ਸਿਡਨੀ: ਆਸਟ੍ਰੇਲੀਆਈ ਪੁਲਿਸ ਹਰਿਆਣਾ ਦੇ ਦੋ ਭਰਾਵਾਂ ਦੀ ਭਾਲ ਕਰ ਰਹੀ ਹੈ ਜਿਨ੍ਹਾਂ ਨੇ ਐਤਵਾਰ ਸਵੇਰੇ ਮੈਲਬੌਰਨ ਵਿੱਚ ਇੱਕ ਭਾਰਤੀ ਮੂਲ ਦੇ ਵਿਦਿਆਰਥੀ ਦਾ ਚਾਕੂ ਮਾਰ ਕੇ ਕਤਲ ਕਰ ਦਿੱਤਾ। ਦੱਸ ਦੇਈਏ ਕਿ ਮ੍ਰਿਤਕ ਐਮਟੈਕ ਵਿਦਿਆਰਥੀ 22 ਸਾਲਾ ਨਵਜੀਤ ਸੰਧੂ ਹਰਿਆਣਾ ਦੇ ਕਰਨਾਲ ਦਾ ਰਹਿਣ ਵਾਲਾ ਸੀ। ਜਾਣਕਾਰੀ ਮੁਤਾਬਕ ਸੰਧੂ ਨੇ ਕਿਰਾਏ ਦੇ ਮੁੱਦੇ ‘ਤੇ ਭਾਰਤੀ ਵਿਦਿਆਰਥੀਆਂ ਵਿਚਾਲੇ ਹੋਏ ਵਿਵਾਦ ‘ਚ ਦਖਲ ਦੇਣ ਦੀ ਕੋਸ਼ਿਸ਼ ਕੀਤੀ ਸੀ।
ਪੁਲਸ ਨੇ ਦੱਸਿਆ ਕਿ ਕਤਲ ਮਾਮਲੇ ‘ਚ ਭਰਾਵਾਂ ਅਭਿਜੀਤ (26) ਅਤੇ ਰੌਬਿਨ ਗਾਰਟਨ (27) ਦੀ ਭਾਲ ਕੀਤੀ ਜਾ ਰਹੀ ਹੈ। ਮੀਡੀਆ ਰਿਪੋਰਟ ‘ਚ ਹੋਮੀਸਾਈਡ ਸਕੁਐਡ ਦੇ ਡਿਟੈਕਟਿਵ ਇੰਸਪੈਕਟਰ ਡੀਨ ਥਾਮਸ ਦੇ ਹਵਾਲੇ ਨਾਲ ਕਿਹਾ ਗਿਆ ਹੈ ਕਿ ਦੋਵੇਂ ਭਰਾ ਇਕ ਪਾਰਟੀ ‘ਚ ਸ਼ਰਾਬ ਪੀ ਰਹੇ ਸਨ। ਇੰਸਪੈਕਟਰ ਥਾਮਸ ਨੇ ਕਿਹਾ ਕਿ ਰਾਤ ਭਰ ਝਗੜੇ ਹੁੰਦੇ ਰਹੇ , ਫਿਰ 1 ਵਜੇ ਤੋਂ ਪਹਿਲਾਂ ਝਗੜਾ ਹੋ ਗਿਆ। ਇਸ ਦੌਰਾਨ ਦੋ ਵਿਅਕਤੀਆਂ ਨੂੰ ਚਾਕੂ ਮਾਰ ਦਿੱਤਾ ਗਿਆ।
ਕਿਰਾਏ ਬਾਰੇ ਵਿਵਾਦ
ਇਸ ਦੌਰਾਨ ਨਵਜੀਤ ਸੰਧੂ ਦੇ ਭਾਰਤ ਵਿੱਚ ਰਹਿੰਦੇ ਰਿਸ਼ਤੇਦਾਰਾਂ ਨੇ ਦੱਸਿਆ ਕਿ ਇਹ ਲੜਾਈ ਕਿਰਾਏ ਨੂੰ ਲੈ ਕੇ ਕਿਸੇ ਅਣਬਣ ਕਾਰਨ ਹੋਈ ਹੈ ਕਿਉਂਕਿ ਸਾਰੇ ਵਿਦਿਆਰਥੀ ਇੱਕੋ ਘਰ ਵਿੱਚ ਰਹਿੰਦੇ ਸਨ। ਨਵਜੀਤ ਦੇ ਦੋਸਤ (ਇੱਕ ਹੋਰ ਭਾਰਤੀ ਵਿਦਿਆਰਥੀ) ਨੇ ਉਸਨੂੰ ਆਪਣਾ ਸਮਾਨ ਲੈਣ ਲਈ ਉਸਦੇ ਘਰ ਜਾਣ ਲਈ ਕਿਹਾ ਸੀ ਕਿਉਂਕਿ ਉਸਦੇ ਕੋਲ ਕਾਰ ਸੀ। ਜਦੋਂ ਉਸ ਦਾ ਦੋਸਤ ਅੰਦਰ ਗਿਆ ਤਾਂ ਨਵਜੀਤ ਨੇ ਰੋਲਾ ਸੁਣਿਆ ਤਾਂ ਦੇਖਿਆ ਕਿ ਹੱਥੋਪਾਈ ਚੱਲ ਰਹੀ ਸੀ।
- Advertisement -
ਪੀੜਤ ਦੇ ਚਾਚਾ ਕਰਨਾਲ ਦੇ ਯਸ਼ਵੀਰ ਨੇ ਦੱਸਿਆ ਕਿ ਜਦੋਂ ਨਵਜੀਤ ਨੇ ਉਹਨਾਂ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ ਤਾਂ ਉਸ ਦੀ ਛਾਤੀ ‘ਚ ਚਾਕੂ ਨਾਲ ਵਾਰ ਕਰ ਦਿੱਤਾ ਗਿਆ। ਉਨ੍ਹਾਂ ਦੱਸਿਆ ਕਿ ਪਰਿਵਾਰ ਨੂੰ ਘਟਨਾ ਦੀ ਜਾਣਕਾਰੀ ਐਤਵਾਰ ਸਵੇਰੇ ਮਿਲੀ। ਪਰਿਵਾਰ ਸਦਮੇ ਵਿੱਚ ਹੈ। ਉਨ੍ਹਾਂ ਦੱਸਿਆ ਕਿ ਨਵਜੀਤ ਹੁਸ਼ਿਆਰ ਵਿਦਿਆਰਥੀ ਸੀ ਅਤੇ ਉਸ ਨੇ ਜੁਲਾਈ ਮਹੀਨੇ ਛੁੱਟੀਆਂ ਮਨਾਉਣ ਲਈ ਆਪਣੇ ਪਰਿਵਾਰ ਨਾਲ ਜਾਣਾ ਸੀ।
ਨਵਜੀਤ ਡੇਢ ਸਾਲ ਪਹਿਲਾਂ ਸਟਡੀ ਵੀਜ਼ੇ ‘ਤੇ ਆਸਟ੍ਰੇਲੀਆ ਗਿਆ ਸੀ ਅਤੇ ਉਸ ਦੇ ਕਿਸਾਨ ਪਿਤਾ ਨੇ ਉਸ ਦੀ ਪੜ੍ਹਾਈ ਲਈ ਆਪਣੀ ਡੇਢ ਏਕੜ ਜ਼ਮੀਨ ਵੇਚ ਦਿੱਤੀ ਸੀ। ਪਰਿਵਾਰ ਨੇ ਭਾਰਤ ਸਰਕਾਰ ਨੂੰ ਨਵਜੀਤ ਦੀ ਲਾਸ਼ ਨੂੰ ਜਲਦੀ ਤੋਂ ਜਲਦੀ ਲਿਆਉਣ ਦੀ ਅਪੀਲ ਕੀਤੀ ਹੈ। ਆਸਟ੍ਰੇਲੀਅਨ ਪੁਲਿਸ ਨੇ ਦੱਸਿਆ ਕਿ ਦੋਸ਼ੀ ਅਭਿਜੀਤ ਅਤੇ ਰੌਬਿਨ 2014 ਦੀ ਇੱਕ ਚਿੱਟੀ ਟੋਇਟਾ ਕੈਮਰੀ ਸੇਡਾਨ ਵਿੱਚ ਫਰਾਰ ਹੋਏ ਸਨ, ਉਹਨਾਂ ਨੂੰ ਜਲਦ ਹੀ ਲੱਭ ਲਿਆ ਜਾਵੇਗਾ।
