ਨਿਊਜ਼ ਡੈਸਕ: ਅਮਰੀਕੀ ਸੰਸਦ ਦੇ ਹੇਠਲੇ ਸਦਨ ਪ੍ਰਤੀਨਿਧੀ ਸਭਾ ਨੇ ਭਾਰਤੀ ਪਾਇਲਟ ਕੈਪਟਨ ਸਮਿਤ ਮੱਛਾਰ ਦੀ ਬਹਾਦਰੀ ਨੂੰ ਸਨਮਾਨ ਦਿੰਦਿਆਂ ਇੱਕ ਪ੍ਰਸਤਾਵ ਪਾਸ ਕੀਤਾ ਹੈ। ਖਾਸ ਗੱਲ ਇਹ ਹੈ ਕਿ ਇਸ ਪ੍ਰਸਤਾਵ ਨੂੰ ਦੋਵਾਂ ਪਾਰਟੀਆਂ ਦਾ ਸਮਰਥਨ ਮਿਲਿਆ। ਪ੍ਰਸਤਾਵ ਵਿੱਚ 30 ਸਤੰਬਰ ਨੂੰ ਫਲਾਈਦੁਬਈ ਦੀ ਉਡਾਣ ਦੌਰਾਨ ਕਾਕਪਿਟ ਵਿੱਚ ਹੋਏ ਹਮਲੇ ਦੇ ਬਾਵਜੂਦ ਕੈਪਟਨ ਮੱਛਾਰ ਵੱਲੋਂ ਦਿਖਾਈ ਹਿੰਮਤ ਦੀ ਸ਼ਲਾਘਾ ਕੀਤੀ ਗਈ ਹੈ। ਇਸ ਘਟਨਾ ਨੂੰ ਪ੍ਰਸਤਾਵ ਵਿੱਚ ਅੱਤਵਾਦੀ ਹਮਲਾ ਕਰਾਰ ਦਿੱਤਾ ਗਿਆ ਹੈ।
ਫਲਾਈਦੁਬਈ ਦੀ ਫਲਾਈਟ FZ1073 30 ਸਤੰਬਰ ਨੂੰ ਦੁਬਈ ਤੋਂ ਤੇਲ ਅਵੀਵ ਲਈ ਰਵਾਨਾ ਹੋਈ ਸੀ। ਉਡਾਣ ਦੌਰਾਨ ਓਮਾਨੀ ਕੋ-ਪਾਇਲਟ ਹਮਾਮ ਅਲ-ਹਮਾਮੀ ਨੇ ਕਾਕਪਿਟ ਵਿੱਚ ਕੈਪਟਨ ਸਮਿਤ ਮੱਛਾਰ ’ਤੇ ਹਮਲਾ ਕਰ ਦਿੱਤਾ। ਹਮਲੇ ਵਿੱਚ ਕੈਪਟਨ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋ ਗਏ।
ਇਸ ਦੌਰਾਨ ਕੁਝ ਯਾਤਰੀ ਕਾਕਪਿਟ ਵਿੱਚ ਪਹੁੰਚੇ ਅਤੇ ਹਮਲਾਵਰ ਨੂੰ ਕਾਬੂ ਕਰਨ ਵਿੱਚ ਮਦਦ ਕੀਤੀ। ਇਸ ਬਹਾਦਰੀ ਲਈ ਅਮਰੀਕੀ ਪ੍ਰਤੀਨਿਧੀ ਸਭਾ ਦੇ ਪ੍ਰਸਤਾਵ ਵਿੱਚ ਉਨ੍ਹਾਂ ਯਾਤਰੀਆਂ ਦੀ ਵੀ ਪ੍ਰਸ਼ੰਸਾ ਕੀਤੀ ਗਈ ਹੈ।
ਹਮਲੇ ਤੋਂ ਬਾਅਦ ਜਹਾਜ਼ ਨੂੰ ਸਾਊਦੀ ਅਰਬ ਦੇ ਤਬੂਕ ਵੱਲ ਮੋੜਿਆ ਗਿਆ। ਉੱਥੇ ਲੈਂਡਿੰਗ ਤੋਂ ਬਾਅਦ ਕੈਪਟਨ ਮੱਛਾਰ ਨੂੰ ਇਲਾਜ ਲਈ ਲਿਜਾਇਆ ਗਿਆ।
ਡੈਂਟਿਸਟ ਨੇ 45 ਮਿੰਟ ਤੱਕ ਸੰਭਾਲਿਆ ਮੋਰਚਾ
ਹਮਲੇ ਤੋਂ ਬਾਅਦ ਜਹਾਜ਼ ਵਿੱਚ ਮੌਜੂਦ ਡੈਂਟਿਸਟ ਡਾ. ਸ਼ੋਤਾ ਮੁਸੇਵ ਨੇ ਕੈਪਟਨ ਦੀ ਜਾਨ ਬਚਾਉਣ ਲਈ ਲਗਭਗ 45 ਮਿੰਟ ਤੱਕ ਲਗਾਤਾਰ ਕੋਸ਼ਿਸ਼ ਕੀਤੀ। ਚੀਖਾਂ ਦੀ ਆਵਾਜ਼ ਸੁਣ ਕੇ ਉਹ ਕਾਕਪਿਟ ਵਿੱਚ ਪਹੁੰਚੇ ਤਾਂ ਕੈਪਟਨ ਫਰਸ਼ ’ਤੇ ਖੂਨ ਨਾਲ ਲਥਪਥ ਪਏ ਸਨ।
ਮੁਸੇਵ ਨੇ ਤੁਰੰਤ ਖੂਨ ਰੋਕਣ ਦੀ ਕੋਸ਼ਿਸ਼ ਸ਼ੁਰੂ ਕੀਤੀ ਅਤੇ ਕੈਪਟਨ ਨੂੰ ਹੋਸ਼ ਵਿੱਚ ਰੱਖਣ ਲਈ ਲਗਾਤਾਰ ਉਨ੍ਹਾਂ ਨਾਲ ਗੱਲ ਕਰਦੇ ਰਹੇ। ਉਨ੍ਹਾਂ ਮੁਤਾਬਕ ਕੈਪਟਨ ਦੇ ਸਿਰ ਅਤੇ ਖੱਬੇ ਹੱਥ ’ਤੇ ਡੂੰਘੇ ਜ਼ਖ਼ਮ ਸਨ। ਉਨ੍ਹਾਂ ਨੇ ਟੀ-ਸ਼ਰਟ ਦੀ ਮਦਦ ਨਾਲ ਜ਼ਖ਼ਮਾਂ ’ਤੇ ਦਬਾਅ ਬਣਾਇਆ, ਪਰ ਖੂਨ ਵਗਣਾ ਜਾਰੀ ਰਿਹਾ।
ਇਸ ਤੋਂ ਬਾਅਦ ਕਰੂ ਤੋਂ ਬਰਫ਼ ਮੰਗਵਾਈ ਗਈ। ਮੁਸੇਵ ਲਗਭਗ 45 ਮਿੰਟ ਤੱਕ ਜ਼ਖ਼ਮਾਂ ’ਤੇ ਦਬਾਅ ਬਣਾਉਂਦੇ ਅਤੇ ਬਰਫ਼ ਲਗਾਉਂਦੇ ਰਹੇ।
ਕੈਪਟਨ ਨੂੰ ਹੋਸ਼ ਵਿੱਚ ਰੱਖਣ ਲਈ ਪੁੱਛੇ ਪਰਿਵਾਰ ਬਾਰੇ ਸਵਾਲ
ਕੈਪਟਨ ਨੂੰ ਹੋਸ਼ ਵਿੱਚ ਰੱਖਣ ਲਈ ਮੁਸੇਵ ਉਨ੍ਹਾਂ ਨਾਲ ਲਗਾਤਾਰ ਗੱਲ ਕਰਦੇ ਰਹੇ। ਉਨ੍ਹਾਂ ਨੇ ਪੁੱਛਿਆ ਕਿ ਉਨ੍ਹਾਂ ਦੇ ਕਿੰਨੇ ਬੱਚੇ ਹਨ ਅਤੇ ਉਨ੍ਹਾਂ ਦੇ ਨਾਮ ਕੀ ਹਨ। ਉਹ ਕੈਪਟਨ ਨੂੰ ਹੌਸਲਾ ਦਿੰਦੇ ਰਹੇ ਕਿ ਉਹ ਜਲਦ ਹੀ ਆਪਣੇ ਪਰਿਵਾਰ ਕੋਲ ਪਹੁੰਚ ਜਾਣਗੇ।
ਕੈਪਟਨ ਨੇ ਆਪਣਾ ਨਾਮ ਅਤੇ ਉਮਰ ਦੱਸੀ। ਉਨ੍ਹਾਂ ਨੇ ਦੱਸਿਆ ਕਿ ਉਹ ਦੁਬਈ ਵਿੱਚ ਰਹਿੰਦੇ ਹਨ ਅਤੇ ਭਾਰਤ ਤੋਂ ਹਨ। ਦਰਦ ਵਿੱਚ ਕੈਪਟਨ ਨੇ ਮਦਦ ਦੀ ਅਪੀਲ ਕਰਦਿਆਂ ਕਿਹਾ ਕਿ ਉਹ ਜਿਊਣਾ ਚਾਹੁੰਦੇ ਹਨ ਅਤੇ ਉੱਥੇ ਮਰਨਾ ਨਹੀਂ ਚਾਹੁੰਦੇ।
ਮੁਸੇਵ ਦੇ ਅਨੁਸਾਰ, ਇੱਕ ਸਮੇਂ ਕੈਪਟਨ ਦੀ ਨਬਜ਼ ਬਹੁਤ ਹੌਲੀ ਹੋ ਗਈ ਸੀ। ਉਨ੍ਹਾਂ ਨੇ ਕੈਪਟਨ ਦੇ ਪੈਰ ਉੱਪਰ ਕੀਤੇ ਤਾਂ ਨਬਜ਼ ਮੁੜ ਚੱਲਣ ਲੱਗੀ। ਜਦੋਂ ਕੈਪਟਨ ਦੇ ਬੁੱਲ੍ਹ ਨੀਲੇ ਪੈਣ ਲੱਗੇ ਤਾਂ ਉਨ੍ਹਾਂ ਨੇ ਕਰੂ ਨੂੰ ਜਹਾਜ਼ ਜਲਦੀ ਲੈਂਡ ਕਰਵਾਉਣ ਲਈ ਕਿਹਾ।
ਕੈਪਟਨ ਨੇ ਦਰਦ ਦੀ ਦਵਾਈ ਮੰਗੀ, ਪਰ ਮੁਸੇਵ ਨੇ ਦਵਾਈ ਦੇਣ ਤੋਂ ਇਨਕਾਰ ਕਰ ਦਿੱਤਾ। ਉਨ੍ਹਾਂ ਦਾ ਮੰਨਣਾ ਸੀ ਕਿ ਕੈਪਟਨ ਦਾ ਕਾਫ਼ੀ ਖੂਨ ਵਹਿ ਰਿਹਾ ਸੀ ਅਤੇ ਅਜਿਹੀ ਹਾਲਤ ਵਿੱਚ ਉਨ੍ਹਾਂ ਨੂੰ ਹਿਲਾਉਣ ਜਾਂ ਦਵਾਈ ਦੇਣ ਨਾਲ ਖੂਨ ਹੋਰ ਵੱਧ ਸਕਦਾ ਸੀ।
