ਸੋਨੀਪਤ: ਹਰਿਆਣਾ ਦੇ ਸੋਨੀਪਤ ਸਥਿਤ ਇੱਕ ਬਿਰਧ ਆਸ਼ਰਮ ਤੋਂ ਇੱਕ ਭਾਵੁਕ ਕਰਨ ਵਾਲੀ ਘਟਨਾ ਸਾਹਮਣੇ ਆਈ ਹੈ। ਇੱਥੇ ਰਹਿ ਰਹੇ ਸ਼ਿਵਚਰਨ ਰਾਮ ਰਤਨ ਗੁਪਤਾ ਬਜ਼ੁਰਗ ਦੀ ਲੰਬੀ ਬਿਮਾਰੀ ਤੋਂ ਬਾਅਦ ਮੌਤ ਹੋ ਗਈ। ਉਨ੍ਹਾਂ ਦੇ ਦੇਹਾਂਤ ਮਗਰੋਂ ਆਸ਼ਰਮ ਪ੍ਰਬੰਧਨ ਨੇ ਤਿੰਨੋਂ ਧੀਆਂ ਨਾਲ ਸੰਪਰਕ ਕੀਤਾ, ਪਰ ਕੋਈ ਵੀ ਅੰਤਿਮ ਸਸਕਾਰ ਵਿੱਚ ਸ਼ਾਮਲ ਹੋਣ ਲਈ ਸੋਨੀਪਤ ਨਹੀਂ ਪਹੁੰਚੀ। ਧੀਆਂ ਨੇ ਵੀਡੀਓ ਕਾਲ ਰਾਹੀਂ ਹੀ ਆਪਣੇ ਪਿਤਾ ਨੂੰ ਅੰਤਿਮ ਵਿਦਾਈ ਦਿੱਤੀ।
ਆਸ਼ਰਮ ਅਤੇ ਸਥਾਨਕ ਲੋਕਾਂ ਨੇ ਕੀਤਾ ਅੰਤਿਮ ਸੰਸਕਾਰ
ਸ਼ਿਵਚਰਨ ਗੁਪਤਾ ਮੁੰਬਈ ਦੇ ਰਹਿਣ ਵਾਲੇ ਅਤੇ ਸਾਬਕਾ ਟੈਕਸਟਾਈਲ ਵਪਾਰੀ ਸਨ। ਉਹ ਕਰੀਬ ਡੇਢ ਸਾਲ ਤੋਂ ਪੱਛਮੀ ਰਾਮ ਨਗਰ ਸਥਿਤ ਬਿਰਧ ਆਸ਼ਰਮ ਵਿੱਚ ਰਹਿ ਰਹੇ ਸਨ। ਉਨ੍ਹਾਂ ਦੀ ਪਤਨੀ ਦਾ ਪਹਿਲਾਂ ਹੀ ਦੇਹਾਂਤ ਹੋ ਚੁੱਕਾ ਸੀ। ਮੰਗਲਵਾਰ ਸਵੇਰੇ ਕਰੀਬ 3:30 ਵਜੇ ਉਨ੍ਹਾਂ ਨੇ ਆਖਰੀ ਸਾਹ ਲਿਆ। ਇਸ ਤੋਂ ਬਾਅਦ ਬਿਰਧ ਆਸ਼ਰਮ ਦੇ ਪ੍ਰਬੰਧਨ ਅਤੇ ਸਥਾਨਕ ਲੋਕਾਂ ਦੀ ਮਦਦ ਨਾਲ ਉਨ੍ਹਾਂ ਦਾ ਅੰਤਿਮ ਸੰਸਕਾਰ ਕੀਤਾ ਗਿਆ।
ਆਸ਼ਰਮ ਦੇ ਪ੍ਰਸ਼ਾਸਕ ਆਨੰਦ ਕੁਮਾਰ ਮੁਤਾਬਕ, ਸ਼ਿਵਚਰਨ ਗੁਪਤਾ ਆਸ਼ਰਮ ਦੇ ਫ਼ੋਨ ਰਾਹੀਂ ਆਪਣੀਆਂ ਧੀਆਂ ਨਾਲ ਗੱਲ ਕਰਦੇ ਰਹਿੰਦੇ ਸਨ। ਪਰ ਜਦੋਂ ਉਨ੍ਹਾਂ ਦੀ ਸਿਹਤ ਵਿਗੜਨੀ ਸ਼ੁਰੂ ਹੋਈ ਤਾਂ ਗੱਲਬਾਤ ਵੀ ਘੱਟ ਹੋ ਗਈ। ਉਨ੍ਹਾਂ ਦੱਸਿਆ ਕਿ ਮੌਤ ਤੋਂ ਲਗਭਗ 20 ਦਿਨ ਪਹਿਲਾਂ ਹੀ ਧੀਆਂ ਨੂੰ ਪਿਤਾ ਦੀ ਵਿਗੜਦੀ ਸਿਹਤ ਬਾਰੇ ਜਾਣਕਾਰੀ ਦੇ ਦਿੱਤੀ ਗਈ ਸੀ, ਪਰ ਉਹ ਉਨ੍ਹਾਂ ਨੂੰ ਮਿਲਣ ਨਹੀਂ ਆਈਆਂ।
ਸਮਾਂ ਨਾ ਹੋਣ ਦਾ ਦਿੱਤਾ ਹਵਾਲਾ
ਮੌਤ ਤੋਂ ਬਾਅਦ ਵੀ ਆਸ਼ਰਮ ਪ੍ਰਬੰਧਨ ਨੇ ਧੀਆਂ ਨੂੰ ਸੋਨੀਪਤ ਆਉਣ ਲਈ ਕਿਹਾ ਅਤੇ ਲੋੜੀਂਦੇ ਪ੍ਰਬੰਧ ਕਰਨ ਦੀ ਗੱਲ ਵੀ ਦੱਸੀ। ਹਾਲਾਂਕਿ ਧੀਆਂ ਨੇ ਯਾਤਰਾ ਲਈ ਸਮਾਂ ਨਾ ਹੋਣ ਦੀ ਗੱਲ ਕਹੀ। ਬਾਅਦ ਵਿੱਚ ਉਨ੍ਹਾਂ ਨੇ ਵੀਡੀਓ ਕਾਲ ਰਾਹੀਂ ਅੰਤਿਮ ਸਸਕਾਰ ਦੇਖਿਆ। ਨੇਪਾਲ ਵਿੱਚ ਰਹਿਣ ਵਾਲੀ ਵੱਡੀ ਧੀ ਅਨੀਤਾ ਨੇ 5,100 ਰੁਪਏ ਆਨਲਾਈਨ ਭੇਜ ਕੇ ਪਿਤਾ ਦਾ ਸਸਕਾਰ ਢੰਗ ਨਾਲ ਕਰਨ ਦੀ ਬੇਨਤੀ ਵੀ ਕੀਤੀ। ਸਸਕਾਰ ਤੋਂ ਬਾਅਦ ਧੀਆਂ ਨੇ ਉਸ ਦੀਆਂ ਵੀਡੀਓ ਵੀ ਮੰਗੀਆਂ।
ਆਸ਼ਰਮ ਪ੍ਰਬੰਧਨ ਅਨੁਸਾਰ, ਸ਼ਿਵਚਰਨ ਗੁਪਤਾ ਨੇ ਆਪਣੀਆਂ ਤਿੰਨੋਂ ਧੀਆਂ ਦੀ ਪੜ੍ਹਾਈ ਅਤੇ ਪਰਵਰਿਸ਼ ਲਈ ਪੂਰੀ ਜ਼ਿੰਦਗੀ ਲਗਾ ਦਿੱਤੀ ਸੀ। ਉਹ ਉਨ੍ਹਾਂ ਦੀਆਂ ਸਫਲਤਾਵਾਂ ‘ਤੇ ਮਾਣ ਮਹਿਸੂਸ ਕਰਦੇ ਸਨ। ਦੋ ਧੀਆਂ ਅਧਿਆਪਕ ਹਨ। ਵੱਡੀ ਧੀ ਅਨੀਤਾ ਨੇਪਾਲ, ਦੂਜੀ ਧੀ ਨਿਸ਼ਾ ਉੱਤਰ ਪ੍ਰਦੇਸ਼ ਦੇ ਆਜ਼ਮਗੜ੍ਹ ਅਤੇ ਸਭ ਤੋਂ ਛੋਟੀ ਧੀ ਪ੍ਰਿਆ ਮੁੰਬਈ ਵਿੱਚ ਰਹਿੰਦੀ ਹੈ।
ਅੱਖਾਂ ਦਾਨ ਕੀਤੀਆਂ ਗਈਆਂ
ਪਰਿਵਾਰ ਦੀ ਇੱਛਾ ਅਨੁਸਾਰ ਸ਼ਿਵਚਰਨ ਗੁਪਤਾ ਦੀ ਮੌਤ ਤੋਂ ਬਾਅਦ ਉਨ੍ਹਾਂ ਦੀਆਂ ਅੱਖਾਂ ਦਾਨ ਕਰ ਦਿੱਤੀਆਂ ਗਈਆਂ। ਸ਼ੁਰੂ ਵਿੱਚ ਪਰਿਵਾਰ ਨੇ ਅਸਥੀਆਂ ਸੰਭਾਲ ਕੇ ਰੱਖਣ ਲਈ ਕਿਹਾ ਸੀ, ਪਰ ਬਾਅਦ ਵਿੱਚ ਸੋਨੀਪਤ ਨਾ ਆ ਸਕਣ ਦੀ ਗੱਲ ਕਹਿੰਦੇ ਹੋਏ ਆਸ਼ਰਮ ਪ੍ਰਬੰਧਨ ਨੂੰ ਹੀ ਗੰਗਾ ਵਿੱਚ ਅਸਥੀਆਂ ਵਿਸਰਜਿਤ ਕਰਨ ਦੀ ਬੇਨਤੀ ਕੀਤੀ।
