ਹਿਮਾਚਲ ਪ੍ਰਦੇਸ਼ ਵਿੱਚ ਬੀ ਅਤੇ ਸੀ ਗ੍ਰੇਡ ਟਮਾਟਰ ਦੀਆਂ ਕੀਮਤਾਂ ਵਿੱਚ ਆਈ ਗਿਰਾਵਟ

ਸ਼ਿਮਲਾ:: ਹਿਮਾਚਲ ਪ੍ਰਦੇਸ਼ ਵਿੱਚ ਬੀ ਅਤੇ ਸੀ ਗ੍ਰੇਡ ਟਮਾਟਰ ਦੀਆਂ ਕੀਮਤਾਂ ਵਿੱਚ ਗਿਰਾਵਟ ਜਾਰੀ ਹੈ। ਸੋਲਨ ਦੀ ਮੰਡੀ ‘ਚ ਸੋਮਵਾਰ ਨੂੰ ਲਗਾਤਾਰ ਦੂਜੇ ਦਿਨ ਬੀ ਅਤੇ ਸੀ ਗ੍ਰੇਡ ਟਮਾਟਰ 21 ਤੋਂ 50 ਰੁਪਏ ਪ੍ਰਤੀ ਕਿਲੋ ਦੇ ਹਿਸਾਬ ਨਾਲ ਵਿਕਿਆ ਹੈ। ਹਾਲਾਂਕਿ, ਏ ਗ੍ਰੇਡ ਦੀਆਂ ਕੀਮਤਾਂ ਵਿੱਚ ਵਾਧਾ ਹੋਇਆ ਹੈ। ਸੋਮਵਾਰ ਨੂੰ ਸਬਜ਼ੀ ਮੰਡੀ ਸੋਲਨ ‘ਚ ਹਿਮਸੋਨਾ ਟਮਾਟਰ 108 ਰੁਪਏ ਪ੍ਰਤੀ ਕਿਲੋ ਤੱਕ ਵਿਕਿਆ। ਮੰਡੀ ਵਿੱਚ 25 ਕਿਲੋ ਦੇ ਕੁਝ ਕਰੇਟ 2700 ਰੁਪਏ ਤੱਕ ਵੇਚੇ ਗਏ ਹਨ। ਦੂਜੇ ਪਾਸੇ ਟਮਾਟਰ ਦੀ ਔਸਤਨ ਕੀਮਤ 70 ਤੋਂ 80 ਰੁਪਏ ਪ੍ਰਤੀ ਕਿਲੋ ਮਿਲ ਰਹੀ ਹੈ।

ਇਸ ਤੋਂ ਇਲਾਵਾ ਸੂਬੇ ਦੀਆਂ ਸਥਾਨਿਕ ਮੰਡੀਆਂ ਅਤੇ ਦੁਕਾਨਾਂ ‘ਚ ਵੀ ਟਮਾਟਰਾਂ ਦੇ ਭਾਅ ਹੇਠਾਂ ਆ ਗਏ ਹਨ। ਸੋਮਵਾਰ ਨੂੰ ਸੋਲਨ ਸ਼ਹਿਰ ‘ਚ ਵੀ ਟਮਾਟਰ 20 ਤੋਂ 70 ਰੁਪਏ ਪ੍ਰਤੀ ਕਿਲੋ ਦੇ ਵਿਚਕਾਰ ਮਿਲ ਰਿਹਾ ਸੀ। ਜਦੋਂ ਕਿ ਪਿਛਲੇ ਹਫਤੇ ਇਹੀ ਟਮਾਟਰ 80 ਤੋਂ 140 ਰੁਪਏ ਕਿਲੋ ਮਿਲ ਰਿਹਾ ਸੀ। ਸ਼ਿਮਲਾ ‘ਚ ਟਮਾਟਰ 60 ਰੁਪਏ ਕਿਲੋ ਵਿਕਿਆ। ਸੋਮਵਾਰ ਨੂੰ ਸੋਲਨ ਦੀ ਸਬਜ਼ੀ ਮੰਡੀ ‘ਚ ਕਰੀਬ 3000 ਕਰੇਟ ਟਮਾਟਰ ਪਹੁੰਚੇ। ਦਸ ਦਈਏ ਕਿ ਹੁਣ ਸ਼ਹਿਰ ਦੇ ਆਲੇ-ਦੁਆਲੇ ਦੇ ਕਈ ਇਲਾਕਿਆਂ ਤੋਂ ਟਮਾਟਰ ਆਉਣੇ ਸ਼ੁਰੂ ਹੋ ਗਏ ਹਨ।