ਵੈਨਕੁਵਰ: ਸਾਲ 2019 ਦੌਰਾਨ ਕੋਰੋਨਾ ਕਾਲ ਤੋਂ ਬਾਅਦ ਤਿੰਨ ਸਾਲ ਬਾਅਦ ਪਹਿਲੀ ਵਾਰ ਕੈਨੇਡਾ ਦੇ ਵੈਨਕੂਵਰ ਵਿੱਚ ‘ਵਿਸਾਖੀ ਪਰੇਡ` ਕੱਢੀ ਗਈ, ਜਿਸ ਵਿੱਚ ਸਿੱਖਾਂ ਸਣੇ ਵੱਡੀ ਗਿਣਤੀ ਸੰਗਤਾਂ ਨੇ ਹਾਜ਼ਰੀਆਂ ਭਰੀਆਂ। ਖਾਲਸਾਈ ਰੰਗ ਵਿੱਚ ਰੰਗ ਵੈਨਕੂਵਰ ‘ਚ ਇਸ ਦੌਰਾਨ ਗੁਰੂ ਕੇ ਲੰਗਰ ਅਤੁੱਟ ਵਰਤਾਏ ਗਏ।
ਕੋਰੋਨਾ ਮਹਾਂਮਾਰੀ ਕਾਰਨ ਤਿੰਨ ਸਾਲ ਬਾਅਦ ਵੈਨਕੂਵਰ ‘ਚ ਵਿਸਾਖੀ ਪਰੇਡ ਕੱਢੀ ਗਈ। ਇਸ ਦੌਰਾਨ ਰੋਸ ਸਟਰੀਟ ‘ਤੇ ਖਾਲਸਾ ਦੀਵਾਨ ਸੋਸਾਇਟੀ ਗੁਰਦੁਆਰੇ ਤੋਂ ਦੱਖਣੀ ਵੈਨਕੂਵਰ ਨੂੰ ਹੁੰਦੇ ਹੋਏ ਨਿੱਕਲੀ ਇਸ ਪਰੇਡ ਵਿੱਚ 25 ਝਾਕੀਆਂ ਸ਼ਾਮਲ ਸਨ।
ਖਾਲਸਾ ਦੀਵਾਨ ਸੋਸਾਇਟੀ ਦੇ ਖਜ਼ਾਨਚੀ ਸੁਖਪਾਲ ਸਿੰਘ ਨੇ ਇਸ ਮੌਕੇ ਸੰਬੋਧਨ ਕਰਦਿਆਂ ਕਿਹਾ ਕਿ ਅਸਲ ਵਿੱਚ ਦੋ ਸਾਲ ਤੋਂ ਬਾਅਦ ਪਿਛਲੇ ਸਾਲ ਵੀ ਵਿਸਾਖੀ ਮਨਾਈ ਗਈ ਸੀ, ਪਰ ਉਸ ਵੇਲੇ ਗੁਰਦੁਆਰਾ ਸਾਹਿਬ ਵਿਖੇ ਹੀ ਖਾਲਸਾ ਸਾਜਨਾ ਦਿਵਸ ਨਾਲ ਸਬੰਧਤ ਧਾਰਮਿਕ ਪ੍ਰੋਗਰਾਮ ਕਰਵਾਏ ਗਏ। ਜਦਕਿ ਇਸ ਵਾਰ ਵੈਨਕੁਵਰ ਦੀਆਂ ਸੜਕਾਂ ‘ਤੇ ਵਿਸਾਖੀ ਪਰੇਡ ਕੱਢ ਕੇ ਖਾਲਸਾ ਸਾਜਨਾ ਦਿਵਸ ਨਾਲ ਸਬੰਧਤ ਸਾਰੇ ਧਾਰਮਿਕ ਸਮਾਗਮ ਕਰਵਾਏ ਗਏ। ਇਹ ਵਿਸਾਖੀ ਪਰੇਡ ਖਾਲਸਾ ਦੀਵਾਨ ਸੋਸਾਇਟੀ ਗੁਰਦੁਆਰਾ ਸਾਹਿਬ ਤੋਂ ਸ਼ੁਰੂ ਹੋ ਕੇ ਦੱਖਣੀ ਵੈਨਕੂਵਰ ਅਤੇ ਇਤਿਹਾਸਕ ਪੰਜਾਬੀ ਮਾਰਕਿਟ ਦੀਆਂ ਸਟਰੀਟਸ ਤੇ ਹੋਰ ਵੱਖ-ਵੱਖ ਥਾਵਾਂ ਤੋਂ ਹੁੰਦੀ ਹੋਈ ਵਾਪਸ ਗੁਰਦੁਆਰਾ ਸਾਹਿਬ ਆ ਕੇ ਸਪੰਨ ਹੋਈ।
ਸਿੱਖਾਂ ਦੇ ਇਸ ਧਾਰਮਿਕ ਪ੍ਰੋਗਰਾਮ ਵਿੱਚ ਬ੍ਰਿਟਿਸ਼ ਕੋਲੰਬੀਆ ਦੇ ਥਾਂ-ਥਾਂ ਕਈ ਪ੍ਰਕਾਰ ਦੇ ਲੰਗਰ ਦੀ ਸੇਵਾ ਵੀ ਨਿਭਾਈ ਗਈ, ਜਿਸ ਵਿੱਚ ਵੱਖ-ਵੱਖ ਭਾਈਚਾਰੇ ਦੇ ਲੋਕਾਂ ਨੇ ਲੰਗਰ ਛਕਿਆ। ਖਰਾਬ ਮੌਸਮ ਦੀ ਭਵਿੱਖਬਾਣੀ ਹੋਣ ਦੇ ਬਾਵਜੂਦ ਹੋਰ ਵੀ ਵੱਡਾ ਇਕੱਠ ਦੇਖਣ ਨੂੰ ਮਿਲਿਆ। ਵੈਨਕੁਵਰ ਦੀ ਵਿਸਾਖੀ ਪਰੇਡ ਤੋਂ ਬਾਅਦ ਹੁਣ ਸਰੀ ਵਿੱਚ 25 ਅਪ੍ਰੈਲ ਨੂੰ ਵਿਸਾਖੀ ਮਨਾਈ ਜਾਵੇਗੀ, ਜਿਸ ਵਿੱਚ ਲੱਖਾਂ ਦੀ ਗਿਣਤੀ ‘ਚ ਸੰਗਤਾਂ ਪੁੱਜਣ ਦੀ ਉਮੀਦ ਹੈ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
