ਲੰਦਨ: ਬਰਤਾਨੀਆ ਵਿਚ ਪਿਛਲੇ ਇਕ ਦਹਾਕੇ ਦੌਰਾਨ ਪਹਿਲੀ ਵਾਰ ਲੋਕਾਂ ਵਲੋਂ ਵੱਡੇ ਪੱਧਰ ‘ਤੇ ਰੋਸ ਵਿਖਾਵਾ ਕੀਤਾ ਗਿਆ ਹੈ, ਜਿਸ ‘ਚ ਸਭ ਤੋਂ ਵੱਧ ਅਧਿਆਪਕ, ਸਿਵਲ ਸਰਵੈਂਟ ਅਤੇ ਟਰੇਨ ਡਰਾਈਵਰ ਸ਼ਾਮਲ ਹੋਏ ਅਤੇ ਤਨਖਾਹਾਂ ਵਧਾਉਣ ਸਣੇ ਮਹਿੰਗਾਈ ਕੰਟਰੋਲ ਕਰਨ ਦੀ ਮੰਗ ਕੀਤੀ। ਮੀਡੀਆ ਰਿਪੋਰਟਾਂ ਮੁਤਾਬਕ 3 ਲੱਖ ਅਧਿਆਪਕਾਂ ਨੇ ਰੋਸ ਵਿਖਾਵੇ ‘ਚ ਸ਼ਮੂਲੀਅਤ ਕੀਤੀ ਜੋ ਪਹਿਲਾਂ ਕੋਰੋਨਾ ਅਤੇ ਫਿਰ ਯੂਕਰੇਨ ਦੀ ਜੰਗ ਕਾਰਨ ਵਧੀ ਮਹਿਗਾਈ ਤੋਂ ਪਰੇਸ਼ਾਨ ਹਨ।
ਰੋਸ ਮੁਜ਼ਾਹਰੇ ਤੋਂ ਪਹਿਲਾਂ ਪ੍ਰਧਾਨ ਮੰਤਰੀ ਦਫਤਰ ਨੇ ਚਿਤਾਵਨੀ ਜਾਰੀ ਕੀਤੀ ਸੀ ਕਿ ਇਸ ਨਾਲ ਹਾਲਾਤ ਵਿਗੜ ਸਕਦੇ ਹਨ ਪਰ ਲੋਕ ਨਾਂ ਮੰਨੇ ਅਤੇ ਸੜਕਾਂ ‘ਤੇ ਸਿਰਫ਼ ਭੀੜ ਹੀ ਨਜ਼ਰ ਆ ਰਹੀ ਸੀ। ਨੈਸ਼ਨਲ ਐਜੁਕੇਸ਼ਨ ਯੂਨੀਅਨ ਨੇ ਦੱਸਿਆ ਕਿ ਅਧਿਆਪਕਾਂ ਦੀ ਹੜਤਾਲ ਕਾਰਨ 23 ਹਜ਼ਾਰ ਸਕੂਲਾਂ ਵਿੱਚ ਪੜ੍ਹਾਈ ਨਾਂ ਹੋ ਸਕੀ ਜਦਕਿ ਟਰੇਨ ਡਰਾਈਵਰਜ਼ ਦੇ ਕੰਮ ‘ਤੇ ਨਾਂ ਜਾਣ ਕਾਰਨ ਜ਼ਿਆਦਾਤਰ ਰੇਲ ਸੇਵਾਵਾਂ ਠੱਪ ਰਹੀਆਂ। 33 ਸਾਲ ਦੇ ਇੱਕ ਅਧਿਆਪਕ ਨੇ ਦੱਸਿਆ ਕਿ ਜਿਸ ਹਿਸਾਬ ਨਾਲ ਮਹਿੰਗਾਈ ਵਧ ਰਹੀ ਹੈ, ਇਸ ਨਾਲ ਮਹੀਨੇ ਦਾ ਖਰਚ ਚਲਾਉਣਾ ਵੀ ਮੁਸ਼ਕਲ ਹੋ ਰਿਹਾ ਹੈ।
ਇੰਸਟੀਚਿਊਟ ਫਾਰ ਫਿਸਕਲ ਸਟੱਡੀਜ਼ ਮੁਤਾਬਕ ਸਾਲ 2010 ਤੋਂ 2022 ਵਿਚਾਲੇ ਅਧਿਆਪਕਾਂ ਦੀਆਂ ਤਨਖਾਹਾਂ ‘ਚ 10 ਫ਼ੀਸਦੀ ਤੱਕ ਦੀ ਕਮੀ ਆਈ ਹੈ। ਉੱਥੇ ਹੀ ਬਰਤਾਨਵੀ ਮੀਡੀਆ ਵੱਲੋਂ ਹੜਤਾਲ ਨੂੰ ਨਵੇਂ ਸਾਲ ਦਾ ਲਾਕਡਾਊਨ ਕਰਾਰ ਦਿੱਤਾ ਗਿਆ ਹੈ। ਇੱਕ ਰਿਪੋਰਟ ਮੁਤਾਬਕ ਹੜਤਾਲ ਦੇ ਮੁੱਦੇ ‘ਤੇ ਬਰਤਾਨੀਆ ‘ਚ ਕਾਫ਼ੀ ਸਖ਼ਤ ਕਾਨੂੰਨ ਹੈ ਅਤੇ ਜੇ ਲੱਖਾਂ ਦੀ ਗਿਣਤੀ ‘ਚ ਮੁਲਾਜ਼ਮ ਪੁੱਜੇ ਹਨ ਤਾਂ ਮਾਮਲਾ ਗੰਭੀਰ ਹੈ। ਪ੍ਰਧਾਨ ਮੰਤਰੀ ਰਿਸ਼ੀ ਸੁਨਕ ਦਾ ਮੰਨਣਾ ਹੈ ਕਿ ਜੇ ਅਧਿਆਪਕਾਂ ਅਤੇ ਹੋਰ ਸਰਕਾਰੀ ਮੁਲਾਜ਼ਮਾਂ ਦੀ ਤਨਖਾਹ ਵਧਾਈ ਤਾਂ ਮਹਿੰਗਾਈ ਹੋਰ ਵਧੇਗੀ। ਭਵਿੱਖ ‘ਚ ਹੋਣ ਵਾਲੀ ਕਿਸੇ ਵੀ ਹੜਤਾਲ ਵਿਰੁੱਧ ਸਰਕਾਰ ਵੱਲੋਂ ਨਵਾਂ ਕਾਨੂੰਨ ਲਿਆਉਣ ਦੀ ਤਿਆਰੀ ਵੀ ਕੀਤੀ ਜਾ ਰਹੀ ਹੈ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
