ਦਿੱਲੀ ਹਾਈ ਕੋਰਟ ਨੇ ਐਮਾਜ਼ੋਨ ‘ਤੇ Rooh Afza ਵੇਚਣ ‘ਤੇ ਲਗਾਈ ਪਾਬੰਦੀ

ਨਿਊਜ਼ ਡੈਸਕ: ਦਿੱਲੀ ਹਾਈ ਕੋਰਟ ਨੇ ਐਮਾਜ਼ੋਨ ਨੂੰ  ਪਾਕਿਸਤਾਨ ‘ਚ ਬਣੀ “ਰੂਹ ਅਫਜ਼ਾ” ਨੂੰ ਭਾਰਤ ‘ਚ ਆਪਣੇ ਪਲੇਟਫਾਰਮ ਅਤੇ ਆਪਣੀ ਲਿਸਟ ‘ਚੋਂ ਹਟਾਉਣ ਦੇ ਨਿਰਦੇਸ਼ ਦਿੱਤਾ ਹੈ। ਅਦਾਲਤ ਨੇ ਐਮਾਜ਼ਾਨ ਨੂੰ ਹੁਕਮ ਦਿੱਤਾ ਹੈ ਕਿ ਉਹ 48 ਘੰਟਿਆਂ ਦੇ ਅੰਦਰ ਨਾ ਸਿਰਫ ਰੂਹ ਅਫਜ਼ਾ ਨੂੰ ਆਪਣੀ ਸੂਚੀ ਤੋਂ ਹਟਾਏ, ਸਗੋਂ ਚਾਰ ਹਫ਼ਤਿਆਂ ਅੰਦਰ ਹਲਫ਼ਨਾਮਾ ਵੀ ਦਾਖ਼ਲ ਕਰਨ ਦੇ ਹੁਕਮ ਦਿੱਤੇ ਹਨ। ਭਾਰਤ ਦੀ ਗੈਰ-ਸਰਕਾਰੀ ਸੰਸਥਾ (NGO) ਹਮਦਰਦ ਨੈਸ਼ਨਲ ਫਾਊਂਡੇਸ਼ਨ ਨੇ ਪਟੀਸ਼ਨ ਦਾਇਰ ਕੀਤੀ ਸੀ ਕਿ ਈ-ਕਾਮਰਸ ਸਾਈਟ ਐਮਾਜ਼ੋਨ ‘ਤੇ ਵੇਚੀ ਜਾ ਰਹੀ ‘ਰੂਹ ਅਫਜ਼ਾ’ ਹਮਦਰਦ ਲੈਬਾਰਟਰੀ ਦੀ ਨਹੀਂ, ਸਗੋਂ ਪਾਕਿਸਤਾਨੀ ਕੰਪਨੀ ਦੀ ਹੈ, ਜਿਸ ਦੀ ਡਿਟੇਲ ਪੈਕੇਟ ‘ਤੇ ਨਹੀਂ ਹੈ।

ਅਦਾਲਤ ਨੇ ਕਿਹਾ ਕਿ ਰੂਹ ਅਫਜ਼ਾ ਇੱਕ ਅਜਿਹਾ ਉਤਪਾਦ ਹੈ ਜੋ ਭਾਰਤ ‘ਚ ਸੌ ਸਾਲਾਂ ਤੋਂ ਵਰਤਿਆ ਜਾ ਰਿਹਾ ਹੈ। ਇਹ FSSAI ਤੇ ਲੀਗਲ ਮੈਟਰੋਲੋਜੀ ਐਕਟ ਦੇ ਨਿਰਧਾਰਤ ਮਾਪਦੰਡਾਂ ਅਨੁਸਾਰ ਹੈ। ਅਦਾਲਤ ਨੇ ਕਿਹਾ ਕਿ ਇਹ ਹੈਰਾਨੀ ਦੀ ਗੱਲ ਹੈ ਕਿ ਐਮਾਜ਼ੋਨ ‘ਤੇ ਨਿਰਮਾਤਾ ਦਾ ਵੇਰਵਾ ਦਿੱਤੇ ਬਿਨਾਂ ਵਿਦੇਸ਼ੀ ਉਤਪਾਦ ਵੇਚਿਆ ਜਾ ਰਿਹਾ ਹੈ।

ਦੱਸ ਦਈਏ ਕਿ ਐਮਾਜ਼ਾਨ ਇੰਡੀਆ ਵੱਲੋਂ ਹਮਦਰਦ ਗਰੁੱਪ ਤੋਂ ਉਤਪਾਦਤ ਨਾ ਹੋਣ ਵਾਲੇ ਰੂਹ ਅਫਜ਼ਾ ਪ੍ਰੋਡਕਟ ਨੂੰ ਲਿਸਟਡ ਕੀਤਾ ਹੈ। ਇਸ ਸਬੰਧ ਵਿਚ ਹਮਦਰਦ ਨੈਸ਼ਨਲ ਫਾਊਂਡੇਸ਼ਨ (ਇੰਡੀਆ) ਅਤੇ ਹਮਦਰਦ ਦਾਵਾਖਾਨਾ ਨੇ ਦੋ ਕੰਪਨੀਆਂ ਐਮਾਜ਼ਾਨ ਇੰਡੀਆ ਲਿਮਟਿਡ ਅਤੇ ਮੈਸਰਜ਼ ਗੋਲਡਨ ਲੀਫ ਦੇ ਖਿਲਾਫ ਅਦਾਲਤ ਵਿਚ ਪਟੀਸ਼ਨ ਦਾਇਰ ਕੀਤੀ ਸੀ। ਇਹ ਮੁਕੱਦਮਾ ਇਸ ਉਤਪਾਦ ਅਤੇ ‘ਰੂਹ ਅਫਜ਼ਾ’ ਦੇ ਟ੍ਰੇਡਮਾਰਕ ਨਾਲ ਸਬੰਧਤ ਹੈ।