ਮੇਰਠ : ਇੱਕ ਵੱਡੀ ਕਾਰਵਾਈ ਕਰਦਿਆਂ ਉੱਤਰ ਪ੍ਰਦੇਸ਼ ਦੇ ਅੱਤਵਾਦ ਰੋਕੂ ਦਸਤੇ (A.T.S) ਦੇਸ਼ ਦੇ ਸਭ ਤੋਂ ਵੱਡੇ ਧਰਮ ਪਰਿਵਰਤਨ ਰੈਕੇਟ ਦਾ ਭਾਂਡਾ ਭੰਨਿਆ ਹੈ। ਏਟੀਐੱਸ ਨੇ ਇਸਲਾਮਕ ਵਿਦਵਾਨ ਮੌਲਾਨਾ ਕਲੀਮ ਸਿੱਦੀਕੀ ਨੂੰ ਮੇਰਠ ਤੋਂ ਗ੍ਰਿਫ਼ਤਾਰ ਕੀਤਾ ਹੈ। ਯੂਪੀ ਏਟੀਐੱਸ ਮੁਤਾਬਕ ਸਿੱਦੀਕੀ ਨੂੰ ਧਰਮ ਪਰਿਵਰਤਨ ਕਰਵਾਉਣ ਦੇ ਦੋਸ਼ ਵਿਚ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਉਨ੍ਹਾਂ ਦਾ ਨਾਂ ਉਮਰ ਗੌਤਮ ਮਾਮਲੇ ਦੀ ਜਾਂਚ ਦੌਰਾਨ ਸਾਹਮਣੇ ਆਇਆ ਸੀ। ਉਮਰ ਨੂੰ ਜੂਨ ‘ਚ ਪੁਲਿਸ ਵੱਲੋਂ ਕਥਿਤ ਰੂਪ ‘ਚ ਧਰਮ ਪਰਿਵਰਤਨ ਰੈਕੇਟ ਚਲਾਉਣ ਦੇ ਦੋਸ਼ ਵਿਚ ਗ੍ਰਿਫ਼ਤਾਰ ਕਰਨ ਤੋਂ ਬਾਅਦ ਜੇਲ੍ਹ ‘ਚ ਡੱਕ ਦਿੱਤਾ ਗਿਆ ਸੀ।
64 ਸਾਲਾ ਇਸਲਾਮਕ ਵਿਦਵਾਨ ਮੌਲਾਨਾ ਕਲੀਮ ਸਿੱਦੀਕੀ ਸ਼ੱਕੀ ਗਤੀਵਿਧੀਆਂ ਨੂੰ ਲੈ ਕੇ ਸੁਰੱਖਿਆ ਏਜੰਸੀਆਂ ਦੇ ਰਡਾਰ ‘ਤੇ ਸਨ। ਮੰਗਲਵਾਰ ਦੇਰ ਰਾਤ ਮੇਰਠ ਪਹੁੰਚਦੇ ਹੀ ਉਸ ਨੂੰ ਚੁੱਕ ਲਿਆ ਗਿਆ। ਫਿਲਹਾਲ ਪੁਲਿਸ ਉਨ੍ਹਾਂ ਤੋਂ ਪੁੱਛਗਿੱਛ ਕਰ ਰਹੀ ਹੈ।
On the basis of credible inputs, UP ATS has arrested Maulana Kaleem Siddiqui on 21.9.21 from Meerut in connection with running India's largest religious conversion syndicate.
Six teams of ATS have been formed to investigate this case- https://t.co/ICTzzmnXSe pic.twitter.com/vK96F7wj82
— UP POLICE (@Uppolice) September 22, 2021
ਏਟੀਐੱਸ ਦੇ ਬੁਲਾਰੇ ਅਨੁਸਾਰ ਮੌਲਾਨਾ ਕਲੀਮ ਸਿੱਦੀਕੀ ਯੂਪੀ ਦੇ ਮੁਜੱਫਰਨਗਰ ਦੇ ਫੂਲਤ ਦਾ ਰਹਿਣ ਵਾਲਾ ਹੈ। ਪੁਲਿਸ ਮੁਤਾਬਕ ਇਸਲਾਮਕ ਮੌਲਵੀ ਜਾਮੀਆ ਇਮਾਮ ਵੱਲੀਉੱਲ੍ਹਾ ਟਰੱਸਟ ਚਲਾਉਂਦਾ ਹੈ। ਜੋ ਕਈ ਮਦਰੱਸਿਆਂ ਨੂੰ ਫੰਡ ਕਰਦਾ ਹੈ ਜਿਸ ਦੇ ਲਈ ਸਿੱਦੀਕੀ ‘ਤੇ ਵਿਦੇਸ਼ੀ ਫੰਡਿੰਗ ਹਾਸਲ ਕਰਨ ਦਾ ਦੋਸ਼ ਹੈ।
ਉੱਤਰ ਪ੍ਰਦੇਸ਼ ਦੇ ਏਡੀਜੀ (ਕਾਨੂੰਨ ਅਤੇ ਵਿਵਸਥਾ) ਪ੍ਰਸ਼ਾਂਤ ਕੁਮਾਰ ਨੇ ਦੱਸਿਆ ਕਿ ਜਾਂਚ ਤੋਂ ਪਤਾ ਚੱਲਦਾ ਹੈ ਕਿ ਮੌਲਾਨਾ ਕਲੀਮ ਸਿੱਦੀਕੀ ਦੇ ਟਰੱਸਟ ਨੂੰ ਬਹਿਰੀਨ ਤੋਂ 1.5 ਕਰੋੜ ਰੁਪਏ ਸਮੇਤ ਵਿਦੇਸ਼ੀ ਫੰਡਿੰਗ ਵਿੱਚ 3 ਕਰੋੜ ਰੁਪਏ ਮਿਲੇ ਹਨ। ਇਸ ਮਾਮਲੇ ਦੀ ਜਾਂਚ ਲਈ ਏਟੀਐਸ ਦੀਆਂ ਛੇ ਟੀਮਾਂ ਬਣਾਈਆਂ ਗਈਆਂ ਹਨ। ਪਤਾ ਚੱਲਿਆ ਹੈ ਕਿ ਹੁਣ ਤਕ ਮੌਲਾਨਾ ਵੱਲੋਂ ਇੱਕ ਹਜ਼ਾਰ ਤੋਂ ਵੱਧ ਲੋਕਾਂ ਦਾ ਧਰਮ ਪਰਿਵਰਤਨ ਕੀਤਾ ਗਿਆ। ਫਿਲਹਾਲ ਅੱਗੇ ਦੀ ਜਾਂਚ ਜਾਰੀ ਹੈ।
