ਨਵੀਂ ਦਿੱਲੀ: ਵਿਸ਼ਵ ਬੈਂਕ ਦੇ ਚੇਅਰਮੈਨ ਡੇਵਿਡ ਮਾਲਪਾਸ ਨੇ ਕਿਹਾ ਕਿ ਵਿਸ਼ਵ ਮਹਾਮਾਰੀ ਕੋਵਿਡ-19 ਦੇ ਸੰਕਟ ਦੌਰਾਨ ਗ਼ਰੀਬਾਂ ਅਤੇ ਲੋੜਵੰਦਾਂ ਲਈ ਭਾਰਤ ਦੀ ਸਹਾਇਤਾ ਵਿਲੱਖਣ ਹੈ। ਦੂਜੇ ਦੇਸ਼ਾਂ ਨੂੰ ਵੀ ਭਾਰਤ ਵਾਂਗ ਵਿਆਪਕ ਸਬਸਿਡੀਆਂ ਦੇਣ ਦੀ ਬਜਾਏ ਸਿੱਧਾ ਨਕਦੀ ਟ੍ਰਾਂਸਫਰ ਕਰਨਾ ਚਾਹੀਦਾ ਹੈ। ਵਿਸ਼ਵ ਬੈਂਕ ਵੱਲੋਂ ਮਾਲਪਾਸ ਨੇ ਬੁੱਧਵਾਰ ਨੂੰ ਇੱਕ ਖੋਜ ‘ਗ਼ਰੀਬੀ ਅਤੇ ਸਾਂਝੀ ਜਾਇਦਾਦ’ ਰਿਪੋਰਟ ਜਾਰੀ ਕਰਦਿਆਂ ਕਿਹਾ ਕਿ ਕੋਵਿਡ -19 ਗ਼ਰੀਬੀ ਘਟਾਉਣ ਵਿੱਚ ਵਿਸ਼ਵਵਿਆਪੀ ਤਰੱਕੀ ਦੇ ਯੁੱਗ ਦੇ ਅੰਤ ਵਿੱਚ ਆਇਆ ਹੈ।
ਡੇਵਿਡ ਮਾਲਪਾਸ ਨੇ ਕਿਹਾ ਕਿ ਗਰੀਬ ਲੋਕਾਂ ਨੂੰ ਮਹਾਂਮਾਰੀ ਦੀ ਸਭ ਤੋਂ ਵੱਡੀ ਕੀਮਤ ਚੁਕਾਉਣੀ ਪਈ ਹੈ। ਉਨ੍ਹਾਂ ਕਿਹਾ ਕਿ ਗਰੀਬ ਦੇਸ਼ਾਂ ਵਿੱਚ ਗਰੀਬੀ ਵਧੀ ਹੈ ਅਤੇ ਅਜਿਹੀਆਂ ਆਰਥਿਕਤਾਵਾਂ ਸਾਹਮਣੇ ਆਈਆਂ ਨੇ ਜੋ ਵਧੇਰੇ ਗੈਰ ਰਸਮੀ ਹਨ, ਸਮਾਜਿਕ ਸੁਰੱਖਿਆ ਪ੍ਰਣਾਲੀਆਂ ਜੋ ਕਮਜ਼ੋਰ ਹਨ ਅਤੇ ਵਿੱਤੀ ਪ੍ਰਣਾਲੀਆਂ ਜੋ ਘੱਟ ਵਿਕਸਤ ਹਨ। ਇਸ ਦੇ ਬਾਵਜੂਦ ਕਈ ਵਿਕਾਸਸ਼ੀਲ ਅਰਥਵਿਵਸਥਾਵਾਂ ਨੇ ਕੋਵਿਡ-19 ਦੌਰਾਨ ਸ਼ਾਨਦਾਰ ਸਫਲਤਾ ਹਾਸਲ ਕੀਤੀ।
ਮਾਲਪਾਸ ਨੇ ਕਿਹਾ ਕਿ ਭਾਰਤ ਨੇ ਡਿਜ਼ੀਟਲ ਕੈਸ਼ ਟ੍ਰਾਂਸਫਰ ਰਾਹੀਂ ਭੋਜਨ ਜਾਂ ਨਕਦੀ ਪ੍ਰਦਾਨ ਕਰਕੇ 85 ਪ੍ਰਤੀਸ਼ਤ ਪੇਂਡੂ ਪਰਿਵਾਰਾਂ ਦੀ ਮਹੱਤਵਪੂਰਨ ਮਦਦ ਕੀਤੀ ਹੈ। ਭਾਰਤ ਨੇ ਇਹ ਸਹੂਲਤ 69 ਫੀਸਦੀ ਆਰਥਿਕ ਤੌਰ ‘ਤੇ ਕਮਜ਼ੋਰ ਸ਼ਹਿਰੀ ਲੋਕਾਂ ਨੂੰ ਵੀ ਦਿੱਤੀ ਹੈ। ਇਸੇ ਤਰ੍ਹਾਂ, ਦੱਖਣੀ ਅਫਰੀਕਾ ਨੇ ਗ਼ਰੀਬਾਂ ਨੂੰ ਰਾਹਤ ਪ੍ਰਦਾਨ ਕਰਨ ਲਈ ਸਮਾਜਿਕ ਸੁਰੱਖਿਆ ‘ਤੇ $ 6 ਬਿਲੀਅਨ ਖਰਚ ਕੀਤੇ। ਇਸ ਦਾ ਦੋ ਕਰੋੜ 90 ਲੱਖ ਲੋਕਾਂ ਨੂੰ ਫਾਇਦਾ ਹੋਇਆ।
ਉਨ੍ਹਾਂ ਦੱਸਿਆ ਕਿ ਬ੍ਰਾਜ਼ੀਲ ਆਰਥਿਕ ਸੰਕੁਚਨ ਦੇ ਬਾਵਜੂਦ 2020 ਵਿੱਚ ਅਤਿ ਗਰੀਬੀ ਨੂੰ ਘਟਾਉਣ ਵਿੱਚ ਸਫਲ ਰਿਹਾ ਅਤੇ ਇਹ ਪਰਿਵਾਰ ਅਧਾਰਤ ਡਿਜੀਟਲ ਨਕਦ ਟ੍ਰਾਂਸਫਰ ਪ੍ਰਣਾਲੀ ਦੁਆਰਾ ਸੰਭਵ ਹੋਇਆ ਹੈ। ਮਾਲਪਾਸ ਨੇ ਕਿਹਾ ਕਿ ਵੱਡੀ ਸਬਸਿਡੀਆਂ ਦੀ ਬਜਾਏ ਟਾਰਗੇਟ ਕੈਸ਼ ਟ੍ਰਾਂਸਫਰ ਦੀ ਚੋਣ ਕਰੋ। ਇਹ ਗਰੀਬ ਅਤੇ ਕਮਜ਼ੋਰ ਸਮੂਹਾਂ ਦੀ ਸਹਾਇਤਾ ਦੇ ਮਾਮਲੇ ਵਿੱਚ ਵਧੇਰੇ ਪ੍ਰਭਾਵਸ਼ਾਲੀ ਹੈ। ਨਕਦ ਟ੍ਰਾਂਸਫਰ ‘ਤੇ 60 ਫੀਸਦੀ ਤੋਂ ਵੱਧ ਖਰਚੇ ਹੇਠਲੇ ਵਰਗ ਦੇ 40 ਫੀਸਦੀ ਲੋਕਾਂ ਤੱਕ ਪਹੁੰਚਦੇ ਹਨ। ਨਕਦ ਟ੍ਰਾਂਸਫਰ ਦਾ ਸਬਸਿਡੀਆਂ ਨਾਲੋਂ ਆਮਦਨੀ ਦੇ ਵਾਧੇ ‘ਤੇ ਵੱਡਾ ਪ੍ਰਭਾਵ ਪੈਂਦਾ ਹੈ।
