ਵਾਸ਼ਿੰਗਟਨ: ਭਾਰਤ ਤੋਂ ਲੱਖਾਂ ਅਰਮਾਨ ਲੈ ਕੇ, ਨੀਲਮ ਸ਼ਿੰਦੇ ਚਾਰ ਸਾਲ ਪਹਿਲਾਂ ਅਮਰੀਕਾ ਪਹੁੰਚੀ ਸੀ। ਪਰਿਵਾਰ ਨੂੰ ਛੱਡ ਕੇ ਇੰਨੀ ਦੂਰ ਜਾਣਾ ਆਸਾਨ ਨਹੀਂ ਹੁੰਦਾ, ਪਰ 35 ਸਾਲ ਦੀ ਨੀਲਮ ਨੇ ਆਪਣੇ ਸੁਪਨਿਆਂ ਨੂੰ ਸਾਕਾਰ ਕਰਨ ਲਈ ਹੌਸਲਾ ਦਿਖਾਇਆ ਅਤੇ ਅਮਰੀਕਾ ਵਿੱਚ ਨਵੀਂ ਜ਼ਿੰਦਗੀ ਦੀ ਸ਼ੁਰੂਆਤ ਕੀਤੀ।
ਉਹ ਉਥੇ ਮਾਸਟਰ ਆਫ਼ ਸਾਇੰਸ ਦੀ ਪੜ੍ਹਾਈ ਕਰ ਰਹੀ ਸੀ, ਅਤੇ ਸਿਰਫ਼ ਇੱਕ ਸਾਲ ਬਾਅਦ ਉਸਦਾ ਕੋਰਸ ਪੂਰਾ ਹੋਣ ਵਾਲਾ ਸੀ। 14 ਫਰਵਰੀ ਨੂੰ ਉਸਦਾ ਦਿਨ ਹੋਰ ਆਮ ਦਿਨਾਂ ਵਾਂਗ ਬੀਤ ਰਿਹਾ ਸੀ, ਸਭ ਕੁਝ ਆਮ ਵਾਂਗ ਹੀ ਲੱਗ ਰਿਹਾ ਸੀ। ਪਰ ਕੁਝ ਹੀ ਪਲਾਂ ਵਿੱਚ ਇੱਕ ਵੱਡਾ ਹਾਦਸਾ ਵਾਪਰ ਗਿਆ, ਜਿਸ ਕਾਰਨ ਨੀਲਮ ਕੋਮਾ ਵਿੱਚ ਚਲੀ ਗਈ।
ਨੀਲਮ ਦੇ ਪਰਿਵਾਰ ਮੁਤਾਬਕ, 14 ਫਰਵਰੀ ਦੀ ਸ਼ਾਮ ਉਹ ਸੈਰ ਕਰਨ ਨਿਕਲੀ ਸੀ, ਜਿਸ ਦੌਰਾਨ ਇਹ ਭਿਆਨਕ ਹਾਦਸਾ ਵਾਪਰ ਗਿਆ। ਪਰਿਵਾਰ ਨੇ ਦੱਸਿਆ ਕਿ ਇਹ ਇੱਕ ਹਿੱਟ-ਐਂਡ-ਰਨ ਕੇਸ ਸੀ, ਜਿੱਥੇ ਇੱਕ ਕਾਰ ਨੇ ਪਿੱਛੋਂ ਆ ਕੇ ਉਸਨੂੰ ਟੱਕਰ ਮਾਰੀ। ਇਸ ਕਾਰਨ ਉਸਦੇ ਦੋਵੇਂ ਹੱਥ, ਪੈਰ, ਸਿਰ ਅਤੇ ਛਾਤੀ ਨੂੰ ਗੰਭੀਰ ਨੁਕਸਾਨ ਹੋਇਆ।
ਹਾਦਸੇ ਤੋਂ ਤੁਰੰਤ ਬਾਅਦ, ਭਾਰਤੀ ਵਿਦਿਆਰਥਣ ਨੂੰ ਕੈਲੀਫ਼ੋਰਨੀਆ ਦੇ ਸੈਕਰਾਮੈਂਟੋ ਸ਼ਹਿਰ ਵਿੱਚ ਸਥਿਤ ਸੀ ਡੇਵਿਸ ਮੈਡੀਕਲ ਸੈਂਟਰ ਵਿੱਚ ਭਰਤੀ ਕਰਵਾਇਆ ਗਿਆ, ਜਿੱਥੇ ਆਈਸੀਯੂ ਵਿੱਚ ਉਸਦਾ ਇਲਾਜ ਜਾਰੀ ਹੈ।
ਪਿਤਾ ਨੂੰ ਮਿਲਿਆ ਵੀਜ਼ਾ
ਨੀਲਮ ਦੇ ਪਿਤਾ ਦਾ ਰੋ ਰੋ ਬੁਰਾ ਹਾਲ ਹੋਇਆ ਪਿਆ ਹੈ, ਉਹ ਸਿਰਫ਼ ਇੱਕ ਵਾਰ ਆਪਣੀ ਧੀ ਦੀ ਝਲਕ ਦੇਖਣਾ ਚਾਹੁੰਦੇ ਹਨ। ਅੱਜ ਉਨ੍ਹਾਂ ਨੂੰ ਅਮਰੀਕਾ ਜਾਣ ਲਈ ਵੀਜ਼ਾ ਮਿਲ ਗਿਆ ਹੈ। ਵੀਜ਼ਾ ਮਿਲਣ ਉਪਰੰਤ, ਉਨ੍ਹਾਂ ਨੇ ਭਰੀ ਅੱਖਾਂ ਨਾਲ ਕਿਹਾ, “ਕੱਲ੍ਹ ਮੈਂ ਆਪਣੀ ਧੀ ਨੂੰ ਮਿਲਾਂਗਾ।”
ਉਹ ਭਿਆਨਕ ਦਿਨ ਯਾਦ ਕਰਦੇ ਹੋਏ, ਨੀਲਮ ਦੇ ਪਰਿਵਾਰ ਨੇ ਦੱਸਿਆ ਕਿ 16 ਫਰਵਰੀ ਨੂੰ ਉਨ੍ਹਾਂ ਨੂੰ ਅਮਰੀਕਾ ਤੋਂ ਇੱਕ ਫ਼ੋਨ ਆਇਆ। ਇਹ ਖ਼ਬਰ ਅਜਿਹੀ ਸੀ ਕਿ ਪਰਿਵਾਰ ਅਜੇ ਤੱਕ ਵੀ ਇਸਨੂੰ ਪੂਰੀ ਤਰ੍ਹਾਂ ਸਵੀਕਾਰ ਨਹੀਂ ਕਰ ਪਾਇਆ।
ਪਰਿਵਾਰ ਨੂੰ ਵਿਸ਼ਵਾਸ ਨਹੀਂ ਹੋਇਆ ਕਿ ਉਨ੍ਹਾਂ ਦੀ ਧੀ , ਜੋ ਵੱਡੇ ਸੁਪਨੇ ਲੈ ਕੇ ਅਮਰੀਕਾ ਪੜ੍ਹਾਈ ਲਈ ਗਈ ਸੀ, ਅੱਜ ਕੋਮਾ ਵਿੱਚ ਪਈ ਹੈ। ਉਨ੍ਹਾਂ ਲਈ ਇਹ ਸੱਚਾਈ ਸਵੀਕਾਰ ਕਰਨੀ ਬਹੁਤ ਔਖੀ ਹੋ ਰਹੀ ਹੈ। ਨੀਲਮ ਦੇ ਪਿਤਾ ਦੀ ਸਿਰਫ਼ ਇੱਕੋ ਇੱਛਾ ਹੈ—ਉਹ ਜਲਦੀ ਤੋਂ ਜਲਦੀ ਅਮਰੀਕਾ ਪਹੁੰਚ ਕੇ ਆਪਣੀ ਧੀ ਨੂੰ ਵੇਖਣ।
ਨੋਟ: ਪੰਜਾਬੀ ਦੀਆਂ ਖ਼ਬਰਾਂ ਪੜ੍ਹਨ ਲਈ ਤੁਸੀਂ ਸਾਡੀ ਐਪ ਨੂੰ ਡਾਊਨਲੋਡ ਕਰ ਸਕਦੇ ਹੋ। ਜੇ ਤੁਸੀਂ ਵੀਡੀਓ ਵੇਖਣਾ ਚਾਹੁੰਦੇ ਹੋ ਤਾਂ Global Punjab TV ਦੇ YouTube ਚੈਨਲ ਨੂੰ Subscribe ਕਰੋ। ਤੁਸੀਂ ਸਾਨੂੰ ਫੇਸਬੁੱਕ, ਟਵਿੱਟਰ ‘ਤੇ ਵੀ Follow ਕਰ ਸਕਦੇ ਹੋ। ਸਾਡੀ ਵੈੱਬਸਾਈਟ https://globalpunjabtv.com/ ‘ਤੇ ਜਾ ਕੇ ਵੀ ਹੋਰ ਖ਼ਬਰਾਂ ਨੂੰ ਪੜ੍ਹ ਸਕਦੇ ਹੋ।
