ਨਿਊਜ਼ ਡੈਸਕ: ਪਾਕਿਸਤਾਨ ਵਿੱਚ ਹਿੰਦੂ ਅਤੇ ਹੋਰ ਘੱਟ ਗਿਣਤੀਆਂ ਦੇ ਬੱਚਿਆਂ ਨੂੰ ਜ਼ਬਰਦਸਤੀ ਧਰਮ ਪਰਿਵਰਤਨ ਦਾ ਸ਼ਿਕਾਰ ਬਣਾਇਆ ਜਾ ਰਿਹਾ ਹੈ। ਮਾਸੂਮ ਬੱਚਿਆਂ ਦਾ ਸੰਗਠਿਤ ਅਤੇ ਸੰਸਥਾਗਤ ਤੌਰ ’ਤੇ ਸ਼ੋਸ਼ਣ ਹੋ ਰਿਹਾ ਹੈ, ਜਿੱਥੇ ਧਰਮ ਪਰਿਵਰਤਨ ਲਈ ਦਬਾਅ ਪਾਇਆ ਜਾਂਦਾ ਹੈ ਅਤੇ ਇਨਕਾਰ ਕਰਨ ’ਤੇ ਉਨ੍ਹਾਂ ਨੂੰ ਪ੍ਰਤਾੜਿਆ ਜਾਂਦਾ ਹੈ। ਇਸ ਦਾ ਖੁਲਾਸਾ ਪਾਕਿਸਤਾਨ ਦੇ ਰਾਸ਼ਟਰੀ ਬਾਲ ਅਧਿਕਾਰ ਕਮਿਸ਼ਨ (ਐਨਸੀਆਰਸੀ) ਦੀ ਤਾਜ਼ਾ ਰਿਪੋਰਟ ਵਿੱਚ ਹੋਇਆ ਹੈ।
ਐਨਸੀਆਰਸੀ ਦੀ ਰਿਪੋਰਟ ਨੇ ਪਾਕਿਸਤਾਨ ਵਿੱਚ ਘੱਟ ਗਿਣਤੀਆਂ ਦੇ ਬੱਚਿਆਂ, ਖਾਸਕਰ ਈਸਾਈਆਂ ਅਤੇ ਹਿੰਦੂਆਂ ਨਾਲ ਵਿਆਪਕ ਭੇਦਭਾਵ ਨੂੰ ਉਜਾਗਰ ਕੀਤਾ ਹੈ। ਹਜ਼ਾਰਾਂ ਹਿੰਦੂ ਅਤੇ ਈਸਾਈ ਬੱਚੇ ਜ਼ਬਰਦਸਤੀ ਧਰਮ ਪਰਿਵਰਤਨ, ਬਾਲ ਵਿਆਹ, ਬਾਲ ਮਜ਼ਦੂਰੀ ਅਤੇ ਬੰਧੂਆ ਮਜ਼ਦੂਰੀ ਵਰਗੀਆਂ ਗੰਭੀਰ ਸਮੱਸਿਆਵਾਂ ਦਾ ਸਾਹਮਣਾ ਕਰ ਰਹੇ ਹਨ।
ਬੱਚੀਆਂ ਦਾ ਅਗਵਾ ਅਤੇ ਜ਼ਬਰਦਸਤੀ ਵਿਆਹ
ਰਿਪੋਰਟ ਮੁਤਾਬਕ, ਘੱਟ ਗਿਣਤੀਆਂ ਦੇ ਭਾਈਚਾਰਿਆਂ ਦੀਆਂ ਬੱਚੀਆਂ ਨੂੰ ਅਗਵਾ ਕਰਕੇ ਜ਼ਬਰਦਸਤੀ ਧਰਮ ਪਰਿਵਰਤਨ ਕਰਵਾਇਆ ਜਾਂਦਾ ਹੈ ਅਤੇ ਉਨ੍ਹਾਂ ਦੇ ਵੱਡੀ ਉਮਰ ਦੇ ਮੁਸਲਿਮ ਮਰਦਾਂ ਨਾਲ ਵਿਆਹ ਕਰਵਾਏ ਜਾਂਦੇ ਹਨ। ਇਹ ਘਟਨਾਵਾਂ ਇੱਕ-ਦੋ ਨਹੀਂ, ਸਗੋਂ ਇੱਕ ਨਿਰੰਤਰ ਪ੍ਰਥਾ ਬਣ ਗਈ ਹੈ। ਸੰਸਥਾਗਤ ਪੱਖਪਾਤ, ਕਾਨੂੰਨ ਲਾਗੂ ਕਰਨ ਦੀ ਕਮੀ ਅਤੇ ਸਮਾਜਿਕ ਦਬਾਅ ਕਾਰਨ ਪੀੜਤਾਂ ਕੋਲ ਕੋਈ ਕਾਨੂੰਨੀ ਰਾਹ ਨਹੀਂ ਬਚਦਾ।
ਪੰਜਾਬ ਵਿੱਚ ਸਭ ਤੋਂ ਮਾੜੇ ਹਾਲਾਤ
ਅਪ੍ਰੈਲ 2023 ਤੋਂ ਦਸੰਬਰ 2024 ਤੱਕ, ਐਨਸੀਆਰਸੀ ਨੂੰ ਕਤਲ , ਅਗਵਾ, ਜ਼ਬਰਦਸਤੀ ਧਰਮ ਪਰਿਵਰਤਨ ਅਤੇ ਨਾਬਾਲਗ ਵਿਆਹ ਨਾਲ ਜੁੜੀਆਂ 27 ਅਧਿਕਾਰਤ ਸ਼ਿਕਾਇਤਾਂ ਮਿਲੀਆਂ। ਪਾਕਿਸਤਾਨ ਦੇ ਸਭ ਤੋਂ ਵੱਡੇ ਸੂਬੇ ਪੰਜਾਬ ਵਿੱਚ ਹਾਲਾਤ ਸਭ ਤੋਂ ਖਰਾਬ ਹਨ, ਜਿੱਥੇ ਜਨਵਰੀ 2022 ਤੋਂ ਸਤੰਬਰ 2024 ਤੱਕ ਘੱਟ ਗਿਣਤੀਆਂ ਦੇ ਬੱਚਿਆਂ ਵਿਰੁੱਧ ਹਿੰਸਾ ਦੀਆਂ 40% ਘਟਨਾਵਾਂ ਦਰਜ ਹੋਈਆਂ। ਪੁਲਿਸ ਰਿਕਾਰਡ ਮੁਤਾਬਕ, ਪੀੜਤਾਂ ਵਿੱਚ 547 ਈਸਾਈ, 32 ਹਿੰਦੂ, 2 ਅਹਿਮਦੀਆ ਅਤੇ 2 ਸਿੱਖ ਸ਼ਾਮਲ ਸਨ।
ਇਸ ਤੋਂ ਇਲਾਵਾ ਬੱਚੇ ਸਕੂਲਾਂ ਵਿੱਚ ਵੀ ਸਮਾਜਿਕ ਭੇਦਭਾਵ ਦਾ ਸਾਹਮਣਾ ਕਰਦੇ ਹਨ, ਜਿੱਥੇ ਉਹ ਅੱਗੇ ਬੈਠਣ, ਸਵਾਲ ਪੁੱਛਣ ਜਾਂ ਸਾਂਝੇ ਗਲਾਸ ਵਿੱਚ ਪਾਣੀ ਪੀਣ ਤੋਂ ਵੀ ਝਿਜਕਦੇ ਹਨ। ਉਨ੍ਹਾਂ ਦੀਆਂ ਮਾਨਤਾਵਾਂ ਦਾ ਮਜ਼ਾਕ ਉਡਾਇਆ ਜਾਂਦਾ ਹੈ ਅਤੇ ਇਸਲਾਮ ਅਪਣਾਉਣ ਲਈ ਦਬਾਅ ਪਾਇਆ ਜਾਂਦਾ ਹੈ।
ਬੰਧੂਆ ਮਜ਼ਦੂਰੀ ਦਾ ਸ਼ਿਕਾਰ
ਰਿਪੋਰਟ ਬੰਧੂਆ ਮਜ਼ਦੂਰੀ ਵੱਲ ਵੀ ਧਿਆਨ ਖਿੱਚਦੀ ਹੈ, ਜਿੱਥੇ ਹਿੰਦੂ ਅਤੇ ਈਸਾਈ ਬੱਚੇ ਅਕਸਰ ਇੱਟਾਂ ਦੇ ਭੱਠਿਆਂ ਜਾਂ ਖੇਤੀ ਦੇ ਕੰਮਾਂ ਵਿੱਚ ਜ਼ਬਰਦਸਤੀ ਮਜ਼ਦੂਰੀ ਦੇ ਚੱਕਰ ਵਿੱਚ ਫਸ ਜਾਂਦੇ ਹਨ। ਉਨ੍ਹਾਂ ਦੇ ਪਰਿਵਾਰ ਪੀੜ੍ਹੀ-ਦਰ-ਪੀੜ੍ਹੀ ਗਰੀਬੀ ਅਤੇ ਭੇਦਭਾਵ ਦੇ ਬੋਝ ਹੇਠ ਦੱਬੇ ਹੋਏ ਹਨ।
