ਨਵੀਂ ਦਿੱਲੀ : ਪੜ੍ਹਾਈ ਦੌਰਾਨ ਵਿਦਿਆਰਥੀਆਂ ’ਤੇ ਕਿਸੇ ਤਰ੍ਹਾਂ ਦੀ ਪ੍ਰੇਸ਼ਾਨੀ ਨਾ ਹੋਵੇ, ਇਸ ਦੇ ਲਈ ਹੁਣ ਉਨ੍ਹਾਂ ਨੂੰ ਪੜ੍ਹਾਈ ਦੇ ਹਰ ਪੱਧਰ ’ਤੇ ਸਲਾਹ ਦੀ ਸਹੂਲਤ ਮਿਲੇਗੀ। ਇਸ ਵਿਚ ਉਨ੍ਹਾਂ ਨੂੰ ਦਿਲਚਸਪੀ ਮੁਤਾਬਕ ਵਿਸ਼ਿਆਂ ਦੀ ਚੋਣ ਤੋਂ ਲੈ ਕੇ ਕਰੀਅਰ ਬਣਾਉਣ ਦੀ ਪੂਰੀ ਸਲਾਹ ਦਿੱਤੀ ਜਾਵੇਗੀ। ਸਿੱਖਿਆ ਮੰਤਰਾਲਾ ਫਿਲਹਾਲ ਇਸ ਨੂੰ ਲੈ ਕੇ ਨੈਸ਼ਨਲ ਮੈਂਟਰਿੰਗ ਮਿਸ਼ਨ ਨਾਂ ਨਾਲ ਇਕ ਮੁਹਿੰਮ ਸ਼ੁਰੂ ਕਰਨ ਦੀ ਤਿਆਰੀ ’ਚ ਹੈ। ਇਸ ਦੇ ਜ਼ਰੀਏ ਵਿਦਿਆਰਥੀਆਂ ਦੇ ਨਾਲ ਅਧਿਆਪਕਾਂ ਤੇ ਵਿੱਦਿਅਕ ਅਦਾਰਿਆਂ ਦੀ ਵੀ ਮੈਂਟਰਿੰਗ ਦੀ ਸਹੂਲਤ ਮੁਹੱਈਆ ਕਰਵਾਈ ਜਾਵੇਗਾ। ਇਸ ਦੌਰਾਨ ਅਧਿਆਪਕਾਂ ਨੂੰ ਸਥਾਨਕ ਭਾਸ਼ਾ ’ਚ ਪੜ੍ਹਾਉਣ ਦੀ ਸਲਾਹ ਦੇ ਨਾਲ ਹੀ ਵਿਦਿਆਰਥੀਆਂ ਦਾ ਹੁਨਰ ਪਛਾਨਣ ਆਦਿ ਦੇ ਗੁਣ ਵੀ ਸਿਖਾਏ ਜਾਣਗੇ।
ਰਾਸ਼ਟਰੀ ਸਿੱਖਿਆ ਨੀਤੀ ’ਚ ਵਿਦਿਆਰਥੀਆਂ, ਅਧਿਆਪਕਾਂ ਤੇ ਅਦਾਰਿਆਂ ਨੂੰ ਪ੍ਰਗਤੀ ਦੀ ਨਿਯਮਤ ਸਲਾਹ ਮੁਹੱਈਆ ਕਰਾਉਣ ਦੀ ਸਿਫਾਰਸ਼ ਤੋਂ ਬਾਅਦ ਇਹ ਕਦਮ ਚੁੱਕਿਆ ਗਿਆ ਹੈ। ਇਸ ਤਹਿਤ ਸਕੂਲੀ ਸਿੱਖਿਆ ਦੇ ਪੱਧਰ ’ਤੇ ਸਲਾਹ ਦਾ ਇਕ ਰੋਡਮੈਪ ਤਿਆਰ ਕੀਤਾ ਗਿਆ ਹੈ, ਜਿਸ ਨੂੰ ਲੈ ਕੇ ਦੇਸ਼ ਦੇ ਚੋਣਵੇਂ 30 ਸਕੂਲਾਂ ’ਚ ਟਰਾਇਲ ਵੀ ਸ਼ੁਰੂ ਹੋ ਗਿਆ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਆਉਣ ਵਾਲੇ ਦਿਨਾਂ ’ਚ ਸਲਾਹ ਦੀ ਇਸ ਯੋਜਨਾ ਨੂੰ ਰਾਸ਼ਟਰੀ ਪੱਧਰ ’ਤੇ ਲਾਗੂ ਕੀਤਾ ਜਾ ਸਕਦਾ ਹੈ। ਇਸ ਦੌਰਾਨ ਉੱਚ ਵਿੱਦਿਅਕ ਅਦਾਰਿਆਂ ਦੇ ਪੱਧਰ ’ਤੇ ਵੀ ਇਸੇ ਤਰ੍ਹਾਂ ਦੇ ਨਿਯਮ-ਕਾਇਦੇ ਬਣਾਉਣ ਦੀ ਤਿਆਰੀ ਹੈ। ਇਸ ਸਬੰਧੀ ਮੰਤਰਾਲੇ ਦੇ ਪੱਧਰ ’ਤੇ ਕਈ ਦੌਰਾਂ ਦੀ ਬੈਠਕ ਵੀ ਹੋ ਚੁੱਕੀ ਹੈ। ਫਿਲਹਾਲ ਨੈਸ਼ਨਲ ਮੈਂਟਰਿੰਗ ਮਿਸ਼ਨ ਤਹਿਤ ਸਲਾਹ ਦੀ ਸਹੂਲਤ ਮੁਹੱਈਆ ਕਰਾਉਣ ਦਾ ਜਿਹੜਾ ਫਾਰਮੂਲਾ ਤਿਆਰ ਕੀਤਾ ਗਿਆ ਹੈ, ਉਨ੍ਹਾਂ ’ਚ ਹਰ ਅਦਾਰੇ ਦੇ ਪੱਧਰ ’ਤੇ ਇਕ ਸਲਾਹ ਟੀਮ ਗਠਿਤ ਹੋਵੇਗੀ। ਇਨ੍ਹਾਂ ’ਚ ਅਦਾਰੇ ਦੇ ਅਧਿਆਪਕਾਂ ਦੇ ਨਾਲ ਸਥਾਨਕ ਰਿਟਾਇਰਡ ਪ੍ਰੋਫੈਸਰ, ਅਧਿਆਪਕ, ਅਧਿਕਾਰੀ ਤੇ ਸਨਅਤਾਂ ਨਾਲ ਜੁੜੇ ਨੁਮਾਇੰਦਿਆਂ ਨੂੰ ਥਾਂ ਦਿੱਤੀ ਜਾਵੇਗੀ। ਉੱਥੇ, ਇਸ ਮਿਸ਼ਨ ਤਹਿਤ ਮੈਂਟਰਿੰਗ ਲਈ ਰਾਸ਼ਟਰੀ ਪੱਧਰ ’ਤੇ ਵੀ ਇਕ ਟੀਮ ਤਿਆਰ ਕੀਤੀ ਜਾਵੇਗੀ। ਇਨ੍ਹਾਂ ’ਚ ਸਵੈ-ਇੱਛਾ ਦੇ ਤੌਰ ’ਤੇ ਸਲਾਹ ਦੇਣ ਵਾਲਿਆਂ ਨੂੰ ਥਾਂ ਦਿੱਤੀ ਜਾਵੇਗੀ। ਇਸ ਵਿਚ ਵਿਸ਼ੇ ਮਾਹਿਰਾਂ ਤੋਂ ਇਲਾਵਾ ਪ੍ਰੋਫੈਸ਼ਨਲਸ ਵੀ ਸ਼ਾਮਲ ਰਹਿਣਗੇ।
ਸਿੱਖਿਆ ਮੰਤਰਾਲੇ ਨਾਲ ਜੁੜੇ ਅਧਿਕਾਰੀਆਂ ਮੁਤਾਬਕ ਵਿਦਿਆਰਥੀਆਂ, ਅਧਿਆਪਕਾਂ ਤੇ ਵਿੱਦਿਅਕ ਅਦਾਰਿਆਂ ਦੀ ਮੈਂਟਰਿੰਗ ਦਾ ਇਹ ਮਾਡਲ ਮੌਜੂਦਾ ਸਮੇਂ ’ਚ ਫਿਨਲੈਂਡ, ਅਮਰੀਕਾ ਤੇ ਬਰਤਾਨੀਆ ਵਰਗੇ ਦੇਸ਼ਾਂ ’ਚ ਪ੍ਰਚਲਨ ’ਚ ਹੈ ਜਿੱਥੇ ਹਰ ਕੋਈ ਇਕ-ਦੂਜੇ ਨੂੰ ਪ੍ਰਮੋਟ ਕਰਨ ਦਾ ਕੰਮ ਕਰਦਾ ਹੈ। ਮੰਤਰਾਲੇ ਮੁਤਾਬਕ, ਮੈਂਟਰਿੰਗ ਦੇ ਇਸ ਮਾਡਲ ’ਤੇ ਦੇਸ਼ ’ਚ ਹਾਲੇ ਆਈਆਈਟੀਜ਼ ਅਮਲ ਕਰ ਰਹੇ ਹਨ ਜਿਸ ਵਿਚ ਪੁਰਾਣੇ ਆਈਆਈਟੀਜ਼ ਉਨ੍ਹਾਂ ਸਾਰੇ ਆਈਆਈਟੀਜ਼ ਨੂੰ ਅੱਗੇ ਵਧਣ ਤੇ ਖੋਜ ’ਚ ਮਦਦ ਦੇ ਰਹੇ ਹਨ, ਜਿਹੜੇ ਇਸ ਖੇਤਰ ’ਚ ਹਾਲੇ ਕਾਫ਼ੀ ਪੱਛੜੇ ਹੋਏ ਹਨ। ਨਾਲ ਹੀ ਉਨ੍ਹਾਂ ਕੋਲ ਫੈਕਲਟੀ ਜਾਂ ਦੂਜੀਆਂ ਸਹੂਲਤਾਂ ਦੀ ਕਮੀ ਹੈ। ਦਾਅਵਾ ਹੈ ਕਿ ਆਉਣ ਵਾਲੇ ਦਿਨਾਂ ’ਚ ਦੇਸ਼ ’ਚ ਮਿਸ਼ਨ ਤਹਿਤ ਸਲਾਹ ਦਾ ਇਕ ਇੰਫ੍ਰਾਸਟ੍ਰਕਚਰ ਤਿਆਰ ਹੋ ਜਾਵੇਗਾ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
