ਨਿਊਜ਼ ਡੈਸਕ: ਰੂਸ-ਯੂਕਰੇਨ ਜੰਗ ਵਿੱਚ ਅਮਰੀਕਾ ਸਣੇ ਕਈ ਪੱਛਮੀ ਦੇਸ਼ ਯੂਕਰੇਨ ਦੀ ਮਦਦ ਕਰ ਰਹੇ ਹਨ। ਯੂਕਰੇਨ ਨੂੰ ਪੱਛਮ ਤੋਂ ਲਗਾਤਾਰ ਹਥਿਆਰ ਅਤੇ ਪੈਸਾ ਦਿੱਤਾ ਜਾ ਰਿਹਾ ਹੈ ਅਤੇ ਇਹ ਮਦਦ ਰੂਸ ਦੇ ਸ਼ਹਿਰਾਂ ‘ਤੇ ਤਬਾਹੀ ਮਚਾ ਰਹੀ ਹੈ। ਯੂਕਰੇਨ ਹਰ ਰੋਜ਼ ਰੂਸ ‘ਤੇ ਡਰੋਨ ਅਤੇ ਰਾਕੇਟ ਨਾਲ ਹਮਲੇ ਕਰ ਰਿਹਾ ਹੈ, ਜਿਸ ਕਾਰਨ ਜੰਗ ਲੰਬੀ ਹੁੰਦੀ ਜਾ ਰਹੀ ਹੈ।
ਰੂਸ ਦੇ ਸਰਕਾਰੀ ਟੀਵੀ ਨਾਲ ਇੱਕ ਇੰਟਰਵਿਊ ਵਿੱਚ, ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਚੇਤਾਵਨੀ ਦਿੱਤੀ, “ਦੇਸ਼ ਦਾ ਰੱਖਿਆ ਮੰਤਰਾਲਾ ਜਵਾਬ ਦੇਣ ਲਈ ਇੱਕ ਰਣਨੀਤੀ ਤਿਆਰ ਕਰ ਰਿਹਾ ਹੈ ਜੇਕਰ ਪੱਛਮੀ ਦੇਸ਼ਾਂ ਨੇ ਰੂਸ ‘ਤੇ ਲੰਬੀ ਦੂਰੀ ਦੀਆਂ ਮਿਜ਼ਾਈਲਾਂ ਨਾਲ ਹਮਲਾ ਕਰਨ ਵਿੱਚ ਮਦਦ ਕੀਤੀ ਤਾਂ ਕੀ ਕੀਤਾ ਜਾਵੇਗਾ।”
ਰੂਸ ਦੀ ਧਮਕੀ ਤੋਂ ਬਾਅਦ ਹੀ ਕੈਨੇਡਾ ਨੇ ਯੂਕਰੇਨੀ ਫੌਜ ਨੂੰ ਐਲਏਵੀ ਬਖਤਰਬੰਦ ਵਾਹਨ ਮੁਹੱਈਆ ਕਰਵਾਏ ਹਨ, ਜੋ ਸਿੱਧੇ ਲੜਾਈ ਵਿੱਚ ਯੂਕਰੇਨੀ ਫੌਜ ਨੂੰ ਮਜ਼ਬੂਤ ਕਰਨਗੇ। ਬਖਤਰਬੰਦ ਵਾਹਨਾਂ ਬਾਰੇ ਜਾਣਕਾਰੀ ਦਿੰਦੇ ਹੋਏ, ਕੈਨੇਡਾ ਵਿੱਚ ਕੈਨੇਡੀਅਨ ਆਰਮਡ ਫੋਰਸਿਜ਼ (ਸੀਏਏਐਫ) ਮਿਸ਼ਨ ਨੇ ਇਸ ਬਾਰੇ ਜਾਣਕਾਰੀ ਦਿੱਤੀ। “ਇਹ ਵਾਹਨ ਯੂਕਰੇਨ ਨੂੰ ਆਪਣੇ ਖੇਤਰ ਦੇ ਗੈਰ-ਕਾਨੂੰਨੀ ਹਮਲਿਆਂ ਤੋਂ ਬਚਾਉਣ ਵਿੱਚ ਸਹਾਇਤਾ ਕਰਨਗੇ।”
ਪੁਤਿਨ ਦੀ ਚਿਤਾਵਨੀ
ਪੁਤਿਨ ਨੇ ਆਪਣੇ ਬਿਆਨ ‘ਚ ਸਪੱਸ਼ਟ ਕੀਤਾ ਹੈ ਕਿ ਉਹ ਪੱਛਮ ਤੋਂ ਮਿਲਣ ਵਾਲੀ ਮਦਦ ‘ਤੇ ਕਾਰਵਾਈ ਕਰਨ ਦੀ ਤਿਆਰੀ ਕਰ ਰਹੇ ਹਨ। ਪੁਤਿਨ ਦੇ ਪੈਂਤੜੇ ਤੋਂ ਸਾਫ਼ ਹੈ ਕਿ ਜੇਕਰ ਯੂਕਰੇਨ ਪੱਛਮੀ ਹਥਿਆਰਾਂ ਦੀ ਮਦਦ ਨਾਲ ਰੂਸ ‘ਤੇ ਹਮਲੇ ਦਾ ਘੇਰਾ ਵਧਾਉਂਦਾ ਹੈ ਤਾਂ ਪੱਛਮੀ ਦੇਸ਼ ਸਿੱਧੇ ਤੌਰ ‘ਤੇ ਰੂਸ ਦੇ ਨਿਸ਼ਾਨੇ ‘ਤੇ ਬਣ ਸਕਦੇ ਹਨ।
ਰੂਸੀ ਅਧਿਕਾਰੀਆਂ ਨੇ ਮੰਨਿਆ ਹੈ ਕਿ ਯੁੱਧ ਆਪਣੇ ਤੀਜੇ ਸਾਲ ਵਿੱਚ ਦਾਖਲ ਹੋਣ ਤੋਂ ਬਾਅਦ ਹੁਣ ਆਪਣੇ ਸਭ ਤੋਂ ਖ਼ਤਰਨਾਕ ਪੜਾਅ ਵਿੱਚ ਦਾਖਲ ਹੋ ਗਿਆ ਹੈ, ਮਾਸਕੋ ਨੇ ਹਾਲ ਹੀ ਦੇ ਹਫ਼ਤਿਆਂ ਵਿੱਚ ਨਾਟੋ ਅਤੇ ਸਹਿਯੋਗੀਆਂ ਨੂੰ ਸੰਕੇਤ ਦਿੱਤਾ ਹੈ ਕਿ ਜੇ ਉਹ ਯੂਕਰੇਨ ਨੂੰ ਰੂਸ ‘ਤੇ ਘਾਤਕ ਮਿਜ਼ਾਈਲਾਂ ਨਾਲ ਹਮਲਾ ਕਰਨ ਦੀ ਇਜਾਜ਼ਤ ਦਿੰਦੇ ਹਨ ਤਾਂ ਕ੍ਰੇਮਲਿਨ ਇਸ ਨੂੰ ਇੱਕ ਵੱਡਾ ਵਾਧਾ ਸਮਝੇਗਾ।
ਕੈਨੇਡਾ ਨੂੰ ਹੋ ਸਕਦੈ ਵੱਡਾ ਨੁਕਸਾਨ
ਰੂਸ ਦੀ ਚਿਤਾਵਨੀ ਦੇ ਬਾਵਜੂਦ ਕੈਨੇਡਾ ਵੱਲੋਂ ਯੂਕਰੇਨ ਨੂੰ ਬਖਤਰਬੰਦ ਵਾਹਨ ਦਿੱਤੇ ਜਾਣ ਤੋਂ ਬਾਅਦ ਪੁਤਿਨ ਦਾ ਗੁੱਸਾ ਆਉਣਾ ਯਕੀਨੀ ਹੈ। ਰੂਸ ਪਹਿਲਾਂ ਹੀ ਧਮਕੀ ਦੇ ਚੁੱਕਾ ਹੈ ਕਿ ਉਹ ਨਾਟੋ ਦੇਸ਼ਾਂ ਦੀਆਂ ਜਾਇਦਾਦਾਂ ਨੂੰ ਨਿਸ਼ਾਨਾ ਬਣਾ ਸਕਦਾ ਹੈ।
ਇਹ ਨਵੀਂ ਮਦਦ ਕੈਨੇਡਾ ਵੱਲੋਂ ਯੂਕਰੇਨ ਨੂੰ ਦਿੱਤੀ ਜਾ ਰਹੀ ਫੌਜੀ ਸਹਾਇਤਾ ਦਾ ਹਿੱਸਾ ਹੈ, 2022 ਤੱਕ ਕੈਨੇਡਾ ਨੇ ਯੂਕਰੇਨ ਨੂੰ ਲਗਭਗ 4.5 ਬਿਲੀਅਨ ਡਾਲਰ ਦੀ ਫੌਜੀ ਸਹਾਇਤਾ ਦਿੱਤੀ ਸੀ।
