ਟੋਰਾਂਟੋ: ਓਨਟਾਰੀਓ ਦੇ ਸਿੱਖਿਆ ਮੁਲਾਜ਼ਮਾਂ ਦੀ ਹੜਤਾਲ ਰੁਕਵਾਉਣ ਲਈ ਫ਼ੋਰਡ ਸਰਕਾਰ ਵੱਲੋਂ ਲਗਾਤਾਰ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਇਸ ਦੇ ਵਿਰੋਧ ‘ਚ ਸੈਂਕੜੇ ਪ੍ਰਦਰਸ਼ਨਕਾਰੀ ਟੋਰਾਂਟੋ ਦੇ ਡਾਊਨ ਟਾਊਨ ‘ਚ ਇਕੱਠੇ ਹੋਏ ਅਤੇ ਸ਼ੁੱਕਰਵਾਰ ਤੋਂ ਹਰ ਹਾਲਤ ‘ਚ ਹੜਤਾਲ ‘ਤੇ ਜਾਣ ਦਾ ਐਲਾਨ ਕੀਤਾ। ਇਹ ਰੈਲੀ ਓਨਟਾਰੀਓ ਫੈਡਰੇਸ਼ਨ ਆਫ਼ ਲੇਬਰ ਵੱਲੋਂ ਕਰਵਾਈ ਗਈ ਜੋ ਯੂਨੀਵਰਸਿਟੀ ਐਵੇਨਿਊ ਵਿਖੇ ਸ਼ੁਰੂ ਹੋਣ ਤੋਂ ਬਾਅਦ ਕੁਈਨਜ਼ ਪਾਰਕ ਵਿਖੇ ਖਤਮ ਹੋਈ। ਡਗ ਫ਼ੋਰਡ ਸਰਕਾਰ ਵੱਲੋਂ ਹੜਤਾਲ ਰੋਕਣ ਲਈ ਨਵਾਂ ਬਿੱਲ ਪੇਸ਼ ਕੀਤਾ ਗਿਆ ਹੈ ਜਿਸ ਦੇ ਪਾਸ ਹੋਣ ਤੋਂ ਬਾਅਦ ਕੰਮ ‘ਤੇ ਨਾਂ ਆਉਣ ਵਾਲੇ ਮੁਲਾਜ਼ਮ ਨੂੰ ਹਰ ਰੋਜ਼ 4 ਹਜ਼ਾਰ ਡਾਲਰ ਦਾ ਜੁਰਮਾਨਾ ਕੀਤਾ ਜਾ ਸਕਦਾ ਹੈ ਅਤੇ ਮੁਲਾਜ਼ਮ ਯੂਨੀਅਨ ਵੀ 5 ਲੱਖ ਡਾਲਰ ਤੱਕ ਦੇ ਜੁਰਮਾਨੇ ਦੀ ਦੇਣਦਾਰ ਬਣਾਈ ਜਾ ਸਕਦੀ ਹੈ।
‘ਕੀਪਿੰਗ ਸਟੂਡੈਂਟਸ ਇਨ ਸਕੂਲਜ਼ ਐਕਟ’ ਅਧੀਨ ਸਿੱਖਿਆ ਮੁਲਾਜ਼ਮਾਂ ਨੂੰ ਚਾਰ ਸਾਲ ਦੇ ਕੰਟਰੈਕਟ ‘ਚ ਵੀ ਬੰਨ੍ਹਿਆ ਜਾ ਰਿਹਾ ਹੈ ਜਿਸ ਤਹਿਤ 43 ਹਜ਼ਾਰ ਡਾਲਰ ਸਾਲਾਨਾ ਤੋਂ ਘੱਟ ਤਨਖਾਹ ਵਾਲਿਆਂ ਨੂੰ ਢਾਈ ਫ਼ੀਸਦੀ ਵਾਧਾ ਮਿਲੇਗਾ ਜਦਕਿ ਇਸ ਤੋਂ ਉਪਰ ਵਾਲਿਆਂ ਦੀ ਤਨਖਾਹ ‘ਚ ਡੇਢ ਫ਼ੀਸਦੀ ਵਾਧਾ ਹੋਵੇਗਾ। ਸਿੱਖਿਆ ਮੁਲਾਜ਼ਮਾਂ ਨੂੰ ਨਵੇਂ ਕਾਨੂੰਨ ਵਿਰੁੱਧ ਅਦਾਲਤ ਜਾਣ ਤੋਂ ਰੋਕਣ ਲਈ ਨੋਟ ਵਿਦ ਸਟੈਂਡਿੰਗ ਧਾਰਾ ਲਾਗੂ ਕਰ ਦਿੱਤੀ ਗਈ ਹੈ। ਓਨਟਾਰੀਓ ਸਕੂਲ ਬੋਰਡ ਕੌਂਸਲ ਆਫ਼ ਯੂਨੀਅਨਜ਼ ਦੀ ਪ੍ਰਧਾਨ ਲੌਰਾ ਵਾਲਟਨ ਨੇ ਕਿਹਾ ਕਿ ਉਹ ਹੜਤਾਲ ਨਹੀਂ ਚਾਹੁੰਦੇ ਪਰ ਵਾਜਬ ਸਮਝੌਤੇ ਤੋਂ ਬਗੈਰ ਕੰਮ ਕਰਨਾ ਵੀ ਮੁਸ਼ਕਲ ਹੈ।
ਸਿੱਖਿਆ ਮੁਲਾਜ਼ਮਾਂ ਦੀ ਯੂਨੀਅਨ ਦੇ ਪ੍ਰਧਾਨ ਫਰੈਡ ਹਾਨ ਨੇ ਕਿਹਾ ਕਿ ਗੱਲਬਾਤ ‘ਤੇ ਹੀ ਮਸਲੇ ਦਾ ਕੋਈ ਹੱਲ ਨਿਕਲ ਸਕਦਾ ਹੈ। ਕੋਈ ਸਖ਼ਤ ਕਾਨੂੰਨ ਦਾ ਮਾਮਲਾ ਸੁਲਝਾਉਣ ਦੇ ਸਮਰੱਥ ਨਹੀਂ ਹੋਵੇਗਾ ਅਤੇ ਨੋਟ ਵਿਦ ਸਟੈਂਡਿੰਗ ਵਰਗੀਆਂ ਧਾਰਾਵਾਂ ਤਾਂ ਬਿਲਕੁਲ ਵੀ ਨਹੀਂ। ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਸਿੱਖਿਆ ਮੁਲਾਜ਼ਮ ਸੰਘਰਸ਼ ਲਈ ਤਿਆਰ ਬਰ ਤਿਆਰ ਹਨ ਅਤੇ ਵਾਜਬ ਸਮਝੌਤਾ ਹੋਣ ਤੱਕ ਪਿੱਛੇ ਨਹੀਂ ਹਟਣਗੇ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
