ੍ਰਵਾਸੀਆਂ ਨਾਲ ਲਗਾਤਾਰ ਜੁੜੀ ਰਹੀ, ਜਿਸ ਦਾ ਉਸ ਨੂੰ ਫਾਇਦਾ ਵੀ ਹੋਇਆ।

ਹਾਲ ਹੀ ‘ਚ ਚੋਣ ਪ੍ਰਚਾਰ ਦੌਰਾਨ ਉਹ ਸ਼ਿਵ ਕਥਾ ਸੁਣਨ ਪਹੁੰਚੀ ਸੀ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਉਥੇ ਗਰਬਾ ਵੀ ਕੀਤਾ। ਉਨ੍ਹਾਂ ਨੇ ਭਾਰਤ ਵਿੱਚ ਰਹਿੰਦੇ ਬ੍ਰਿਟਿਸ਼ ਵੋਟਰਾਂ ਨੂੰ ਵੀ ਪ੍ਰਭਾਵਿਤ ਕੀਤਾ ਅਤੇ ਉਨ੍ਹਾਂ ਨੂੰ ਆਨਲਾਈਨ ਵੋਟ ਪਾਉਣ ਦੀ ਅਪੀਲ ਕੀਤੀ। ਸ਼ਿਵਾਨੀ ਰਾਜਾ ਨੇ ਵਿਸ਼ੇਸ਼ ਤੌਰ ‘ਤੇ ਦੀਵ ਅਤੇ ਗੁਜਰਾਤ ਵਿਚ ਰਹਿੰਦੇ ਬ੍ਰਿਟਿਸ਼ ਲੋਕਾਂ ਨਾਲ ਸੰਪਰਕ ਕੀਤਾ।

ਸ਼ਿਵਾਨੀ ਦੇ ਮਾਤਾ-ਪਿਤਾ 70 ਦੇ ਦਹਾਕੇ ‘ਚ ਕੀਨੀਆ ਤੋਂ ਲੈਸਟਰ ਆਏ ਸਨ। ਉਸਨੇ ਡੀ ਮੌਂਟਫੋਰਟ ਯੂਨੀਵਰਸਿਟੀ ਤੋਂ ਆਪਣੀ ਸਿੱਖਿਆ ਪੂਰੀ ਕੀਤੀ ਅਤੇ ਫਾਰਮਾਸਿਊਟੀਕਲ ਅਤੇ ਕਾਸਮੈਟਿਕ ਸਾਇੰਸ ਵਿੱਚ ਗ੍ਰੈਜੂਏਸ਼ਨ ਕੀਤੀ। ਇਸ ਤੋਂ ਬਾਅਦ ਉਸਨੇ ਕਈ ਕਾਸਮੈਟਿਕ ਬ੍ਰਾਂਡਸ ਨਾਲ ਵੀ ਕੰਮ ਕੀਤਾ। ਦੱਸ ਦਈਏ ਕਿ ਇਸ ਵਾਰ ਚੋਣਾਂ ‘ਚ ਲੇਬਰ ਪਾਰਟੀ ਨੂੰ 412 ਸੀਟਾਂ ਮਿਲੀਆਂ ਹਨ ਜਦਕਿ ਟੋਰੀ ਨੂੰ ਸਿਰਫ 121 ਸੀਟਾਂ ਹੀ ਮਿਲੀਆਂ ਹਨ। ਇਸ ਤੋਂ ਬਾਅਦ ਰਿਸ਼ੀ ਸੁਨਕ ਨੇ ਟੋਰੀ ਚੀਫ ਅਤੇ ਪ੍ਰਧਾਨ ਮੰਤਰੀ ਦੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ।

- Advertisement -

 

Share this Article
Leave a comment