ਓਟਵਾ: ਕੈਨੇਡਾ ‘ਚ ਲਗਾਤਾਰ ਵੱਧ ਰਹੀ ਮਹਿੰਗਾਈ ਨਾਲ ਜੂਝ ਰਹੇ ਕੈਨੇਡਾ ਵਾਸੀਆਂ ਲਈ ਰਾਹਤ ਦੀ ਖਬਰ ਹੈ। ਵੀਰਵਾਰ ਨੂੰ ਹਾਊਸ ਆਫ਼ ਕਾਮਨਜ਼ ‘ਚ ਗੁਡਜ਼ ਐਂਡ ਸਰਵਿਸ ਟੈਕਸ ਵਿੱਚ ਦੁੱਗਣੀ ਰਿਆਇਤ ਦਿੰਦਾ ਬਿੱਲ ਸਰਬਸੰਮਤੀ ਨਾਲ ਪਾਸ ਕਰ ਦਿੱਤਾ ਗਿਆ ਹੈ। ਸੈਨੇਟ ‘ਚ ਪਾਸ ਹੋਣ ਤੋਂ ਬਾਅਦ ਕਾਨੂੰਨ ਬਣਨ ‘ਤੇ ਘੱਟ ਆਮਦਨ ਵਾਲੇ ਲੋਕਾਂ ਨੂੰ ਟੈਕਸ ਰਿਆਇਤ ਦੇ ਰੂਪ ‘ਚ ਨਕਦ ਅਦਾਇਗੀ ਦਿੱਤੀ ਜਾਵੇਗੀ।
ਵਿੱਤ ਮੰਤਰੀ ਅਤੇ ਉੱਪ ਪ੍ਰਧਾਨ ਮੰਤਰੀ ਕ੍ਰਿਸਟੀਆ ਫ਼ਰੀਲੈਂਡ ਨੇ ਕਿਹਾ ਕਿ ਕਮਜ਼ੋਰ ਆਰਥਿਕ ਹਾਲਾਤਾਂ ‘ਚੋਂ ਲੰਘ ਰਹੇ ਕੈਨੇਡਾ ਵਾਸੀਆਂ ਲਈ ਪਹਿਲਾਂ ਤੋਂ ਚੱਲ ਰਹੀ ਰਿਆਇਤ ਨੂੰ ਵਧਾ ਦਿੱਤਾ ਗਿਆ ਹੈ। ਲੋਕਾਂ ਨੂੰ ਇਸ ਰਾਹਤ ਦੀ ਜ਼ਰੂਰਤ ਸੀ ਅਤੇ ਲਿਬਰਲ ਸਰਕਾਰ ਸਾਰੇ ਐਮਪੀਜ਼ ਦੀ ਸ਼ੁਕਰਗੁਜ਼ਾਰ ਹੈ ਕਿ ਉਨ੍ਹਾਂ ਨੇ ਬਿਲ C-30 ਦਾ ਸਮਰਥਨ ਕੀਤਾ। ਆਰਜ਼ੀ ਤੌਰ ‘ਤੇ ਲਾਗੂ ਕੀਤਾ ਜਾ ਰਿਹਾ ਨਵਾਂ ਕਾਨੂੰਨ ਇੱਕ ਕਿਰਤੀ ਦੀ ਜੇਬ ‘ਚ 467 ਡਾਲਰ ਤੱਕ ਦੀ ਰਕਮ ਪੁੱਜਦੀ ਕਰੇਗਾ।
ਬੱਚਿਆਂ ਵਾਲੇ ਸਿੰਗਲ ਪੇਰੈਂਟਸ ਅਤੇ ਵਿਆਹੁਤਾ ਜੋੜਿਆਂ ਨੂੰ 612 ਡਾਲਰ ਮਿਲਣਗੇ, ਜਦਕਿ 19 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਲਈ 161 ਡਾਲਰ ਪ੍ਰਤੀ ਬੱਚਾ ਦਿੱਤੇ ਜਾਣਗੇ।
ਦੱਸਣਯੋਗ ਹੈ ਕਿ ਬਿੱਲ C-30 ਦੀ ਪਹਿਲੀ ਪੜ੍ਹਤ 20 ਸਤੰਬਰ ਨੂੰ ਮੁਕੰਮਲ ਹੋ ਗਈ ਸੀ ਅਤੇ ਹੁਣ ਇਸ ਨੂੰ ਸਰਬਸੰਮਤੀ ਨਾਲ ਪਾਸ ਕਰ ਦਿਤਾ ਗਿਆ ਹੈ। ਪਾਰਲੀਮਾਨੀ ਬਜਟ ਅਫ਼ਸਰ ਦਾ ਕਹਿਣਾ ਹੈ ਕਿ ਜੀ ਐਸ.ਟੀ. ਰਿਆਇਤਵਿਚ ਵਾਧੇ ਨਾਲ ਸਰਕਾਰੀ ਖ਼ਜ਼ਾਨੇ ‘ਤੇ 2.6 ਅਰਬ ਡਾਲਰ ਦਾ ਬੋਝ ਪਵੇਗਾ ਅਤੇ ਇੱਕ ਕਰੋੜ 10 ਲੱਖ ਕੈਨੇਡੀਅਨਜ਼ ਦੇ ਖਾਤਿਆਂ ‘ਚ ਰਕਮ ਭੇਜੀ ਜਾਵੇਗੀ।
ਬਿੱਲ C-30 ਲੋਕਾਂ ਨੂੰ ਗਰੌਸਰੀ ਦਾ ਖਰਚਾ ਬਰਦਾਸ਼ਤ ਕਰਨ ‘ਚ ਮਦਦ ਕਰੇਗਾ ਜੋ ਇਸ ਵਲੋਂ ਬੇਹੱਦ ਮੁਸ਼ਕਲ ਦੌਰ ‘ਚੋਂ ਗੁਜ਼ਰ ਰਹੇ ਹਨ। ਮਹਿੰਗਾਈ ਫ਼ਿਲਹਾਲ ਘਟਦੀ ਨਜ਼ਰ ਨਹੀਂ ਆ ਰਹੀ ਅਤੇ ਇਸ ਮਹੀਨੇ ਬੈਂਕ ਆਫ਼ ਕੈਨੇਡਾ ਵੱਲੋਂ ਵਿਆਜ ਦਰਾਂ ‘ਚ ਵਾਧਾ ਅਟਲ ਨਜ਼ਰ ਆ ਰਿਹਾ ਹੈ। ਬਿੱਲ ਦੀ ਹਮਾਇਤ ਕਰਨ ਦੇ ਬਾਵਜੂਦ ਕੰਜ਼ਰਵੇਟਿਵ ਪਾਰਟੀ ਨੇ ਕਿਹਾ ਕਿ ਲਿਬਰਲ ਸਰਕਾਰ ਸਿਰਫ਼ ਸੁਰਖੀਆਂ ‘ਚ ਬਣੀ ਰਹਿਣਾ ਚਾਹੁੰਦੀ ਹੈ, ਜਦਕਿ ਬੁਨਿਆਦੀ ਮਸਲਿਆਂ ਵੱਲ ਕੋਈ ਧਿਆਨ ਨਹੀਂ ਦਿੱਤਾ ਜਾ ਰਿਹਾ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
