ਟੋਰਾਂਟੋ: ਕੈਨੇਡਾ ਦੀ ਆਬਾਦੀ ਵਧਾਉਣ ‘ਚ ਪਰਵਾਸੀਆਂ ਦਾ ਵੱਡਾ ਯੋਗਦਾਨ ਹੈ। ਸਟੇਟਸ ਕੈਨ ਦੇ ਤਾਜ਼ਾ ਅੰਕੜਿਆਂ ਮੁਤਾਬਕ ਮੌਜੂਦਾ ਸਾਲ ਦੀ ਦੂਜੀ ਤਿਮਾਹੀ ਦੌਰਾਨ ਮੁਲਕ ਦੀ ਆਬਾਦੀ ‘ਚ ਹੋਏ ਵਾਧੇ ਵਿਚੋਂ 94 ਫ਼ੀਸਦੀ ਨਵੇਂ ਪਰਵਾਸੀਆਂ ਦੀ ਆਮਦ ਕਾਰਨ ਹੀ ਸੰਭਵ ਹੋ ਸਕਿਆ। 1 ਜੁਲਾਈ ਨੂੰ ਕੈਨੇਡਾ ਦੀ ਆਬਾਦੀ 3 ਕਰੋੜ 89 ਲੱਖ 30 ਹਜ਼ਾਰ’ਤੇ ਪਹੁੰਚ ਗਈ ਅਤੇ 1 ਅਪਰੈਲ ਦੇ ਮੁਕਾਬਲੇ 0.7 ਫ਼ੀਸਦੀ ਦਾ ਵਾਧਾ ਹੋਇਆ।
ਦੁਨੀਆਂ ਦੇ ਵੱਖ-ਵੱਖ ਕੋਨਿਆਂ ਤੋਂ ਪਰਵਾਸੀ ਕੈਨੇਡਾ ਆ ਰਹੇ ਹਨ ਅਤੇ ਅਪ੍ਰੈਲ ਤੋਂ ਜੂਨ ਤੱਕ ਇਨ੍ਹਾਂ ਸਦਕਾ ਕੈਨੇਡਾ ਦੀ ਆਬਾਦੀ 2 ਲੱਖ 69 ਹਜ਼ਾਰ ਵੱਧ ਗਈ। ਇਥੇ ਇਹ ਵੀ ਦੱਸਣਯੋਗ ਹੈ ਕਿ 2019 ਤੋਂ ਬਾਅਦ ਕਿਸੇ ਤਿਮਾਹੀ ਦੌਰਾਨ ਪਰਵਾਸੀਆਂ ਦੀ ਆਮਦ ਦੇ ਬਰਾਬਰ ਅੰਕੜਾ ਨਹੀਂ ਪਹੁੰਚ ਸਕਿਆ ਜਦੋਂ 2019 ਦੀ ਤੀਜੀ ਤਿਮਾਹੀ ‘ਚ ਇੱਕ ਲੱਖ 76,000 ਪਰਵਾਸੀ ਕੈਨੇਡਾ ਪੁੱਜੇ ਸਨ।
ਦੇਖਿਆ ਜਾਵੇ ਤਾਂ ਮੌਜੂਦਾ ਸਾਲ ਦੀ ਦੂਜੀ ਤਿਮਾਹੀ ਦੌਰਾਨ 1,18,000 ਨਵੇਂ ਪਰਵਾਸੀਆਂ ਨੇ ਕੈਨੇਡਾ ਦੀ ਧਰਤੀ ‘ਤੇ ਕਦਮ ਰੱਖਿਆ। ਜੇਕਰ ਦੇਖਿਆ ਜਾਵੇ ਤਾਂ ਆਬਾਦੀ ਵਿੱਚ ਵਾਧੇ ਯੋਗਦਾਨ ਕੱਚੇ ਪਰਵਾਸੀਆਂ ਨੇ ਪਾਇਆ ਹੈ, ਜਿਨ੍ਹਾਂ ਵਿਚ ਕੌਮਾਂਤਰੀ ਵਿਦਿਆਰਥੀ, ਵਰਕ ਪਰਮਿਟ ਵਾਲੇ ਅਤੇ ਰਫ਼ਿਊਜੀ ਸ਼ਾਮਲ ਹਨ।
ਸਟੈਟਸ ਕੈਨ ਮੁਤਾਬਕ ਰੋਜ਼ਾਨਾ 3100 ਜਣੇ ਕੈਨੇਡੀਅਨ ਆਬਾਦੀ ਵਿਚ ਜੁੜ ਰਹੇ ਹਨ। ਕੌਮਾਂਤਰੀ ਪਰਵਾਸੀ ਦੇ ਆਧਾਰ ‘ਤੇ ਕੈਨੇਡਾ ਵੱਲੋਂ ਕਿਰਤੀਆਂ ਦੀ ਕਿੱਲਤ ਦਾ ਟਾਕਰਾ ਕੀਤਾ ਜਾ ਰਿਹਾ ਹੈ। ਮਹਾਂਮਾਰੀ ਦੇ ਸ਼ੁਰੂ ਵਿੱਚ ਇਮੀਗ੍ਰੇਸ਼ਨ ਦੀ ਰਫ਼ਤਾਰ ਕਾਫ਼ੀ ਹੱਦ ਤੱਕ ਘਟ ਗਈ ਜਿਸ ਨੂੰ ਤੇਜ਼ ਕਰਨ ਵਿਚ ਫੈਡਰਲ ਸਰਕਾਰ ਨੇ ਬਹੁਤ ਕੋਸ਼ਿਸ਼ਾਂ ਕੀਤੀਆਂ। ਇਸ ਸਾਲ ਕੈਨੇਡਾ ਵੱਲੋਂ 4 ਲੱਖ 30 ਹਜ਼ਾਰ ਨਵੇਂ ਪਰਵਾਸੀ ਸੱਦਣ ਦਾ ਟੀਚਾ ਮਿੱਥਿਆ ਗਿਆ ਹੈ ਜਦਕਿ ਅਗਲ ਸਾਲ 4.50 ਲੱਖ ਤੋਂ ਵੱਧ ਪਰਵਾਸੀਆਂ ਨੂੰ ਪੀ.ਆਰ. ਦਿੱਤੀ ਜਾ ਸਕਦੀ ਹੈ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
