ਨਿਊਜ਼ ਡੈਸਕ: ਪੱਛਮੀ ਨੇਪਾਲ ਵਿੱਚ ਤਿੱਬਤੀ ਸਰਹੱਦ ਨੇੜੇ ਹਿਮਲੁੰਗ ਹਿਮਾਲ ਦੇ ਬੇਸ ਕੈਂਪ ‘ਤੇ ਬਰਫ਼ ਦਾ ਤੋਦਾ ਡਿੱਗਿਆ ਹੈ। ਇਸ ਘਟਨਾ ਵਿੱਚ ਫਸਣ ਤੋਂ ਬਾਅਦ ਘੱਟੋ-ਘੱਟ 10 ਲੋਕ ਲਾਪਤਾ ਹੋ ਗਏ ਹਨ। ਪ੍ਰਬੰਧਕ ਮਿੰਗਮਾ ਗਯਾਲਜੇ ਸ਼ੇਰਪਾ ਨੇ ਪੁਸ਼ਟੀ ਕੀਤੀ ਹੈ ਕਿ ਲਾਪਤਾ ਹੋਏ ਲੋਕਾਂ ਵਿੱਚ ਉਨ੍ਹਾਂ ਦੇ ਰਸੋਈ ਅਮਲੇ ਦੇ ਦੋ ਮੈਂਬਰ ਵੀ ਸ਼ਾਮਿਲ ਹਨ।ਉਨ੍ਹਾਂ ਕਿਹਾ, “ਬਰਫ਼ ਦਾ ਤੋਦਾ ਐਤਵਾਰ ਸਵੇਰੇ ਡਿੱਗਿਆ।” ਮਿੰਗਮਾ ਗਿਆਲਜੇ ਸ਼ੇਰਪਾ ਅਨੁਸਾਰ, ਪਿਛਲੇ ਹਫ਼ਤੇ ਮੌਸਮ ਸਬੰਧੀ ਚੇਤਾਵਨੀ ਜਾਰੀ ਹੋਣ ਤੋਂ ਬਾਅਦ ਮੁਹਿੰਮ ਅਤੇ ਰੱਸੀਆਂ ਲਗਾਉਣ ਵਾਲੀਆਂ ਟੀਮਾਂ ਨੇ ਪਹਾੜੀ ਢਲਾਣਾਂ ਨੂੰ ਖਾਲੀ ਕਰ ਦਿੱਤਾ ਸੀ, ਹਾਲਾਂਕਿ ਕੁਝ ਵਿਅਕਤੀ ਅਣਮੰਨੇ ਮਨ ਨਾਲ ਉੱਥੇ ਹੀ ਰੁਕ ਗਏ ਸਨ।
ਦਰਅਸਲ, ਪਹਾੜੀ ਖੇਤਰ ਵਿੱਚ ਕਈ ਦਿਨਾਂ ਤੱਕ ਪਈ ਭਾਰੀ ਬਰਫ਼ਬਾਰੀ ਕਾਰਨ ਪਰਬਤ-ਆਰੋਹੀਆਂ ਨੂੰ ਆਪਣੀ ਚੜ੍ਹਾਈ ਅਧਵਾਟੇ ਛੱਡਣੀ ਪਈ। ਐਤਵਾਰ ਨੂੰ ਆਏ ਬਰਫ਼ ਦੇ ਤੋਦੇ (ਐਵਲਾਂਚ) ਦੀ ਲਪੇਟ ਵਿੱਚ ਆ ਕੇ ਲਾਪਤਾ ਹੋਏ ਵਿਅਕਤੀ ਵੱਖ-ਵੱਖ ਮੁਹਿੰਮ ਕੰਪਨੀਆਂ ਨਾਲ ਸਬੰਧਿਤ ਹਨ। ਮਨਾਂਗ ਜ਼ਿਲ੍ਹੇ ਵਿੱਚ ਸਥਿਤ 7,126 ਮੀਟਰ ਉੱਚੇ ‘ਹਿਮਲੁੰਗ ਹਿਮਾਲ’ ਲਈ ਹੈਲੀਕਾਪਟਰ ਉਡਾਣਾਂ ਵਾਸਤੇ ਵਾਧੂ ਪਰਮਿਟਾਂ ਦੀ ਲੋੜ ਹੁੰਦੀ ਹੈ, ਜਿਸ ਨਾਲ ਇਸ ਪਹਾੜ ਤੱਕ ਪਹੁੰਚਣਾ ਮੁਸ਼ਕਲ ਹੋ ਜਾਂਦਾ ਹੈ। 7,126 ਮੀਟਰ ਉੱਚੀ ਇਹ ਚੋਟੀ ਉੱਚਾਈ ਵਾਲੇ ਖੇਤਰਾਂ ਦੀਆਂ ਚੁਣੌਤੀਆਂ ਦਾ ਸਾਹਮਣਾ ਕਰਨ ਦੇ ਚਾਹਵਾਨ ਪਰਬਤ-ਆਰੋਹੀਆਂ ਲਈ ਇੱਕ ਮਸ਼ਹੂਰ ਟਿਕਾਣਾ ਹੈ।
ਇਹ ਘਟਨਾ ਅਜਿਹੇ ਸਮੇਂ ਵਾਪਰੀ ਹੈ ਜਦੋਂ ਬੰਗਾਲ ਦੀ ਖਾੜੀ ਉੱਤੇ ਬਣੇ ਘੱਟ ਦਬਾਅ ਵਾਲੇ ਸਿਸਟਮ ਕਾਰਨ ਪਹਾੜਾਂ ਵਿੱਚ ਭਾਰੀ ਬਰਫ਼ਬਾਰੀ ਅਤੇ ਨੇਪਾਲ ਦੇ ਪਹਾੜੀ ਤੇ ਮੈਦਾਨੀ ਇਲਾਕਿਆਂ ਵਿੱਚ ਲਗਾਤਾਰ ਮੀਂਹ ਪੈ ਰਿਹਾ ਹੈ। ਮੀਂਹ ਅਤੇ ਬਰਫ਼ਬਾਰੀ ਨੇ ਦੇਸ਼ ਦੇ ਕਈ ਹਿੱਸਿਆਂ ਨੂੰ ਪ੍ਰਭਾਵਿਤ ਕੀਤਾ ਹੈ। ਸ਼ੁੱਕਰਵਾਰ ਤੋਂ ਹੀ ਨੇਪਾਲ ਵਿੱਚ ਮੌਸਮ ਖਰਾਬ ਚੱਲ ਰਿਹਾ ਹੈ, ਜਿਸ ਕਾਰਨ ਸੜਕੀ ਆਵਾਜਾਈ ਵਿੱਚ ਵਿਘਨ ਪਿਆ ਹੈ ਅਤੇ ਸਥਾਨਕ ਪ੍ਰਸ਼ਾਸਨ ਨੂੰ ਕਈ ਹਿੱਸਿਆਂ ਵਿੱਚ ਆਵਾਜਾਈ ਬੰਦ ਕਰਨ ਲਈ ਮਜਬੂਰ ਹੋਣਾ ਪਿਆ ਹੈ।
ਸੈਰ-ਸਪਾਟਾ ਅਧਿਕਾਰੀਆਂ ਨੇ ਖਰਾਬ ਹੁੰਦੇ ਮੌਸਮ ਦੇ ਮੱਦੇਨਜ਼ਰ ਟ੍ਰੈਕਰਾਂ ਅਤੇ ਪਰਬਤਾਰੋਹੀਆਂ ਨੂੰ ਆਪਣੀਆਂ ਗਤੀਵਿਧੀਆਂ ਰੋਕਣ ਦੀ ਅਪੀਲ ਕੀਤੀ ਹੈ। ਸੈਰ-ਸਪਾਟਾ ਵਿਭਾਗ ਨੇ ਵੀ ਇੱਕ ਚਿਤਾਵਨੀ ਜਾਰੀ ਕਰਕੇ ਸੈਰ-ਸਪਾਟਾ ਗਤੀਵਿਧੀਆਂ ਨੂੰ ਮੁਅੱਤਲ ਕਰਨ ਦੀ ਸਲਾਹ ਦਿੱਤੀ ਹੈ। ਮੌਸਮ ਦੇ ਖਰਾਬ ਹੋਣ ਦਾ ਇਹ ਦੌਰ ਪਿਛਲੇ ਮਹੀਨੇ ਰਾਸੁਵਾ ਵਿੱਚ ਆਏ ਭਿਆਨਕ ਹੜ੍ਹਾਂ ਤੋਂ ਬਾਅਦ ਆਇਆ ਹੈ, ਜਿਨ੍ਹਾਂ ਵਿੱਚ 1,400 ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਗਈ ਸੀ ਅਤੇ 5,000 ਤੋਂ ਵੱਧ ਲੋਕ ਲਾਪਤਾ ਹੋ ਗਏ ਸਨ।
