ਬਿੱਲ ਨਾ ਦੇਣ ਲਈ ਖਾਣੇ ‘ਚ ਪਾਇਆ ਪਲਾਸਟਿਕ, ਜਾਣੋ ਫਿਰ ਕੀ ਹੋਇਆ

ਨਿਊਜ਼ ਡੈਸਕ: UK ਦੀ ਇਕ ਔਰਤ ਨੇ ਹਾਈਫਾਈ ਰੈਸਟੋਰੈਂਟ ‘ਚੋਂ ਖਾਣਾ ਖਾਦਾ ਅਤੇ ਜਦੋਂ ਉਸਨੇ ਬਿੱਲ ਦੇਖਿਆ ਤਾਂ ਉਸਦੇ ਹੋਸ਼ ਉੱਡ ਗਏ। ਬਿੱਲ ਨਾ ਦੇਣ ਲਈ ਉਸਨੇ ਇਕ ਤਰਕੀਬ ਸੋਚੀ, ਪਰ ਉਹ ਤਰਕੀਬ ਉਸਤੇ ਹੀ ਭਾਰੀ ਪੈ ਗਈ।

ਰਿਪੋਰਟ ਮੁਤਾਬਕ ਇਸ ਰੈਸਟੋਰੈਂਟ ਦੀ ਮਾਲਕਣ ਨਸੀਮ ਖਾਨ ਦਾ ਦਾਅਵਾ ਹੈ ਕਿ ਇਕ ਔਰਤ ਨੇ ਮੁਫਤ ਭੋਜਨ ਲਈ ਅੰਡਰਗਾਰਮੈਂਟ ‘ਚ ਰੱਖੇ ਸਿਗਰਟ ਦੇ ਪੈਕੇਟ ‘ਚ ਪਲਾਸਟਿਕ ਦਾ ਰੈਪਰ ਪਾੜ ਦਿੱਤਾ ਅਤੇ ਪਲਕ ਝਪਕਦੇ ਹੀ ਚਿਕਨ ਕਰੀ ਦੇ ਕਟੋਰੇ ‘ਚ ਪਾ ਦਿੱਤਾ। ਨਸੀਮ ਨੇ ਦੱਸਿਆ ਕਿ ਪੰਜ ਲੋਕਾਂ ਦਾ ਪਰਿਵਾਰ ਸੋਮਵਾਰ ਦੁਪਹਿਰ ਬਕਿੰਘਮਸ਼ਾਇਰ ਦੇ ਮਿਲਟਨ ਕੀਨਜ਼ ਸਥਿਤ ਉਸ ਦੇ ਮਸ਼ਹੂਰ ‘ਕਰੀ ਹਾਊਸ’ ‘ਚ ਪਹੁੰਚਿਆ ਅਤੇ ਬਹੁਤ ਹੀ ਮਹਿੰਗੇ ਖਾਣੇ ਦਾ ਆਰਡਰ ਦਿੱਤਾ, ਜਿਸ ਦਾ ਬਿੱਲ 170 ਪੌਂਡ ਯਾਨੀ ਕਰੀਬ 16 ਹਜ਼ਾਰ ਰੁਪਏ ਸੀ।

ਪਰਿਵਾਰ ਨੇ ਕੁਝ ਸਾਈਡ ਮੀਲ ਅਤੇ ਡਰਿੰਕਸ ਦੇ ਨਾਲ 4 ਸਟਾਰਟਰਸ ਸਮੇਤ 6 ਮੁੱਖ ਕੋਰਸਾਂ ਦਾ ਆਰਡਰ ਦਿੱਤਾ ਸੀ। ਇਸ ਤੋਂ ਬਾਅਦ ਉਸ ਨੇ ਪੈਸੇ ਨਾ ਦੇਣ ਦੀ ਚਾਲ ਚੱਲੀ, ਜੋ ਸੀਸੀਟੀਵੀ ‘ਚ ਕੈਦ ਹੋ ਗਈ। ਪੁਲਿਸ ਨੇ ਇਸ ਮਾਮਲੇ ਵਿੱਚ ਪਰਚਾ ਦਰਜ ਕਰ ਲਿਆ ਹੈ। ਰੈਸਟੋਰੈਂਟ ਦੇ ਮਾਲਕ ਨੇ ਦੱਸਿਆ ਕਿ ਪਰਿਵਾਰ ਦੇ ਉਥੋਂ ਚਲੇ ਜਾਣ ਤੋਂ ਬਾਅਦ ਜਦੋਂ ਉਸ ਨੇ ਸੀਸੀਟੀਵੀ ਕੈਮਰੇ ਦੀ ਫੁਟੇਜ ਚੈੱਕ ਕੀਤੀ ਤਾਂ ਉਹ ਹੱਕਾ-ਬੱਕਾ ਰਹਿ ਗਿਆ।

ਉਸ ਨੇ ਕਿਹਾ, ‘ਮੈਨੂੰ ਆਪਣੇ ਸਟਾਫ ‘ਤੇ ਪੂਰਾ ਭਰੋਸਾ ਸੀ ਇਸ ਲਈ ਅਜਿਹਾ ਲੱਗਾ ਕਿ ਮੈਨੂੰ ਸੀਸੀਟੀਵੀ ਫੁਟੇਜ ਦੀ ਜਾਂਚ ਕਰਨੀ ਚਾਹੀਦੀ ਹੈ। ਜਦੋਂ ਰਿਕਾਰਡਿੰਗ ਦੀ ਜਾਂਚ ਕੀਤੀ ਗਈ ਤਾਂ ਦਿਖਾਇਆ ਗਿਆ ਕਿ ਔਰਤ ਆਪਣੇ ਟੌਪ ਦੇ ਹੇਠਾਂ ਪਹਿਨੇ ਹੋਏ ਅੰਡਰਗਾਰਮੈਂਟਸ ਨੂੰ ਠੀਕ ਕਰ ਰਹੀ ਸੀ। ਕੁਝ ਦੇਰ ਬਾਅਦ ਉਹ ਵੇਟਰ ਨੂੰ ਬੁਲਾਉਂਦੀ ਹੈ ਅਤੇ ਚੀਕਣਾ ਸ਼ੁਰੂ ਕਰ ਦਿੰਦੀ ਹੈ ਕਿ ਖਾਣੇ ਵਿੱਚ ਪਲਾਸਟਿਕ ਹੈ। ਵੇਟਰ ਨੇ ਦੱਸਿਆ ਕਿ ਅਜਿਹਾ ਪਲਾਸਟਿਕ ਰੈਸਟੋਰੈਂਟ ਦੀ ਰਸੋਈ ਵਿੱਚ ਵੀ ਨਹੀਂ ਵਰਤਿਆ ਜਾਂਦਾ। ਦੂਜੇ ਪਾਸੇ ਕੁਝ ਸੁਣਨ ਦੀ ਬਜਾਏ ਔਰਤ ਦਾ ਰੌਲਾ ਹੋਰ ਵਧ ਜਾਂਦਾ ਹੈ।

ਜਿਸ ਕਾਰਨ ਹੈਰਾਨ ਰਹਿ ਗਏ ਵੇਟਰ ਨੇ ਉਸਨੂੰ 20% ਡਿਸਕਾਉਂਟ ਅਤੇ ਕੁਝ ਮੁਫਤ ਆਰਡਰ ਦੇਣ ਲਈ ਕਿਹਾ। ਇਸ ਦੌਰਾਨ ਪਲਾਸਟਿਕ ਰੱਖਣ ਵਾਲੀ ਔਰਤ ਦਾ ਪਤੀ ਹੋਰ ਵੀ ਭੜਕ ਉੱਠਿਆ ਅਤੇ ਕਹਿੰਦਾ ਹੈ ਕਿ ਉਹ ਬਿੱਲ ਦਾ ਇੱਕ ਰੁਪਇਆ ਵੀ ਨਹੀਂ ਦੇਵੇਗਾ। ਇਸ ਤੋਂ ਬਾਅਦ ਵੇਟਰ ਉਥੋਂ ਚਲਾ ਜਾਂਦਾ ਹੈ ਅਤੇ ਪਰਿਵਾਰ ਵੀ ਉਥੋਂ ਚਲਾ ਜਾਂਦਾ ਹੈ।

ਰੈਸਟੋਰੈਂਟ ਦੇ ਮਾਲਕ ਨੇ ਅੱਗੇ ਕਿਹਾ ਕਿ ਜੇਕਰ ਉਹ ਲੋਕ ਸਹੀ ਅਤੇ ਇਮਾਨਦਾਰ ਹੁੰਦੇ ਅਤੇ ਸਾਡੀ ਗਲਤੀ ਹੁੰਦੀ ਤਾਂ ਉਨ੍ਹਾਂ ਨੂੰ ਮੁਫਤ ਖਾਣਾ ਖੁਆ ਕੇ ਮਾਮਲਾ ਸੁਲਝਾ ਲਿਆ ਜਾਣਾ ਸੀ ਪਰ ਉਨ੍ਹਾਂ ਨੇ ਧੋਖਾਧੜੀ ਕੀਤੀ ਹੈ। ਇਸ ਲਈ ਪੁਲਿਸ ਨੂੰ ਸ਼ਿਕਾਇਤ ਕੀਤੀ ਗਈ ਹੈ। ਇਸ ਮਾਮਲੇ ਦੀ ਜਾਂਚ ਜਾਰੀ ਹੈ। ਫਿਲਹਾਲ ਦੋਸ਼ੀ ਪਰਿਵਾਰ ਦੀ ਗ੍ਰਿਫਤਾਰੀ ਦੀ ਖਬਰ ਨਹੀਂ ਆਈ ਹੈ।