ਲੁਧਿਆਣਾ : ਮਥੁਰਾ ਦੇ ਵ੍ਰਿੰਦਾਵਨ ਵਿੱਚ ਯਮੁਨਾ ਨਦੀ ਵਿੱਚ ਹੋਏ ਦੁਖਦਾਈ ਕਿਸ਼ਤੀ ਹਾਦਸੇ ‘ਚ ਬਚਾਅ ਟੀਮਾਂ ਨੇ ਦੋ ਹੋਰ ਲਾਸ਼ਾਂ ਬਰਾਮਦ ਕੀਤੀਆਂ ਹਨ। ਇਹ ਲਾਸ਼ਾਂ ਲੁਧਿਆਣਾ ਦੇ ਇੱਕ ਨੌਜਵਾਨ ਅਤੇ ਇੱਕ ਨਵ-ਵਿਆਹੀ ਔਰਤ ਦੀਆਂ ਹਨ। ਇਸ ਘਟਨਾ ਵਿੱਚ ਮਰਨ ਵਾਲਿਆਂ ਦੀ ਗਿਣਤੀ ਹੁਣ 15 ਤੱਕ ਪਹੁੰਚ ਗਈ ਹੈ। ਫੌਜ, ਐਨਡੀਆਰਐਫ ਅਤੇ ਐਸਡੀਆਰਐਫ ਦੇ 250 ਕਰਮਚਾਰੀ ਇੱਕ ਹੋਰ ਲਾਪਤਾ ਨੌਜਵਾਨ ਨੂੰ ਲੱਭਣ ਲਈ 20 ਕਿਲੋਮੀਟਰ ਦੇ ਘੇਰੇ ਵਿੱਚ ਇੱਕ ਤੀਬਰ ਖੋਜ ਮੁਹਿੰਮ ਚਲਾ ਰਹੇ ਹਨ।
ਦੱਸ ਦਈਏ ਕਿ ਬਰਾਮਦ ਹੋਈਆਂ ਲਾਸ਼ਾਂ ਦੀ ਪਛਾਣ ਲੁਧਿਆਣਾ ਦੇ ਜੱਸੀਆਂ ਰੋਡ ਰਹਿਣ ਵਾਲੇ 22 ਸਾਲਾ ਯਸ਼ ਭੱਲਾ ਹੈ ਅਤੇ ਦੁੱਗਰੀ ਦੀ ਰਹਿਣ ਵਾਲੀ ਮੋਨਿਕਾ ਵਜੋਂ ਹੋਈ ਹੈ। ਪਹਿਲੀ ਵਾਰ ਕ੍ਰਿਸ਼ਨ ਸ਼ਹਿਰ ਗਏ ਯਸ਼ ਦੇ ਘਰ ਮਾਤਮ ਛਾਇਆ ਹੋਇਆ ਹੈ ਅਤੇ ਉਸਦੀ ਮਾਂ ਦੇ ਹੰਝੂ ਰੁਕ ਨਹੀਂ ਰਹੇ। ਯਸ਼ ਬਾਂਕੇ ਬਿਹਾਰੀ ਸਮੂਹ ਨਾਲ ਢੋਲ ਵਜਾਉਣ ਲਈ ਵ੍ਰਿੰਦਾਵਨ ਆਇਆ ਸੀ, ਅਤੇ ਹਾਦਸੇ ਤੋਂ ਠੀਕ ਪਹਿਲਾਂ ਬਣਾਈ ਗਈ ਇੱਕ ਵੀਡੀਓ ਵਿੱਚ ਉਹ ਪੂਰੀ ਸ਼ਰਧਾ ਨਾਲ ਭਜਨ ਗਾਉਂਦੇ ਨਜ਼ਰ ਆਇਆ। ਉਸਨੇ ਆਪਣੀ ਮਾਂ ਨਾਲ ਵਾਅਦਾ ਕੀਤਾ ਸੀ ਕਿ ਉਹ ਅਗਲੀ ਵਾਰ ਉਸਨੂੰ ਨਾਲ ਲੈ ਜਾਵੇਗਾ।
ਦੂਜੇ ਪਾਸੇ ਮੋਨਿਕਾ ਜਿਸਨੇ ਸਿਰਫ਼ ਛੇ ਮਹੀਨੇ ਪਹਿਲਾਂ ਵਿਆਹ ਕਰਵਾਇਆ ਸੀ, ਆਪਣੀ ਸੱਸ ਸਵਿਤਾ ਨਾਲ ਇਸ ਧਾਰਮਿਕ ਯਾਤਰਾ ‘ਤੇ ਗਈ ਸੀ। ਮੋਨਿਕਾ ਦਾ ਪਤੀ ਇਸ ਸਮੇਂ ਵਿਦੇਸ਼ ਵਿੱਚ ਰਹਿੰਦਾ ਹੈ ਅਤੇ ਮੋਨਿਕਾ ਨੇ ਵੀ ਜਲਦ ਵਿਦੇਸ਼ ਜਾਣਾ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਮੋਨਿਕਾ ਸ਼ੁਰੂ ਵਿੱਚ ਇਸ ਯਾਤਰਾ ‘ਤੇ ਜਾਣ ਲਈ ਤਿਆਰ ਨਹੀਂ ਸੀ, ਪਰ ਆਪਣੀ ਸੱਸ ਦੇ ਸਮਝਾਉਣ ਤੋਂ ਬਾਅਦ ਉਹ ਵੀ ਨਾਲ ਚਲੀ ਗਈ।
ਹਾਦਸੇ ਵਾਲੇ ਦਿਨ, ਮੋਨਿਕਾ ਆਪਣੀ ਗੁਆਂਢੀ, ਡਿੰਕੀ ਨਾਲ ਕਿਸ਼ਤੀ ਵਿੱਚ ਸਵਾਰ ਸੀ। ਬੀਤੇ ਐਤਵਾਰ 12 ਅਪ੍ਰੈਲ ਨੂੰ ਡਿੰਕੀ ਦੀ ਲਾਸ਼ ਨਦੀ ਵਿੱਚੋਂ ਬਰਾਮਦ ਕੀਤੀ ਗਈ। ਉੱਤਰ ਪ੍ਰਦੇਸ਼ ਪ੍ਰਸ਼ਾਸਨ ਨੇ ਡਿੰਕੀ ਦੀ ਲਾਸ਼ ਦਾ ਪੋਸਟਮਾਰਟਮ ਕਰਵਾ ਕੇ ਲੁਧਿਆਣਾ ਭੇਜ ਦਿੱਤਾ। ਪਰਿਵਾਰਕ ਮੈਂਬਰ ਲਾਸ਼ ਲੈ ਕੇ ਲੁਧਿਆਣਾ ਪਹੁੰਚੇ, ਪਰ ਦੇਰ ਸ਼ਾਮ ਹੋਣ ਕਾਰਨ ਅੰਤਿਮ ਸੰਸਕਾਰ ਨਹੀਂ ਹੋ ਸਕਿਆ। ਸੋਮਵਾਰ ਸਵੇਰੇ 10 ਵਜੇ ਡਿੰਕੀ ਦਾ ਅੰਤਿਮ ਸੰਸਕਾਰ ਉਸਦੇ ਘਰ ਤੋਂ ਮਾਡਲ ਟਾਊਨ ਸਥਿਤ ਸ਼ਮਸ਼ਾਨਘਾਟ ਪਹੁੰਚਿਆ। ਉੱਥੇ ਵੱਡੀ ਗਿਣਤੀ ਵਿੱਚ ਲੋਕ ਮੌਜੂਦ ਸਨ। ਸਮਾਜਿਕ, ਧਾਰਮਿਕ ਅਤੇ ਰਾਜਨੀਤਿਕ ਲੋਕਾਂ ਨੇ ਡਿੰਕੀ ਨੂੰ ਅੰਤਿਮ ਵਿਦਾਈ ਦਿੱਤੀ।
