ਗੁਜਰਾਤ: ਅਹਿਮਦਾਬਾਦ ‘ਚ ਬੁੱਧਵਾਰ ਨੂੰ ਇੱਕ ਪੁਲਿਸ ਕਾਂਸਟੇਬਲ ਨੇ ਆਪਣੀ ਪਤਨੀ ਅਤੇ 3 ਸਾਲ ਦੀ ਧੀ ਨਾਲ ਇਮਾਰਤ ਦੀ 12ਵੀਂ ਮੰਜ਼ਿਲ ਤੋਂ ਛਾਲ ਮਾਰ ਕੇ ਖੁਦਕੁਸ਼ੀ ਕਰ ਲਈ। ਇਸ ਸਬੰਧੀ ਜਾਣਕਾਰੀ ਦਿੰਦੇ ਪੁਲਿਸ ਨੇ ਦੱਸਿਆ ਕਿ ਘਟਨਾ ਬੁੱਧਵਾਰ ਤੜਕੇ 1.30 ਵਜੇ ਦੇ ਲਗਭਗ ਵਾਪਰੀ। ਮ੍ਰਿਤਕਾਂ ਦੀ ਪਛਾਣ ਵਸਤਰਾਪੁਰ ਥਾਣੇ ‘ਚ ਤਾਇਨਾਤ ਕਾਂਸਟੇਬਲ ਕੁਲਦੀਪ ਸਿੰਘ ਯਾਦਵ, ਉਸ ਦੀ ਪਤਨੀ ਰਿੱਧੀ ਅਤੇ ਲਗਭਗ 3 ਸਾਲ ਦੀ ਧੀ ਅਕਾਂਗਸ਼ੀ ਵਜੋਂ ਹੋਈ ਹੈ।
ਸੁਸਾਇਟੀ ‘ਚ ਰਹਿਣ ਵਾਲੇ ਲੋਕਾਂ ਨੇ ਦੱਸਿਆ ਕਿ ਪਹਿਲਾਂ ਰਿੱਧੀ ਨੇ ਛਾਲ ਮਾਰੀ, ਉਸ ਤੋਂ ਬਾਅਦ ਕੁਲਦੀਪ ਨੇ ਆਪਣੀ ਬੇਟੀ ਸਣੇ 12ਵੀਂ ਮੰਜ਼ਿਲ ਤੋਂ ਛਾਲ ਮਾਰ ਦਿੱਤੀ। ਉਨ੍ਹਾਂ ਦੇ ਇਮਾਰਤ ਤੋਂ ਡਿੱਗਣ ਵਿਚਾਲੇ ਸਿਰਫ਼ 10 ਸਕਿੰਟ ਦਾ ਅੰਤਰ ਹੈ। ਐਫਐਸਐਲ ਦੀ ਰਿਪੋਰਟ ਵਿੱਚ ਇਹ ਵੀ ਸਾਹਮਣੇ ਆਇਆ ਹੈ ਕਿ ਕਿਸੇ ਨੇ ਕਿਸੇ ਨਾਲ ਧੱਕਾ ਨਹੀਂ ਕੀਤਾ। ਪੁਲਿਸ ਨੇ ਕਿਹਾ ਹੁਣ ਤੱਕ ਦੀ ਜਾਂਚ ਮੁਤਾਬਕ ਇਹ ਖੁਦਕੁਸ਼ੀ ਦਾ ਮਾਮਲਾ ਹੈ ਅਤੇ ਅਸੀਂ ਅਜਿਹਾ ਕਦਮ ਚੁੱਕਣ ਦੇ ਕਾਰਨਾਂ ਦਾ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਾਂ।
ਛਾਲ ਮਾਰਨ ਤੋਂ ਪਹਿਲਾਂ ਕੁਲਦੀਪ ਨੇ ਵਟਸਐਪ ‘ਤੇ ਆਪਣੇ ਫੋਨ ਤੋਂ ਆਪਣੇ ਦੋਸਤਾਂ ਅਤੇ ਸਹਿਕਰਮੀਆਂ ਨੂੰ ਭੇਜੇ ਗਏ ਇੱਕ ਲੰਬੇ ਸੰਦੇਸ਼ ਵਿੱਚ ਉਨ੍ਹਾਂ ਨਾਲ ਬਿਤਾਏ ਪੁਰਾਣੇ ਦਿਨ ਅਤੇ ਚੰਗੇ ਸਮੇਂ ਨੂੰ ਯਾਦ ਕੀਤਾ।
ਉਥੇ ਹੀ ਗੁਆਂਢ ‘ਚ ਰਹਿੰਦੀ ਕੁਲਦੀਪ ਸਿੰਘ ਦੀ ਭੈਣ ਨੇ ਦੱਸਿਆ ਕਿ ਉਹ ਪਤਨੀ ਰਿੱਧੀ ਅਤੇ 3 ਸਾਲਾ ਧੀ ਨਾਲ ਫਲੈਟ ਦੀ 12ਵੀਂ ਮੰਜ਼ਿਲ ‘ਤੇ ਰਹਿੰਦਾ ਸੀ। ਕੁਲਦੀਪ ਅਤੇ ਰਿੱਧੀ ਬਹੁਤ ਚੰਗੇ ਸੁਭਾਅ ਦੇ ਸਨ। ਦੋਵੇਂ ਆਪਣੀ ਧੀ ਨਾਲ ਖੁਸ਼ਹਾਲ ਜ਼ਿੰਦਗੀ ਬਤੀਤ ਕਰ ਰਹੇ ਸਨ। ਦੋਵਾਂ ਨੇ ਕਦੇ ਇਸ ਬਾਰੇ ਗੱਲ ਨਹੀਂ ਕੀਤੀ ਕਿ ਉਨ੍ਹਾਂ ਦੀ ਜ਼ਿੰਦਗੀ ਵਿੱਚ ਕੋਈ ਸਮੱਸਿਆ ਹੈ। ਇਸੇ ਲਈ ਉਨ੍ਹਾਂ ਵਲੋਂ ਇੰਨਾ ਵੱਡਾ ਕਦਮ ਚੁੱਕਿਆ ਜਾਣਾ ਕਿਸੇ ਨੂੰ ਸਮਝ ਨਹੀਂ ਆ ਰਿਹਾ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
