ਟੋਰਾਂਟੋ: ਕੈਨੇਡਾ ‘ਚ ਮਹਿੰਗਾਈ ਦਰ ਘਟ ਕੇ 3.4 ਫ਼ੀ ਸਦੀ ‘ਤੇ ਆ ਚੁੱਕੀ ਹੈ ਪਰ ਲੋਕਾਂ ਦਾ ਗਰੌਸਰੀ ਬਿਲ ਹੇਠਾਂ ਨਹੀਂ ਆ ਰਿਹਾ। ਗੈਸੋਲੀਨ ਦੀਆਂ ਕੀਮਤਾਂ ‘ਚ ਕਮੀ ਕਾਰਨ ਮਈ ਮਹੀਨੇ ਦੌਰਾਨ ਮਹਿੰਗਾਈ ਦਰ 4.4 ਫ਼ੀਸਦੀ ਤੋਂ ਘਟ ਕੇ 3.4 ਫ਼ੀਸਦੀ ‘ਤੇ ਆ ਗਈ ਅਤੇ ਪਿਛਲੇ ਦੋ ਸਾਲ ਦਾ ਇਹ ਸਭ ਤੋਂ ਹੇਠਲਾ ਪੱਧਰ ਮੰਨਿਆ ਜਾ ਰਿਹਾ ਹੈ। ਦੂਜੇ ਪਾਸੇ ਬੈਂਕ ਆਫ਼ ਕੈਨੇਡਾ ਇਨ੍ਹਾਂ ਅੰਕੜਿਆਂ ਤੋਂ ਪ੍ਰਭਾਵਤ ਨਜ਼ਰ ਨਹੀਂ ਆ ਰਿਹਾ ਅਤੇ ਆਰਥਿਕ ਮਾਹਰ ਵਿਆਜ ਦਰਾਂ ‘ਚ ਇਕ ਹੋਰ ਵਾਧੇ ਦੀ ਪੇਸ਼ੀਨਗੋਈ ਕਰ ਰਹੇ ਹਨ।
ਗਰੌਸਰੀ ਦੀਆਂ ਕੀਮਤਾਂ ‘ਚ ਮਈ ਮਹੀਨੇ ਦੌਰਾਨ 9 ਫ਼ੀਸਦੀ ਵਾਧਾ ਹੋਇਆ। ਖਾਣ ਵਾਲੇ ਤੇਲ 20.3 ਫ਼ੀਸਦੀ ਮਹਿੰਗੇ ਹੋਏ ਜਦਕਿ ਬੇਕਰੀ ਵਸਤਾਂ ਦੀ ਕੀਮਤ 15 ਫ਼ੀਸਦੀ ਉੱਪਰ ਗਈਆਂ। ਯੂਨੀਵਰਸਿਟੀ ਆਫ਼ ਗੁਐਲਫ ‘ਚ ਇਕੋਨੌਮਿਕਸ ਦੇ ਪੋਫੈਸਰ ਮਾਈਕਲ ਵੌਨ ਨੇ ਕਿਹਾ ਕਿ ਕੁਝ ਗਰੌਸਰੀ ਵਸਤਾਂ ਦੇ ਭਾਅ ਜ਼ਰੂਰ ਘਟੇ ਹਨ ਪਰ ਵੱਡੀ ਰਾਹਤ ਨਹੀਂ ਮਿਲ ਸਕੀ। ਜੇ ਗੈਸੋਲੀਨ ਦੀਆਂ ਕੀਮਤਾਂ ਵਿੱਚ ਆਈ ਕਮੀ ਨੂੰ ਇੱਕ ਪਾਸੇ ਰੱਖ ਦਿਤਾ ਜਾਵੇ ਤਾਂ ਮਹਿੰਗਾਈ ਦਰ ਵਿੱਚ ਅਪ੍ਰੈਲ ਦੇ ਮੁਕਾਬਲੇ ਕੋਈ ਤਬਦੀਲੀ ਨਹੀਂ ਹੋਈ ਅਤੇ ਇਸੇ ਕਰ ਕੇ ਬੈਂਕ ਆਫ਼ ਕੈਨੇਡਾ ਵੱਲੋਂ ਵਿਆਜ ਦਰਾਂ ਵਿਚ ਇਕ ਹੋਰ ਵਾਧਾ ਕੀਤਾ ਜਾ ਸਕਦਾ ਹੈ।
ਪਿਛਲੇ ਸਾਲ ਸਿਖਰ ‘ਤੇ ਪੁੱਜਣ ਮਗਰੋਂ ਗੈਸੋਲੀਨ ਦੀਆਂ ਕੀਮਤਾਂ ਵਿਚ ਤਕਰੀਬਨ 18 ਫ਼ੀ ਸਦੀ ਕਮੀ ਆ ਚੁੱਕੀ ਹੈ ਪਰ ਰਹਿਣ-ਸਹਿਣ ਲਈ ਜ਼ਰੂਰੀ ਹੋਰ ਵਸਤਾਂ ਸਸਤੀਆਂ ਨਹੀਂ ਹੋਈਆਂ। ਜਿਵੇਂ ਖਾਣ-ਪੀਣ ਵਾਲੀਆਂ ਵਸਤਾਂ ਨੇ ਪਰੇਸ਼ਾਨ ਕੀਤਾ ਹੋਇਆ ਹੈ, ਉਸੇ ਤਰਾਂ ਮੌਰਗੇਜ ਦਰਾਂ ਵੀ ਮੁਸੀਬਤ ਬਣ ਚੁੱਕੀਆਂ ਹਨ। ਮੌਰਗੇਜ ਇੰਟਰਸਟ ਕੌਂਸਟ ਇੰਡੈਕਸ ਵਧ ਕੇ 29.9 ਫ਼ੀ ਸਦੀ ਹੋ ਗਿਆ ਅਤੇ ਇਹ ਹੁਣ ਤੱਕ ਦਾ ਸਭ ਤੋਂ ਤੇਜ਼ ਵਾਧਾ ਮੰਨਿਆ ਜਾ ਰਿਹਾ ਹੈ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
