ਇਕਵਾਡੋਰ, ਪੇਰੂ ‘ਚ 6.8 ਤੀਬਰਤਾ ਦਾ ਭੂਚਾਲ, 12 ਲੋਕਾਂ ਦੀ ਮੌਤ

ਸ਼ਨੀਵਾਰ ਨੂੰ ਪੇਰੂ ਅਤੇ ਇਕਵਾਡੋਰ ਵਿਚ ਆਏ ਸ਼ਕਤੀਸ਼ਾਲੀ ਭੂਚਾਲ ਵਿਚ ਘੱਟ ਤੋਂ ਘੱਟ 12 ਲੋਕਾਂ ਦੀ ਮੌਤ ਹੋ ਗਈ। ਜਦਕਿ ਇਕ ਵਿਅਕਤੀ ਜ਼ਖਮੀ ਹੋ ਗਿਆ। ਇਸ ਦੇ ਨਾਲ ਹੀ ਭੂਚਾਲ ‘ਚ ਕਈ ਇਮਾਰਤਾਂ ਨੂੰ ਨੁਕਸਾਨ ਪਹੁੰਚਿਆ ਹੈ। ਇਕਵਾਡੋਰ ਦੇ ਮਾਚਲਾ ਅਤੇ ਕੁਏਨਕਾ ਵਰਗੇ ਸ਼ਹਿਰਾਂ ਵਿਚ ਨੁਕਸਾਨੀਆਂ ਗਈਆਂ ਇਮਾਰਤਾਂ, ਕੁਚਲੇ ਵਾਹਨ ਅਤੇ ਮਲਬਾ ਦੇਖਿਆ ਜਾ ਸਕਦਾ ਹੈ। ਹਾਲਾਂਕਿ ਬਚਾਅ ਅਧਿਕਾਰੀ ਮਦਦ ਲਈ ਪਹੁੰਚੇ। ਪਰ ਸਥਾਨਕ ਲੋਕ ਘਬਰਾ ਕੇ ਸੜਕਾਂ ‘ਤੇ ਆ ਗਏ।
ਸੰਯੁਕਤ ਰਾਜ ਭੂ-ਵਿਗਿਆਨਕ ਸਰਵੇਖਣ (USGS) ਨੇ ਭੂਚਾਲ ਦੀ ਤੀਬਰਤਾ 6.8 ਅਤੇ ਇਸਦੀ ਡੂੰਘਾਈ 41 ਮੀਲ (66 ਕਿਲੋਮੀਟਰ) ਮਾਪੀ। ਭੂਚਾਲ ਸਥਾਨਕ ਸਮੇਂ ਅਨੁਸਾਰ 12:12 (1712 GMT) ‘ਤੇ ਆਇਆ। ਅਧਿਕਾਰੀਆਂ ਨੇ ਦੱਸਿਆ ਕਿ ਇਸ ਦਾ ਕੇਂਦਰ ਪੇਰੂ ਦੀ ਸਰਹੱਦ ਦੇ ਨੇੜੇ ਬਾਲਾਓ ਦੀ ਇਕਵਾਡੋਰ ਦੀ ਨਗਰਪਾਲਿਕਾ ਵਿੱਚ ਸੀ। ਮੈਗਾਲੀ ਐਸਕੈਂਡਨ ਨੇ ਏਐਫਪੀ ਨੂੰ ਦੱਸਿਆ, “ਮੈਂ ਗਲੀ ਵਿੱਚ ਗਿਆ ਕਿਉਂਕਿ ਮੈਂ ਲੋਕਾਂ ਨੂੰ ਘਬਰਾਹਟ ਵਿੱਚ ਆਪਣੀਆਂ ਕਾਰਾਂ ਵਿੱਚੋਂ ਬਾਹਰ ਨਿਕਲਦੇ ਦੇਖਿਆ।

ਇਕਵਾਡੋਰ ਦੇ ਰਾਸ਼ਟਰਪਤੀ ਨੇ ਇਕ ਟਵੀਟ ‘ਚ ਕਿਹਾ, ”ਹੁਣ ਤੱਕ 12 ਮੌਤਾਂ (11 ਅਲ ਓਰੋ ਸੂਬੇ ‘ਚ ਅਤੇ ਇਕ ਅਜ਼ੂਏ ਸੂਬੇ ‘ਚ) ਦੀ ਖਬਰ ਮਿਲੀ ਹੈ।” ਸੋਸ਼ਲ ਮੀਡੀਆ ਰਿਪੋਰਟਾਂ ‘ਚ ਕਿਹਾ ਗਿਆ ਹੈ ਕਿ ਗੁਆਯਾਕਿਲ, ਕੁਇਟੋ, ਮਾਨਾਬੀ ਅਤੇ ਮਾਨਤਾ ਸਮੇਤ ਹੋਰ ਸ਼ਹਿਰਾਂ ‘ਚ ਵੀ ਭੂਚਾਲ ਦੇ ਝਟਕੇ ਮਹਿਸੂਸ ਕੀਤੇ ਗਏ। ਪੇਰੂ ਵਿੱਚ ਹੁਣ ਤੱਕ ਕਿਸੇ ਜਾਨੀ ਜਾਂ ਵੱਡੇ ਨੁਕਸਾਨ ਦੀ ਸੂਚਨਾ ਨਹੀਂ ਹੈ। ਇਕਵਾਡੋਰ ਦੇ ਰਾਸ਼ਟਰਪਤੀ ਗੁਲੇਰਮੋ ਲਾਸੋ ਨੇ ਟਵਿੱਟਰ ‘ਤੇ ਇਕ ਸੰਦੇਸ਼ ਵਿਚ ਲੋਕਾਂ ਨੂੰ “ਸ਼ਾਂਤ ਰਹਿਣ” ਦੀ ਅਪੀਲ ਕੀਤੀ।