ਨਿਊਜ਼ ਡੈਸਕ: ਆਸਟ੍ਰੇਲੀਆਈ ਮਹਿਲਾ ਕ੍ਰਿਕਟਰ ਅਮੈਂਡਾ ਵੈਲਿੰਗਟਨ ਪੰਜਾਬੀ ਗਾਇਕ ਤੇ ਅਦਾਕਾਰ ਦਿਲਜੀਤ ਦੋਸਾਂਝ ਦੀ ਵੱਡੀ ਫੈਨ ਬਣ ਗਈ ਹੈ। ਦਿਲਜੀਤ ਦੇ ਓਰਾ-2025 ਟੂਰ ਦੌਰਾਨ ਆਸਟ੍ਰੇਲੀਆ ਵਿੱਚ ਹੋਏ ਤਾਜ਼ਾ ਕੰਸਰਟ ਵਿੱਚ ਅਮੈਂਡਾ ਪਹੁੰਚ ਗਈ ਅਤੇ ਮੰਚ ‘ਤੇ ਜਾ ਕੇ ਦਿਲਜੀਤ ਨੂੰ ਮਿਲੀ। ਉਸ ਨੇ ‘ਮੈਂ ਪੰਜਾਬ ਹਾਂ’ ਛਪੀ ਕਾਲੀ ਟੀ-ਸ਼ਰਟ ਪਾਈ ਹੋਈ ਸੀ।
ਦਿਲਜੀਤ ਨੇ ਆਸਟ੍ਰੇਲੀਆਈ ਫੈਨ ਨੂੰ ਨਿਰਾਸ਼ ਨਹੀਂ ਕੀਤਾ – ਉਸ ਨਾਲ ਸੈਲਫੀ ਕਰਵਾਈ, ਟੀ-ਸ਼ਰਟ ‘ਤੇ ਆਟੋਗ੍ਰਾਫ ਦਿੱਤਾ ਤੇ ਜਾਂਦੇ ਸਮੇਂ ਗਿਫਟ ਵੀ ਭੇਂਟ ਕੀਤਾ। ਅਮੈਂਡਾ ਨੇ ਖੁਦ ਇੰਸਟਾਗ੍ਰਾਮ ‘ਤੇ ਫੋਟੋ-ਵੀਡੀਓ ਸ਼ੇਅਰ ਕੀਤੇ ਤੇ ਲਿਖਿਆ: “ਕਦੇ ਸੋਚਿਆ ਨਹੀਂ ਸੀ ਕਿ ਦਿਲਜੀਤ ਦੋਸਾਂਝ ਨਾਲ ਮੰਚ ‘ਤੇ ਜਾਵਾਂਗੀ।”
ਮੰਚ ‘ਤੇ ਹੋਈ ਗੱਲਬਾਤ
ਦਿਲਜੀਤ ਪਰਫਾਰਮ ਕਰ ਰਹੇ ਸਨ ਤਾਂ ਅਮੈਂਡਾ ਮੰਚ ‘ਤੇ ਪਹੁੰਚ ਗਈ। ਉਸ ਨੇ ਬੈਗ ਵਿੱਚੋਂ ਪੀਲੀ ਟੀ-ਸ਼ਰਟ ਕੱਢੀ ਜਿਸ ‘ਤੇ ਨੰਬਰ 29 ਤੇ ਉਸ ਦਾ ਨਾਂ ਲਿਖਿਆ ਸੀ। ਉਸ ਨੇ ਦਿਲਜੀਤ ਨੂੰ ਦਿਖਾ ਕੇ ਦੱਸਿਆ ਕਿ ਉਹ ਆਸਟ੍ਰੇਲੀਆ ਮਹਿਲਾ ਟੀਮ ਦੀ ਖਿਡਾਰੀ ਹੈ। ਦਿਲਜੀਤ ਨੇ ਮੁਸਕਰਾ ਕੇ ਕਿਹਾ, “ਆਸਟ੍ਰੇਲੀਆਈ ਟੀਮ ਬਹੁਤ ਮਜ਼ਬੂਤ ਹੁੰਦੀ ਹੈ, ਪਰ ਇਸ ਵਾਰ ਸਾਡੀ ਵਾਲੀ ਜਿੱਤ ਗਈ!” ਅਮੈਂਡਾ ਨੇ ਵੀ ਖੁਸ਼ੀ ਜ਼ਾਹਿਰ ਕੀਤੀ। ਫਿਰ ਉਸ ਨੇ ਆਪਣੀ ਟੀ-ਸ਼ਰਟ ਦੀ ਪਿੱਠ ‘ਤੇ ਆਟੋਗ੍ਰਾਫ ਮੰਗਿਆ, ਦਿਲਜੀਤ ਨੇ ਮੰਚ ‘ਤੇ ਹੀ ਦੇ ਦਿੱਤਾ।
ਭਾਰਤੀ ਸਭਿਆਚਾਰ ਦੀ ਵੱਡੀ ਫੈਨ
ਅਮੈਂਡਾ ਭਾਰਤੀ ਸਭਿਆਚਾਰ ਨੂੰ ਬਹੁਤ ਪਸੰਦ ਕਰਦੀ ਹੈ, 19 ਅਕਤੂਬਰ ਨੂੰ ਅਮੈਂਡਾ ਨੇ ਸਾੜ੍ਹੀ ਪਾ ਕੇ ਫੋਟੋ ਪੋਸਟ ਕੀਤੀ ਤੇ ਲਿਖਿਆ, “ਹੈਪੀ ਦੀਵਾਲੀ, ਤੁਹਾਡਾ ਦਿਨ ਦੀਵਾਲੀ ਦੀਆਂ ਲਾਈਟਾਂ ਵਾਂਗ ਚਮਕੇ।” 2022 ਵਿੱਚ ਭਾਰਤ ਆਈ ਤਾਂ ਮੁੰਬਈ ਤੋਂ ਸਾੜ੍ਹੀ ਖਰੀਦੀ। ਫੋਟੋ ਸ਼ੇਅਰ ਕਰ ਕੇ ਲਿਖਿਆ, “ਸਾੜ੍ਹੀ ਖਰੀਦ ਲਈ, ਹੁਣ ਪਹਿਨਣੀ ਕਿਵੇਂ ਸਿੱਖ ਰਹੀ ਹਾਂ।” ਗਲਤ ਪਹਿਨੀ ਫੋਟੋ ਪਾ ਕੇ ਪੁੱਛਿਆ, “ਸਹੀ ਤਰੀਕਾ ਦੱਸੋ!” ਉਸ ਫੋਟੋ ਨੂੰ 4.3 ਮਿਲੀਅਨ ਤੋਂ ਵੱਧ ਵਾਰ ਵੇਖਿਆ ਗਿਆ। 2023 ਤੇ 2024 ਵਿੱਚ ਭਾਰਤ ਆਈ ਤਾਂ ਦੋਵੇਂ ਵਾਰ ਮਹਿੰਦੀ ਲਗਵਾਈ ਤੇ ਸੋਸ਼ਲ ਮੀਡੀਆ ‘ਤੇ ਫੋਟੋ-ਵੀਡੀਓ ਸ਼ੇਅਰ ਕੀਤੇ।
ਅਮੈਂਡਾ ਵੈਲਿੰਗਟਨ ਕੌਣ ਹਨ?
ਅਮੈਂਡਾ -ਜੇਡ ਵੈਲਿੰਗਟਨ (ਜਨਮ 29 ਮਈ 1997) ਆਸਟ੍ਰੇਲੀਆਈ ਮਹਿਲਾ ਕ੍ਰਿਕਟਰ ਹਨ। ਸੱਜੇ ਹੱਥ ਦੀ ਲੈੱਗ-ਸਪਿਨ ਗੇਂਦਬਾਜ਼। WNCL ਵਿੱਚ ਸਾਊਥ ਆਸਟ੍ਰੇਲੀਆਈ ਸਕਾਰਪੀਅਨਜ਼ ਤੇ WBBL ਵਿੱਚ ਐਡੀਲੇਡ ਸਟ੍ਰਾਈਕਰਜ਼ ਲਈ ਖੇਡਦੀ ਹਨ। 2012 ਵਿੱਚ ਸਿਰਫ਼ 15 ਸਾਲ ਦੀ ਉਮਰ ਵਿੱਚ WNCL ਡੈਬਿਊ ਕੀਤਾ – ਸਾਊਥ ਆਸਟ੍ਰੇਲੀਆ ਲਈ ਸੀਨੀਅਰ ਕ੍ਰਿਕਟ ਵਿੱਚ ਸਭ ਤੋਂ ਛੋਟੀ ਖਿਡਾਰੀ। 2016 ਤੋਂ ਟੈਸਟ, ਵਨਡੇ ਤੇ ਟੀ-20 ਵਿੱਚ ਆਸਟ੍ਰੇਲੀਆ ਦੀ ਨੁਮਾਇੰਦਗੀ ਕਰ ਰਹੀ ਹਨ।
