ਇਸਲਾਮਾਬਾਦ: ਪਾਕਿਸਤਾਨ ਦੇ ਰਾਸ਼ਟਰਪਤੀ ਆਸਿਫ ਅਲੀ ਜ਼ਰਦਾਰੀ ਦੇ ਇੱਕ ਬਿਆਨ ਨੇ ਨਵਾਂ ਵਿਵਾਦ ਖੜ੍ਹਾ ਕਰ ਦਿੱਤਾ ਹੈ। 14 ਅਗਸਤ ਨੂੰ ਇੱਕ ਸਮਾਗਮ ਦੌਰਾਨ ਜ਼ਰਦਾਰੀ ਨੇ ਪਾਕਿਸਤਾਨ ਵਿੱਚ ਰਹਿੰਦੀ ਹਿੰਦੂ ਆਬਾਦੀ ਨੂੰ ਲੈ ਕੇ ਟਿੱਪਣੀ ਕੀਤੀ ਅਤੇ ਕਿਹਾ ਕਿ ਪਾਕਿਸਤਾਨ ਵਿੱਚ 4 ਫੀਸਦੀ ਹਿੰਦੂ ਆਬਾਦੀ ਨੂੰ ਬਰਦਾਸ਼ਤ ਕੀਤਾ ਜਾ ਰਿਹਾ ਹੈ।
ਹਿੰਦੂ ਆਬਾਦੀ ਨੂੰ ਲੈ ਕੇ ਜ਼ਰਦਾਰੀ ਦਾ ਦਾਅਵਾ
ਜ਼ਰਦਾਰੀ ਨੇ ਕਿਹਾ ਕਿ ਪਾਕਿਸਤਾਨੀਆਂ ਦੀ ਸੋਚ ਦੂਜੇ ਧਰਮਾਂ ਦੇ ਲੋਕਾਂ ਨੂੰ ਬਰਦਾਸ਼ਤ ਕਰਨ ਵਾਲੀ ਹੈ। ਉਨ੍ਹਾਂ ਦਾਅਵਾ ਕੀਤਾ ਕਿ ਪਾਕਿਸਤਾਨ ਵਿੱਚ ਰਹਿਣ ਵਾਲੇ ਹਿੰਦੂ ਭਾਰਤ ਜਾਣ ਦੀ ਬਜਾਏ ਪਾਕਿਸਤਾਨ ਵਿੱਚ ਹੀ ਰਹਿਣਾ ਪਸੰਦ ਕਰਨਗੇ।
ਜ਼ਰਦਾਰੀ ਨੇ ਭਾਰਤ ਅਤੇ ਪਾਕਿਸਤਾਨ ਦੀ ਸੋਚ ਵਿੱਚ ਫਰਕ ਦੱਸਦਿਆਂ ਕਿਹਾ ਕਿ ਭਾਰਤੀ ਅਖੰਡ ਭਾਰਤ ਵਿੱਚ ਵਿਸ਼ਵਾਸ ਰੱਖਦੇ ਹਨ, ਜਦਕਿ ਪਾਕਿਸਤਾਨ ਮੁਸਲਿਮ ਦੇਸ਼ ਹੈ। ਇਸ ਦੇ ਨਾਲ ਹੀ ਉਨ੍ਹਾਂ ਕਿਹਾ ਕਿ ਪਾਕਿਸਤਾਨ ਵਿੱਚ ਹਿੰਦੂਆਂ ਨੂੰ ਹੋਰ ਥਾਵਾਂ ਵਾਂਗ ਹੀ ਆਜ਼ਾਦੀ ਹਾਸਲ ਹੈ।
ਹਾਲਾਂਕਿ, ਪਾਕਿਸਤਾਨ ਦੀ ਹਿੰਦੂ ਆਬਾਦੀ ਨੂੰ ਲੈ ਕੇ ਜ਼ਰਦਾਰੀ ਵੱਲੋਂ ਦਿੱਤਾ ਗਿਆ 4 ਫੀਸਦੀ ਦਾ ਅੰਕੜਾ ਦੇਸ਼ ਦੀ 2023 ਦੀ ਜਨਗਣਨਾ ਦੇ ਅੰਕੜਿਆਂ ਨਾਲ ਮੇਲ ਨਹੀਂ ਖਾਂਦਾ।
2023 ਦੀ ਜਨਗਣਨਾ ਮੁਤਾਬਕ ਪਾਕਿਸਤਾਨ ਵਿੱਚ ਲਗਭਗ 52 ਲੱਖ ਹਿੰਦੂ ਰਹਿੰਦੇ ਹਨ। ਇਹ ਦੇਸ਼ ਦੀ ਕੁੱਲ ਆਬਾਦੀ ਦਾ ਕਰੀਬ 2.17 ਫੀਸਦੀ ਬਣਦਾ ਹੈ। ਇਸ ਤਰ੍ਹਾਂ ਜ਼ਰਦਾਰੀ ਵੱਲੋਂ ਦੱਸਿਆ ਗਿਆ 4 ਫੀਸਦੀ ਦਾ ਅੰਕੜਾ ਜਨਗਣਨਾ ਦੇ ਅੰਕੜਿਆਂ ਨਾਲੋਂ ਕਾਫੀ ਵੱਧ ਹੈ।
ਪਾਕਿਸਤਾਨ ਵਿੱਚ ਆਸਿਮ ਮੁਨੀਰ ਦਾ ਵਧਿਆ ਪ੍ਰਭਾਵ
ਜ਼ਰਦਾਰੀ ਦਾ ਇਹ ਬਿਆਨ ਅਜਿਹੇ ਸਮੇਂ ਸਾਹਮਣੇ ਆਇਆ ਹੈ ਜਦੋਂ ਪਾਕਿਸਤਾਨ ਵਿੱਚ ਸਿਆਸੀ ਅਸਥਿਰਤਾ ਬਣੀ ਹੋਈ ਹੈ। ਦੇਸ਼ ਦੀ ਸੱਤਾ ਵਿੱਚ ਆਸਿਮ ਮੁਨੀਰ ਦਾ ਪ੍ਰਭਾਵ ਵਧਣ ਦੀਆਂ ਗੱਲਾਂ ਵੀ ਸਾਹਮਣੇ ਆ ਰਹੀਆਂ ਹਨ।
ਖ਼ਬਰਾਂ ਮੁਤਾਬਕ, ਸਾਬਕਾ ਫੌਜੀ ਅਧਿਕਾਰੀ ਆਦਿਲ ਰਾਜਾ ਨੇ ਦਾਅਵਾ ਕੀਤਾ ਹੈ ਕਿ ਪਾਕਿਸਤਾਨ ਦੀ ਮੌਜੂਦਾ ਸਿਆਸੀ ਵਿਵਸਥਾ ਵਿੱਚ ਬਦਲਾਅ ਦੀ ਯੋਜਨਾ ’ਤੇ ਵਿਚਾਰ ਕੀਤਾ ਜਾ ਰਿਹਾ ਹੈ। ਇਸ ਤਹਿਤ ਮੁਨੀਰ ਨੂੰ ਰਾਸ਼ਟਰਪਤੀ ਅਤੇ ਮੋਹਸਿਨ ਨਕਵੀ ਨੂੰ ਪ੍ਰਧਾਨ ਮੰਤਰੀ ਬਣਾਏ ਜਾਣ ਦੀ ਸੰਭਾਵਨਾ ਦੱਸੀ ਗਈ ਹੈ।
ਜਿਸ ਸਮਾਗਮ ਵਿੱਚ ਦਿੱਤਾ ਬਿਆਨ
ਜ਼ਰਦਾਰੀ ਨੇ ਇਹ ਬਿਆਨ ਇਸਲਾਮਾਬਾਦ ਦੇ ਯਾਦਗਾਰ-ਏ-ਫਤਹ ਵਿੱਚ ਹੋਏ ਇੱਕ ਸਮਾਗਮ ਦੌਰਾਨ ਦਿੱਤਾ। ਇਹ ਸਥਾਨ ਭਾਰਤ ਨਾਲ 2025 ਵਿੱਚ ਹੋਏ ਮਿੰਨੀ-ਯੁੱਧ, ਜਿਸ ਨੂੰ ਜ਼ਰਦਾਰੀ ਨੇ ‘ਮਰਕਾ-ਏ-ਹਕ’ ਦਾ ਨਾਮ ਦਿੱਤਾ ਹੈ, ਵਿੱਚ ਪਾਕਿਸਤਾਨ ਦੀ ਕਥਿਤ ਜਿੱਤ ਦੀ ਯਾਦ ਵਿੱਚ ਬਣਾਇਆ ਗਿਆ ਹੈ।
