ਕਰਾਚੀ: ਆਰਥਿਕ ਸੰਕਟ ‘ਚ ਫਸੇ ਪਾਕਿਸਤਾਨ ਦੀਆਂ ਮੁਸ਼ਕਿਲਾਂ ਅਗਲੇ ਇਕ-ਦੋ ਦਿਨਾਂ ‘ਚ ਹੋਰ ਵਧਣ ਵਾਲੀਆਂ ਹਨ। ਇੱਥੋਂ ਦੀ ਸਭ ਤੋਂ ਵੱਡੀ ਆਇਲ ਰਿਫਾਇਨਰੀ ਡਾਲਰਾਂ ਦੀ ਕਮੀ ਕਾਰਨ ਬੰਦ ਹੋ ਗਈ ਹੈ। ਰਿਪੋਰਟ ਮੁਤਾਬਕ ਪਿਛਲੇ ਸਮੇਂ ‘ਚ ਰੁਪਏ ਦੀ ਕੀਮਤ ‘ਚ ਇਤਿਹਾਸਕ ਗਿਰਾਵਟ ਆਈ ਹੈ। ਇਸ ਨਾਲ ਕੱਚੇ ਤੇਲ ਦੀ ਦਰਾਮਦ ਸਮਰੱਥਾ ‘ਤੇ ਕਾਫੀ ਅਸਰ ਪਿਆ ਹੈ। ਅਜਿਹੇ ‘ਚ ਇਹ ਮੁਸ਼ਕਿਲ ਫੈਸਲਾ ਲੈਣਾ ਪਿਆ ਹੈ। ਰਿਫਾਇਨਰੀ ਵਿੱਚ ਕੱਚਾ ਤੇਲ ਨਹੀਂ ਬਚਿਆ ਹੈ।
ਸੇਨਰਜੀਕੋ ਦੇਸ਼ ਦੀ ਸਭ ਤੋਂ ਵੱਡੀ ਤੇਲ ਰਿਫਾਇਨਰੀ ਹੈ। ਇਸ ਦੇ ਖਪਤਕਾਰ ਹੈੱਡ ਸੇਲਜ਼ ਸਈਦ ਆਦਿਲ ਆਜ਼ਮ ਦੀ ਤਰਫੋਂ 31 ਜਨਵਰੀ ਨੂੰ ਪੈਟਰੋਲੀਅਮ ਮੰਤਰਾਲੇ ਨੂੰ ਪੱਤਰ ਲਿਖਿਆ ਗਿਆ ਸੀ। ਇਸ ਵਿਚ ਕਿਹਾ ਗਿਆ ਹੈ ਕਿ ਸੇਨਰਜੀਕੋ ਰਿਫਾਇਨਰੀ ਨੂੰ 2 ਫਰਵਰੀ ਤੱਕ ਬੰਦ ਕਰਨਾ ਪਿਆ ਸੀ ਅਤੇ 10 ਫਰਵਰੀ ਤੋਂ ਤੇਲ ਦੇ ਜਹਾਜ਼ ਆਉਣ ‘ਤੇ ਹੀ ਕੰਮ ਮੁੜ ਸ਼ੁਰੂ ਕੀਤਾ ਜਾ ਸਕੇਗਾ। ਇਸ ਰਿਫਾਇਨਰੀ ਨੂੰ ਪਹਿਲਾਂ ਬੀਕੋ ਪੈਟਰੋਲੀਅਮ ਵਜੋਂ ਜਾਣਿਆ ਜਾਂਦਾ ਸੀ। ਰਿਫਾਇਨਰੀ ਵਿੱਚ ਪ੍ਰਤੀ ਦਿਨ 156,000 ਬੈਰਲ ਕੱਚੇ ਤੇਲ ਨੂੰ ਪ੍ਰੋਸੈਸ ਕਰਨ ਦੀ ਸਮਰੱਥਾ ਹੈ। ਇੱਥੇ ਪੈਟਰੋਲੀਅਮ, ਡੀਜ਼ਲ, ਫਰਨੇਸ ਆਇਲ ਅਤੇ ਹੋਰ ਪੈਟਰੋਲੀਅਮ ਪਦਾਰਥਾਂ ਨੂੰ ਸ਼ੁੱਧ ਕੀਤਾ ਜਾਂਦਾ ਹੈ।
