ਜੰਗਲ ਦੀ ਜ਼ਮੀਨ ‘ਤੇ ਨਾਜਾਇਜ਼ ਕਬਜੇ ਹਟਾਉਣ ਗਏ ਜੰਗਲਾਤ ਵਿਭਾਗ ਦੇ ਮੁਲਾਜ਼ਮਾਂ ‘ਤੇ ਹਮਲਾ, ਗੰਭੀਰ ਜ਼ਖਮੀ

ਕੋਟਾ: ਮੱਧ ਪ੍ਰਦੇਸ਼-ਰਾਜਸਥਾਨ ਸਰਹੱਦ ‘ਤੇ ਜੰਗਲੀ ਜ਼ਮੀਨ ਦੇ ਇੱਕ ਹਿੱਸੇ ‘ਤੇ ਕਬਜ਼ੇ ਹਟਾਉਣ ਨੂੰ ਲੈ ਕੇ ਹੋਈ ਝੜਪ ਦੌਰਾਨ ਪਿੰਡ ਵਾਸੀਆਂ ਦੇ ਕਥਿਤ ਹਮਲੇ ਵਿੱਚ ਰਾਜਸਥਾਨ ਦੇ ਜੰਗਲਾਤ ਵਿਭਾਗ ਦੇ ਘੱਟੋ-ਘੱਟ 6 ਕਰਮਚਾਰੀ ਜ਼ਖ਼ਮੀ ਹੋ ਗਏ। ਇਹ ਘਟਨਾ ਬਾਰਾਨ ਜ਼ਿਲ੍ਹੇ ਦੇ ਕਸਬਾ ਥਾਣਾ ਜੰਗਲਾਤ ਚੌਕੀ ਖੇਤਰ ਵਿੱਚ ਉਸ ਸਮੇਂ ਵਾਪਰੀ ਜਦੋਂ ਜੰਗਲਾਤ ਵਿਭਾਗ ਦਾ ਇੱਕ ਦਸਤਾ ਇਲਾਕੇ ਵਿੱਚ ਪੌਦੇ ਲਗਾਉਣ ਅਤੇ ਕਬਜ਼ੇ ਹਟਾਉਣ ਲਈ ਪਹੁੰਚਿਆ ਸੀ।  ਜੰਗਲਾਤ ਵਿਭਾਗ ਦੇ ਅਧਿਕਾਰੀਆਂ ਦੀ ਸ਼ਿਕਾਇਤ ‘ਤੇ ਕਰੀਬ 10 ਲੋਕਾਂ ਖਿਲਾਫ ਸਰਕਾਰੀ ਕਰਮਚਾਰੀਆਂ ਨੂੰ ਡਿਊਟੀ ਦੌਰਾਨ ਵਿਘਨ ਪਾਉਣ ਅਤੇ ਜ਼ਖਮੀ ਕਰਨ ਦੇ ਦੋਸ਼ ‘ਚ ਮਾਮਲਾ ਦਰਜ ਕੀਤਾ ਗਿਆ ਸੀ। ਇਨ੍ਹਾਂ ਵਿੱਚੋਂ ਦੋ ਅਣਪਛਾਤੇ ਹਨ।

ਅਜੇ ਤੱਕ ਕਿਸੇ ਵੀ ਦੋਸ਼ੀ ਨੂੰ ਗ੍ਰਿਫਤਾਰ ਨਹੀਂ ਕੀਤਾ ਗਿਆ ਹੈ ਜਦੋਂ ਕਿ ਏਰੀਆ ਅਧਿਕਾਰੀ ਹੇਮੰਤ ਗੌਤਮ ਅਤੇ ਸਟੇਸ਼ਨ ਇੰਚਾਰਜ ਰਾਜਕੁਮਾਰ ਮੀਨਾ ਦੀ ਅਗਵਾਈ ਹੇਠ ਪੁਲਸ ਟੀਮਾਂ ਨੇ ਇਲਾਕੇ ‘ਚ ਛਾਪੇਮਾਰੀ ਕੀਤੀ। ਕਸਬਾ ਥਾਣੇ ਦੇ ਜੰਗਲਾਤ ਖੇਤਰ ਅਧਿਕਾਰੀ (ਰੇਂਜਰ) ਮੁਹੰਮਦ ਹਾਫਿਜ਼ ਨੇ ਦੱਸਿਆ ਕਿ ਰਾਜਸਥਾਨ-ਮੱਧ ਪ੍ਰਦੇਸ਼ ਸਰਹੱਦ ‘ਤੇ ਸਥਿਤ ਪਿੰਡਾਂ ਦੇ 35-40 ਭੀਲ ਆਦਿਵਾਸੀ ਪਰਿਵਾਰਾਂ ਨੇ ਕਸਬਾ ਥਾਣਾ ਜੰਗਲਾਤ ਖੇਤਰ ਦੀ 200-300 ਵਿੱਘੇ ਜੰਗਲੀ ਜ਼ਮੀਨ ‘ਤੇ ਕਬਜ਼ਾ ਕਰ ਲਿਆ ਹੈ। ਉਹ ਉੱਥੇ ਆਰਜ਼ੀ ਰਿਹਾਇਸ਼ ਬਣਾ ਕੇ ਰਹਿ ਰਹੇ ਹਨ। ਹਾਫਿਜ਼ ਮੁਤਾਬਕ ਐਤਵਾਰ ਨੂੰ ਜੰਗਲਾਤ ਗਸ਼ਤੀ ਟੀਮ ਕਬਜ਼ੇ ਹਟਾਉਣ ਗਈ ਸੀ ਪਰ ਉਨ੍ਹਾਂ ‘ਤੇ ਕਬਜ਼ਾਧਾਰੀਆਂ ਨੇ ਹਮਲਾ ਕਰ ਦਿੱਤਾ, ਜਿਨ੍ਹਾਂ ਨੇ ਜੰਗਲਾਤ ਕਰਮਚਾਰੀਆਂ ਦੀ ਡੰਡਿਆਂ ਅਤੇ ਪੱਥਰਾਂ ਨਾਲ ਕੁੱਟਮਾਰ ਕੀਤੀ।