ਪਿਛਲੇ ਕੁਝ ਸਾਲਾਂ ਵਿੱਚ ਭਾਰਤ ਦੇ ਮੱਧ ਵਰਗ ਵਿੱਚ ਵਿਦੇਸ਼ ਘੁੰਮਣ ਦਾ ਰੁਝਾਨ ਤੇਜ਼ੀ ਨਾਲ ਵਧਿਆ ਹੈ। ਹੁਣ ਵਿਦੇਸ਼ ਜਾਣ ਵਾਲਿਆਂ ਵਿੱਚ ਸਿਰਫ਼ ਨੌਕਰੀ ਜਾਂ ਰੁਜ਼ਗਾਰ ਲਈ ਜਾਣ ਵਾਲੇ ਲੋਕ ਹੀ ਨਹੀਂ, ਸਗੋਂ ਆਪਣੀ ਕਮਾਈ ਨਾਲ ਛੁੱਟੀਆਂ ਮਨਾਉਣ ਵਾਲੇ ਆਮ ਪਰਿਵਾਰ ਵੀ ਸ਼ਾਮਲ ਹਨ। ਛੋਟੇ ਸ਼ਹਿਰਾਂ ਅਤੇ ਮੱਧ ਵਰਗ ਨਾਲ ਸਬੰਧਤ ਲੋਕ ਵੀ ਹੁਣ ਵਿਦੇਸ਼ੀ ਟੂਰ ਲਈ ਬਜਟ ਬਣਾ ਰਹੇ ਹਨ ਅਤੇ ਆਪਣੇ ਮਨਪਸੰਦ ਡੈਸਟਿਨੇਸ਼ਨ ਚੁਣ ਰਹੇ ਹਨ।
ਕਰੋੜਾਂ ਭਾਰਤੀ ਕਰ ਰਹੇ ਵਿਦੇਸ਼ ਯਾਤਰਾ
ਟੂਰਿਜ਼ਮ ਇੰਡਸਟਰੀ ਦੇ ਅੰਕੜਿਆਂ ਮੁਤਾਬਕ 2026 ਵਿੱਚ ਦਸੰਬਰ ਤੱਕ ਕਰੀਬ 4 ਤੋਂ 5 ਕਰੋੜ ਭਾਰਤੀਆਂ ਦੇ ਵਿਦੇਸ਼ ਜਾਣ ਦੀ ਉਮੀਦ ਹੈ। ਜਨਵਰੀ ਤੋਂ ਜੂਨ ਤੱਕ ਹੀ 1.46 ਕਰੋੜ ਭਾਰਤੀ ਵਿਦੇਸ਼ ਗਏ, ਜਿਨ੍ਹਾਂ ਵਿੱਚ ਛੁੱਟੀਆਂ ਮਨਾਉਣ ਅਤੇ ਰੁਜ਼ਗਾਰ ਲਈ ਜਾਣ ਵਾਲੇ ਲੋਕ ਸ਼ਾਮਲ ਹਨ। 2025 ਵਿੱਚ ਇਹ ਗਿਣਤੀ ਲਗਭਗ 3.27 ਤੋਂ 3.9 ਕਰੋੜ ਦੇ ਵਿਚਕਾਰ ਰਹੀ ਸੀ। ਇਨ੍ਹਾਂ ਵਿੱਚ ਕਰੀਬ 1.4 ਕਰੋੜ ਲੋਕ ਟੂਰਿਸਟ ਵੀਜ਼ਾ ’ਤੇ ਛੁੱਟੀਆਂ ਮਨਾਉਣ ਗਏ ਸਨ।
ਹੁਣ ਕਈ ਲੋਕ ਟ੍ਰੈਵਲ ਏਜੰਸੀ ਦੇ ਪੈਕੇਜ ਦੀ ਬਜਾਏ ਆਪਣੀ ਯਾਤਰਾ ਖੁਦ ਪਲਾਨ ਕਰਦੇ ਹਨ। ਉਹ ਵੀਜ਼ਾ, ਫਲਾਈਟ ਅਤੇ ਹੋਟਲ ਦੀ ਬੁਕਿੰਗ ਆਨਲਾਈਨ ਕਰਦੇ ਹਨ ਅਤੇ ਗੂਗਲ, ਟ੍ਰੈਵਲ ਬਲੌਗ ਤੇ ਵੀਡੀਓਜ਼ ਰਾਹੀਂ ਡੈਸਟਿਨੇਸ਼ਨ ਬਾਰੇ ਜਾਣਕਾਰੀ ਲੈਂਦੇ ਹਨ।
ਸਾਊਥ-ਈਸਟ ਏਸ਼ੀਆ ਬਣਿਆ ਪਸੰਦੀਦਾ
2026 ਵਿੱਚ ਭਾਰਤੀ ਯਾਤਰੀਆਂ ਦੀ ਪਸੰਦ ਵਿੱਚ ਵੀ ਬਦਲਾਅ ਦੇਖਣ ਨੂੰ ਮਿਲਿਆ ਹੈ। ਲੇਖ ਮੁਤਾਬਕ ਹੁਣ ਵੱਧ ਲੋਕ ਵੀਅਤਨਾਮ, ਮਲੇਸ਼ੀਆ, ਇੰਡੋਨੇਸ਼ੀਆ ਅਤੇ ਥਾਈਲੈਂਡ ਵਰਗੇ ਦੇਸ਼ਾਂ ਵੱਲ ਜਾ ਰਹੇ ਹਨ। ਯੂਰਪ ਦਾ ਟੂਰ ਮਹਿੰਗਾ ਹੋਣ ਕਾਰਨ ਅਤੇ ਕੁਝ ਹੋਰ ਅੰਤਰਰਾਸ਼ਟਰੀ ਹਾਲਾਤਾਂ ਦੇ ਚਲਦਿਆਂ ਸਾਊਥ-ਈਸਟ ਏਸ਼ੀਆਈ ਦੇਸ਼ਾਂ ਵੱਲ ਰੁਝਾਨ ਵਧਿਆ ਹੈ।
ਵੀਅਤਨਾਮ ਨੂੰ ਬਜਟ-ਫ੍ਰੈਂਡਲੀ ਅਤੇ ਖੂਬਸੂਰਤ ਡੈਸਟਿਨੇਸ਼ਨ ਵਜੋਂ ਪਸੰਦ ਕੀਤਾ ਜਾ ਰਿਹਾ ਹੈ। ਇੰਡੋਨੇਸ਼ੀਆ ਵਿੱਚ ਵੀ ਕਈ ਯਾਤਰੀ ਸਿੱਧੇ ਬਾਲੀ ਜਾਣਾ ਪਸੰਦ ਕਰਦੇ ਹਨ। ਥਾਈਲੈਂਡ ਵੀ ਅਜੇ ਭਾਰਤੀ ਸੈਲਾਨੀਆਂ ਦੀ ਪਸੰਦੀਦਾ ਲਿਸਟ ਵਿੱਚ ਬਣਿਆ ਹੋਇਆ ਹੈ।
ਕੋਰੋਨਾ ਤੋਂ ਬਾਅਦ ਵਿਦੇਸ਼ ਯਾਤਰਾ ’ਚ ਤੇਜ਼ੀ
2019 ਵਿੱਚ ਕਰੀਬ 2.61 ਕਰੋੜ ਭਾਰਤੀ ਵਿਦੇਸ਼ ਗਏ ਸਨ। ਕੋਰੋਨਾ ਦੌਰਾਨ ਇਹ ਗਿਣਤੀ ਘਟੀ ਅਤੇ 2022 ਵਿੱਚ ਲਗਭਗ 2.16 ਕਰੋੜ ਰਹੀ। ਇਸ ਤੋਂ ਬਾਅਦ 2023 ਵਿੱਚ ਇਹ ਵਧ ਕੇ 2.78 ਕਰੋੜ ਅਤੇ 2024 ਵਿੱਚ 3.08 ਕਰੋੜ ਹੋ ਗਈ।
ਲੇਖ ਵਿੱਚ ਵਿਦੇਸ਼ ਮੰਤਰਾਲੇ ਦੇ ਹਵਾਲੇ ਨਾਲ ਦੱਸਿਆ ਗਿਆ ਹੈ ਕਿ ਵਿਦੇਸ਼ ਜਾਣ ਵਾਲੇ ਭਾਰਤੀਆਂ ਵਿੱਚ 43.5 ਫ਼ੀਸਦੀ ਲੋਕ ਛੁੱਟੀਆਂ ਮਨਾਉਣ ਲਈ, ਜਦਕਿ 34.1 ਫ਼ੀਸਦੀ ਪਰਿਵਾਰਕ ਮੈਂਬਰਾਂ ਨੂੰ ਮਿਲਣ ਲਈ ਯਾਤਰਾ ਕਰਦੇ ਹਨ।
ਘੱਟ ਬਜਟ ਵਾਲੇ ਟੂਰ ਬਣੇ ਖਿੱਚ ਦਾ ਕੇਂਦਰ
ਪਾਸਪੋਰਟ ਅਤੇ ਲਗਭਗ 25 ਹਜ਼ਾਰ ਤੋਂ 2 ਲੱਖ ਰੁਪਏ ਤੱਕ ਦੇ ਬਜਟ ਨਾਲ ਭਾਰਤੀ ਯਾਤਰੀ ਨੇਪਾਲ ਤੋਂ ਇੰਡੋਨੇਸ਼ੀਆ ਤੱਕ ਵੱਖ-ਵੱਖ ਥਾਵਾਂ ਦੀ ਯਾਤਰਾ ਕਰ ਰਹੇ ਹਨ। ਨੇਪਾਲ ਅਤੇ ਭੂਟਾਨ ਲਈ ਭਾਰਤੀ ਨਾਗਰਿਕਾਂ ਦੇ ਯਾਤਰਾ ਦਸਤਾਵੇਜ਼ਾਂ ਅਤੇ ਪਰਮਿਟ ਦੇ ਨਿਯਮ ਵੱਖਰੇ ਹਨ। ਭੂਟਾਨ ਵਿੱਚ ਸਸਟੇਨੇਬਲ ਡਿਵੈਲਪਮੈਂਟ ਫੀਸ ਕਾਰਨ ਯਾਤਰਾ ਦਾ ਖਰਚਾ ਵਧ ਸਕਦਾ ਹੈ।
ਇਸੇ ਕਾਰਨ ਕਈ ਯਾਤਰੀ ਆਪਣੇ ਬਜਟ ਵਿੱਚ ਥਾਈਲੈਂਡ, ਕਾਂਬੋਡੀਆ ਅਤੇ ਹੋਰ ਸਾਊਥ-ਈਸਟ ਏਸ਼ੀਆਈ ਦੇਸ਼ਾਂ ਨੂੰ ਵੀ ਸ਼ਾਮਲ ਕਰ ਰਹੇ ਹਨ। ਕਾਂਬੋਡੀਆ ਦਾ ਅੰਕੋਰਵਾਟ ਮੰਦਰ ਵੀ ਅਜਿਹੇ ਟੂਰ ਪੈਕੇਜਾਂ ਦਾ ਇੱਕ ਪ੍ਰਮੁੱਖ ਆਕਰਸ਼ਣ ਬਣਿਆ ਹੋਇਆ ਹੈ।
ਮੱਧ ਵਰਗ ਦੀ ਵਧਦੀ ਖਰੀਦ ਸਮਰੱਥਾ ਅਤੇ ਆਸਾਨ ਆਨਲਾਈਨ ਟ੍ਰੈਵਲ ਪਲਾਨਿੰਗ ਨਾਲ ਭਾਰਤ ਵਿੱਚ ਆਊਟਬਾਊਂਡ ਟੂਰਿਜ਼ਮ ਦਾ ਰੁਝਾਨ ਲਗਾਤਾਰ ਵਧ ਰਿਹਾ ਹੈ।
