ਨਿਊਜ਼ ਡੈਸਕ: ਸਊਦੀ ਅਰਬ ਦੇ ‘ਨੈਸ਼ਨਲ ਅਰਲੀ ਵਾਰਨਿੰਗ ਪਲੇਟਫਾਰਮ’ ਵੱਲੋਂ ਸੰਭਾਵੀ ਖਤਰੇ ਬਾਰੇ ਜਾਰੀ ਕੀਤੇ ਗਏ ਚੇਤਾਵਨੀ ਸੰਦੇਸ਼ਾਂ ਤੋਂ ਬਾਅਦ ਮੱਕਾ ਅਤੇ ਸਊਦੀ ਅਰਬ ਦੇ ਕਈ ਹੋਰ ਹਿੱਸਿਆਂ ਵਿੱਚ ਅਲਰਟ ਜਾਰੀ ਕੀਤਾ ਗਿਆ ਹੈ। ਸਊਦੀ ਸਿਵਲ ਡਿਫੈਂਸ ਨੇ ਇਹ ਜਾਣਕਾਰੀ ਦਿੱਤੀ। ‘ਐਕਸ’ (X) ‘ਤੇ ਇੱਕ ਪੋਸਟ ਵਿੱਚ, ਸਊਦੀ ਸਿਵਲ ਡਿਫੈਂਸ ਡਾਇਰੈਕਟੋਰੇਟ ਨੇ ਕਿਹਾ, “ਨੈਸ਼ਨਲ ਅਰਲੀ ਵਾਰਨਿੰਗ ਪਲੇਟਫਾਰਮ ਨੇ ਮੱਕਾ ਸ਼ਹਿਰ ਵਿੱਚ ਸੰਭਾਵੀ ਖਤਰੇ ਬਾਰੇ ਇੱਕ ਅਲਰਟ ਜਾਰੀ ਕੀਤਾ ਹੈ,” ਅਤੇ ਨਾਲ ਹੀ ਨਿਵਾਸੀਆਂ ਲਈ ਹਦਾਇਤਾਂ ਵੀ ਜਾਰੀ ਕੀਤੀਆਂ।
ਹਾਲਾਂਕਿ, ਚੇਤਾਵਨੀ ਜਾਰੀ ਕਰਨ ਤੋਂ ਕੁਝ ਹੀ ਮਿੰਟਾਂ ਬਾਅਦ, ਵਿਭਾਗ ਨੇ ਇੱਕ ਪੋਸਟ ਵਿੱਚ ਦੱਸਿਆ ਕਿ ਮੱਕਾ ਸ਼ਹਿਰ, ਤਬੂਕ ਸੂਬੇ, ਜੇਦਾਹ ਗਵਰਨੋਰੇਟ ਅਤੇ ਯਾਨਬੂ ਗਵਰਨੋਰੇਟ ਨੂੰ ਦਰਪੇਸ਼ ਖਤਰਾ ਟਲ ਗਿਆ ਹੈ।
تم إطلاق إنذار من المنصة الوطنية للإنذار المبكر في حالات الطوارئ في مدينة مكة المكرمة للتحذير من خطر، اتبع الآتي:
A warning has been issued by the National Early Warning Platform in Mecca City to alert of a potential danger. Please follow the instructions below: https://t.co/8YtJcQ1zxb
— الدفاع المدني السعودي (@SaudiDCD) September 24, 2026
ਚੇਤਾਵਨੀ ਵਿੱਚ ਕੀ ਲਿਖਿਆ ਹੈ?
ਸਿਵਲ ਡਿਫੈਂਸ ਨੇ ਚਿਤਾਵਨੀ ਪ੍ਰਾਪਤ ਕਰਨ ਵਾਲੇ ਲੋਕਾਂ ਨੂੰ ਸ਼ਾਂਤ ਰਹਿਣ, ਅਧਿਕਾਰਤ ਹਦਾਇਤਾਂ ਦੀ ਪਾਲਣਾ ਕਰਨ, ਤੁਰੰਤ ਕਿਸੇ ਸੁਰੱਖਿਅਤ ਥਾਂ (ਜਿਵੇਂ ਕਿ ਕਿਸੇ ਇਮਾਰਤ ਦੇ ਅੰਦਰ ਜਾਂ ਖਿੜਕੀਆਂ ਤੋਂ ਦੂਰ ਅੰਦਰੂਨੀ ਕਮਰੇ ਵਿੱਚ) ਜਾਣ ਅਤੇ ਖਤਰਾ ਟਲਣ ਤੱਕ ਉੱਥੇ ਹੀ ਰਹਿਣ ਦੀ ਅਪੀਲ ਕੀਤੀ।
ਲੋਕਾਂ ਨੂੰ ਇਹ ਵੀ ਸਲਾਹ ਦਿੱਤੀ ਗਈ ਸੀ ਕਿ ਖਤਰਾ ਟਲਣ ਤੱਕ ਉਹ ਆਪਣੇ ਘਰਾਂ ਜਾਂ ਇਮਾਰਤਾਂ ਤੋਂ ਬਾਹਰ ਨਾ ਨਿਕਲਣ, ਖੁੱਲ੍ਹੀਆਂ ਥਾਵਾਂ, ਖਿੜਕੀਆਂ, ਕੱਚ, ਬਾਲਕੋਨੀਆਂ ਅਤੇ ਛੱਤਾਂ ਤੋਂ ਦੂਰ ਰਹਿਣ, ਅਤੇ ਭੀੜ-ਭੜੱਕੇ ਵਾਲੀਆਂ ਜਾਂ ਖਤਰਨਾਕ ਥਾਵਾਂ ‘ਤੇ ਜਾਣ ਤੋਂ ਗੁਰੇਜ਼ ਕਰਨ।
ਬਾਹਰ ਮੌਜੂਦ ਲੋਕਾਂ ਨੂੰ ਹਦਾਇਤ ਕੀਤੀ ਗਈ ਸੀ ਕਿ ਉਹ ਕਿਸੇ ਨੇੜਲੀ ਇਮਾਰਤ ਵਿੱਚ ਚਲੇ ਜਾਣ ਜਾਂ ਕਿਸੇ ਮਜ਼ਬੂਤ ਰੁਕਾਵਟ ਦੇ ਪਿੱਛੇ ਪਨਾਹ ਲੈਣ।
ਸਾਊਦੀ ਸਿਵਲ ਡਿਫੈਂਸ ਨੇ ਕਿਹਾ ਕਿ ਜੇਕਰ ਲੋਕਾਂ ਨੂੰ ਗੱਡੀ ਚਲਾਉਂਦੇ ਸਮੇਂ ਚੇਤਾਵਨੀ ਮਿਲਦੀ ਹੈ, ਤਾਂ ਉਨ੍ਹਾਂ ਨੂੰ ਗੱਡੀ ਸੜਕ ਦੇ ਕਿਨਾਰੇ ਖੜ੍ਹੀ ਕਰ ਦੇਣੀ ਚਾਹੀਦੀ ਹੈ ਅਤੇ ਪੁਲਾਂ ਤੇ ਉੱਚੀਆਂ ਇਮਾਰਤਾਂ ਤੋਂ ਦੂਰ ਰਹਿਣਾ ਚਾਹੀਦਾ ਹੈ।
ਸਿਵਲ ਡਿਫੈਂਸ ਨੇ ਲੋਕਾਂ ਨੂੰ ਖਤਰਨਾਕ ਥਾਵਾਂ ‘ਤੇ ਨਾ ਜਾਣ ਜਾਂ ਉੱਥੇ ਤਸਵੀਰਾਂ ਨਾ ਖਿੱਚਣ ਦੀ ਸਲਾਹ ਵੀ ਦਿੱਤੀ।
ਹੈਲਪਲਾਈਨ ਨੰਬਰ ਜਾਰੀ
ਸਊਦੀ ਸਿਵਲ ਡਿਫੈਂਸ ਦੇ ਦਿਸ਼ਾ-ਨਿਰਦੇਸ਼ਾਂ ਅਨੁਸਾਰ, ਲੋਕਾਂ ਨੂੰ ਸਲਾਹ ਦਿੱਤੀ ਗਈ ਹੈ ਕਿ ਜੇਕਰ ਉਹ ਮੱਕਾ, ਮਦੀਨਾ, ਰਿਆਦ ਜਾਂ ਪੂਰਬੀ ਪ੍ਰਾਂਤ ਵਿੱਚ ਕੋਈ ਖਤਰਾ ਦੇਖਦੇ ਹਨ ਤਾਂ 911 ‘ਤੇ ਸੰਪਰਕ ਕਰਨ, ਅਤੇ ਰਾਜ ਦੇ ਬਾਕੀ ਹਿੱਸਿਆਂ ਵਿੱਚ 998 ‘ਤੇ ਕਾਲ ਕਰਨ। ਅਧਿਕਾਰੀਆਂ ਨੇ ਲੋਕਾਂ ਨੂੰ ਅਧਿਕਾਰਤ ਚੈਨਲਾਂ ਰਾਹੀਂ ਜਾਰੀ ਹਦਾਇਤਾਂ ਦੀ ਪਾਲਣਾ ਕਰਨ ਦੀ ਵੀ ਅਪੀਲ ਕੀਤੀ।
