ਸਿੰਗਾਪੁਰ: ਸਿੰਗਾਪੁਰ ਵਿੱਚ ਇੱਕ ਅਜੀਬ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਪੁੰਨ ਦੇ ਕੰਮ ਦੀ ਨੀਅਤ ਨਾਲ ਕਬੂਤਰਾਂ ਨੂੰ ਦਾਣਾ ਪਾਉਣ ਵਾਲੀ ਇੱਕ ਬਜ਼ੁਰਗ ਔਰਤ ਨੂੰ ਕਾਨੂੰਨ ਦੀ ਉਲੰਘਣਾ ਦਾ ਦੋਸ਼ੀ ਠਹਿਰਾਇਆ ਗਿਆ। ਭਾਰਤੀ ਮੂਲ ਦੀ 70 ਸਾਲ ਦੀ ਸਨਮੁਗਮਨਾਥਨ ਸ਼ਾਮਲਾ ’ਤੇ ਸਿੰਗਾਪੁਰ ਦੇ ਵਨਜੀਵ ਐਕਟ ਦੇ ਤਹਿਤ ਜੰਗਲੀ ਪੰਛੀਆਂ ਨੂੰ ਖਾਣਾ ਦੇਣ ਦੇ ਦੋਸ਼ ਵਿੱਚ 1,200 ਸਿੰਗਾਪੁਰੀ ਡਾਲਰ (ਲਗਭਗ 930 ਅਮਰੀਕੀ ਡਾਲਰ) ਦਾ ਜੁਰਮਾਨਾ ਲਗਾਇਆ ਗਿਆ।
ਸ਼ਾਮਲਾ ਆਪਣੇ ਅਪਾਰਟਮੈਂਟ ਦੇ ਨੇੜੇ ਕਬੂਤਰਾਂ ਨੂੰ ਦਾਣਾ ਪਾਉਂਦੀ ਸੀ, ਜੋ ਭਾਰਤੀ ਸਭਿਆਚਾਰ ਵਿੱਚ ਪੰਛੀਆਂ ਅਤੇ ਜਾਨਵਰਾਂ ਦੀ ਸੇਵਾ ਦਾ ਹਿੱਸਾ ਮੰਨਿਆ ਜਾਂਦਾ ਹੈ। ਪਰ, ਸਿੰਗਾਪੁਰ ਵਿੱਚ ਇਹ ਕੰਮ ਗੈਰ-ਕਾਨੂੰਨੀ ਹੈ। ‘ਚੈਨਲ ਨਿਊਜ਼ ਏਸ਼ੀਆ’ ਦੀ ਰਿਪੋਰਟ ਮੁਤਾਬਕ, ਸ਼ਾਮਲਾ ਨੇ ਵਨਜੀਵ ਐਕਟ ਦੇ ਤਹਿਤ ਜੰਗਲੀ ਪੰਛੀਆਂ ਨੂੰ ਖਾਣਾ ਦੇਣ ਦੇ ਦੋ ਮਾਮਲਿਆਂ ਵਿੱਚ ਆਪਣੀ ਗਲਤੀ ਮੰਨ ਲਈ।
ਸਿੰਗਾਪੁਰ ਦੀ ਅਦਾਲਤ ਵਿੱਚ ਉਨ੍ਹਾਂ ’ਤੇ ਨੈਸ਼ਨਲ ਪਾਰਕਸ ਬੋਰਡ (ਐਨਪਾਰਕਸ) ਦੇ ਕਬੂਤਰ ਫੜਨ ਦੇ ਯਤਨਾਂ ਵਿੱਚ ਰੁਕਾਵਟ ਪਾਉਣ ਸਮੇਤ 11 ਦੋਸ਼ ਲਗਾਏ ਗਏ ਸਨ। 11 ਅਪ੍ਰੈਲ, 2023 ਨੂੰ, ਐਨਪਾਰਕਸ ਦੇ ਅਧਿਕਾਰੀਆਂ ਨੇ ਲੋਰੋਂਗ 4 ਤੋਆ ਪਾਯੋਹ ਵਿਖੇ ਉਨ੍ਹਾਂ ਦੇ ਘਰ ਨੇੜੇ ਉਨ੍ਹਾਂ ਨੂੰ ਕਬੂਤਰਾਂ ਨੂੰ ਦਾਣਾ ਪਾਉਂਦੇ ਵੇਖਿਆ ਅਤੇ ਅਜਿਹਾ ਕਰਨ ਤੋਂ ਮਨ੍ਹਾ ਕੀਤਾ, ਕਿਉਂਕਿ ਇਹ ਕਾਨੂੰਨੀ ਅਪਰਾਧ ਸੀ। ਇਸ ਦੇ ਬਾਵਜੂਦ, ਸ਼ਾਮਲਾ ਨੇ ਨਵੰਬਰ 2024 ਤੱਕ ਕਈ ਵਾਰ ਕਬੂਤਰਾਂ ਨੂੰ ਖਾਣਾ ਦਿੰਦੀ ਰਹੀ।
ਐਨਪਾਰਕਸ ਦੇ ਮੁਕੱਦਮੇਬਾਜ਼ ਲਿਮ ਚੋਂਗ ਹੁਈ ਨੇ ਦੱਸਿਆ ਕਿ 19 ਫਰਵਰੀ ਨੂੰ ਸ਼ਾਮਲਾ ਨੇ ਅਧਿਕਾਰੀਆਂ ਦੇ ਕਬੂਤਰ ਫੜਨ ਦੇ ਕੰਮ ਵਿੱਚ ਰੁਕਾਵਟ ਪਾਈ। ਅਦਾਲਤ ਨੇ ਚੇਤਾਵਨੀ ਦਿੱਤੀ ਕਿ ਜੇ ਜੁਰਮਾਨਾ ਨਾ ਭਰਿਆ ਗਿਆ, ਤਾਂ ਉਨ੍ਹਾਂ ਨੂੰ ਦੋ ਦਿਨ ਜੇਲ੍ਹ ਵਿੱਚ ਰਹਿਣਾ ਪਵੇਗਾ। ਇਸ ’ਤੇ ਸ਼ਾਮਲਾ ਨੇ ਕਿਹਾ ਕਿ ਉਨ੍ਹਾਂ ਦੀ ਸਿਹਤ ਜੇਲ੍ਹ ਵਿੱਚ ਰਹਿਣ ਲਈ ਠੀਕ ਨਹੀਂ ਹੈ। ਬਾਅਦ ਵਿੱਚ, ਉਨ੍ਹਾਂ ਨੇ ਬੁੱਧਵਾਰ ਨੂੰ ਪੂਰਾ ਜੁਰਮਾਨਾ ਅਦਾ ਕਰ ਦਿੱਤਾ।
