ਨਿਊਜ਼ ਡੈਸਕ: ਨੌਜਵਾਨਾਂ ਦਾ ਕੈਨੇਡਾ ਜਾਣ ਦਾ ਰੁਝਾਨ ਵਧਦਾ ਜਾ ਰਿਹਾ ਹੈ।ਵਿਦਿਆਰਥੀਆਂ ਦੀ ਭਾਰੀ ਸੰਖਿਆ ਕੈਨੇਡਾ ‘ਚ ਪਹੁੰਚ ਰਹੀ ਹੈ ਪਰ ਕੈਨੇਡਾ ‘ਚ ਰਹਿਣ ਓਨਾ ਸੁਖਾਲਾ ਨਹੀਂ ਜਿੰਨ੍ਹਾਂ ਲਗਦਾ ਹੈ। ਵਿਦਿਆਰਥੀ ਆਪਣਾ ਘਰ ਛੱਡ ਕੇ ਵਿਦੇਸ਼ ਜਾ ਰਹੇ ਹਨ ਪਰ ਉਥੇ ਉਨ੍ਹਾਂ ਨੂੰ ਰਹਿਣ ਲਈ ਛੱਤ ਵੀ ਨਸੀਬ ਨਹੀਂ ਹੋ ਰਹੀ। ਕੈਨੇਡਾ ਆਉਣ ਵਾਲੇ ਕੁਝ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਨੇ ਦਸਿਆ ਕਿ ਉਨ੍ਹਾਂ ਲਈ ਆਪਣੀ ਰਿਹਾਇਸ਼ ਦਾ ਬੰਦੋਬਸਤ ਕਰਨਾ ਮੁਸ਼ਕਿਲ ਹੋ ਰਿਹਾ ਹੈ।
ਟੋਰਾਂਟੋ ਦੇ ਜੌਰਜ ਬ੍ਰਾਊਨ ਕਾਲਜ ਦੇ ਅੰਤਰਰਾਸ਼ਟਰੀ ਵਿਦਿਆਰਥੀ ਹਰਸ਼ਲ ਭਾਸਗੌਰੀ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਰਹਿਣ ਲਈ ਜਗ੍ਹਾ ਲੈਣ ਖ਼ਾਤਰ ਭਾਰਤ ਤੋਂ ਲਿਆਂਦੀ ਆਪਣੀ ਜਮਾਂ ਪੂੰਜੀ ਖਰਚਣੀ ਪਈ ਹੈ । ਉਨ੍ਹਾਂ ਨੂੰ ਰਹਿਣ ਲਈ ਪਹਿਲਾਂ ਹੀ ਕਈ ਮਹੀਨਿਆਂ ਦਾ ਅਡਵਾਂਸ ਕਿਰਾਇਆ ਦੇਣਾ ਪਿਆ ਹੈ। ਹਰਸ਼ਲ ਨੇ ਦੱਸਿਆ ਉਹ ਪਿਛਲੇ ਚਾਰ ਮਹੀਨਿਆਂ ਤੋਂ ਕਿਰਾਏ ‘ਤੇ ਰਹਿਣ ਲਈ ਘਰ ਦੀ ਭਾਲ ਕਰ ਰਿਹਾ ਸੀ ਪਰ ਉਸਨੂੰ ਰਹਿਣ ਲਈ ਘਰ ਕਿਤੇ ਵੀ ਨਹੀਂ ਮਿਲ ਰਹੀ ਸੀ।ਉਸਨੇ ਕਿਹਾ ਕਿ ਜੇ ਕੈਨੇਡਾ ਵਿਚ ਹਾਊਸਿੰਗ ਉਪਲਬਧ ਹੀ ਨਹੀਂ ਹੈ ਤਾਂ ਉਸਨੂੰ ਇੱਥੇ ਬੁਲਾਇਆ ਹੀ ਕਿਉਂ ਗਿਆ ਸੀ।ਹਰਸ਼ਲ ਵਾਂਗ ਕਈ ਵਿਦਿਆਰਥੀਆਂ ਨੇ ਕਈ ਮਹੀਨਿਆਂ ਇੱਥੋਂ ਤੱਕ ਕਿ ਪੂਰੇ ਸਾਲ ਦਾ ਐਡਵਾਂਸ ਕਿਰਾਇਆ ਦੇਣ ਦੀਆਂ ਗੱਲਾਂ ਆਖੀਆਂ ਹਨ। ਰਹਿਣ ਲਈ ਥਾਂ ਨਾ ਮਿਲਣ ਕਰਕੇ ਕੁਝ ਵਿਦਿਆਰਥੀਆਂ ਦੀਆਂ ਤਾਂ ਕਾਰ ਵਿਚ ਰਹਿਣ ਜਾਂ ਅਸੁਰੱਖਿਅਤ ਥਾਂਵਾਂ ‘ਤੇ ਰਿਹਾਇਸ਼ ਕਰਨ ਦੀਆਂ ਵੀ ਖ਼ਬਰਾਂ ਸਾਹਮਣੇ ਆ ਚੁੱਕੀਆਂ ਹਨ।
ਇਮੀਗ੍ਰੇਸ਼ਨ ਵਿਭਾਗ ਅਨੁਸਾਰ ਪਿਛਲੇ ਸਾਲ ਰਿਕਾਰਡ 550,150, ਸਟਡੀ ਪਰਮਿਟ ਜਾਰੀ ਕੀਤੇ ਗਏ ਸਨ। ਇਹ ਪਿਛਲੇ 5 ਸਾਲਾਂ ਵਿਚ 75% ਵਾਧਾ ਹੋਇਆ ਹੈ।
ਮਾਹਿਰਾਂ ਦਾ ਕਹਿਣਾ ਹੈ ਕਿ ਫ਼ਿਲਹਾਲ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੀ ਗਿਣਤੀ ‘ਤੇ ਕੋਈ ਸੀਮਾ ਨਹੀਂ ਹੈ ਅਤੇ ਨਾ ਹੀ ਸਰਕਾਰਾਂ ਵੱਲੋਂ ਵਿੱਦਿਅਕ ਅਦਾਰਿਆਂ ਲਈ ਰਿਹਾਇਸ਼ ਦਾ ਬੰਦੋਬਸਤ ਕਰਵਾਇਆ ਗਿਆ ਹੈ। ਦਸ ਦਈਏ ਕਿ ਹਾਊਸਿੰਗ ਮਿਨਿਸਟਰ ਨੇ ਕਿਹਾ ਸੀ ਕਿ ਹਾਊਸਿੰਗ ਮਾਰਕਿਟ ਦੇ ਬੋਝ ਨੂੰ ਘਟਾਉਣ ਲਈ ਸਰਕਾਰ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੀ ਗਿਣਤੀ ਸੀਮਤ ਕਰਨ ‘ਤੇ ਵਿਚਾਰ ਕਰ ਰਹੀ ਹੈ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
