ਨਿਊਜ਼ ਡੈਸਕ: ਵਾਸ਼ਿੰਗਟਨ ਵਿੱਚ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੂੰ ਲੈ ਕੇ ਜਾ ਰਿਹਾ ਇੱਕ ਫੌਜੀ ਹੈਲੀਕਾਪਟਰ ਇੱਕ ਯਾਤਰੀ ਜਹਾਜ਼ ਦੇ ਖਤਰਨਾਕ ਹੱਦ ਤੱਕ ਨੇੜੇ ਪਹੁੰਚ ਗਿਆ ਸੀ। ਇਹ ਘਟਨਾ ਰੋਨਾਲਡ ਰੀਗਨ ਵਾਸ਼ਿੰਗਟਨ ਨੈਸ਼ਨਲ ਏਅਰਪੋਰਟ ਨੇੜੇ ਵਾਪਰੀ, ਜਿਸ ਨਾਲ ਏਅਰ ਟ੍ਰੈਫਿਕ ਕੰਟਰੋਲ ਪ੍ਰਣਾਲੀ ‘ਤੇ ਸਵਾਲ ਖੜ੍ਹੇ ਹੋਏ ਹਨ। ਅਮਰੀਕੀ ਏਜੰਸੀਆਂ ਹੁਣ ਇਸ ਮਾਮਲੇ ਦੀ ਜਾਂਚ ਕਰ ਰਹੀਆਂ ਹਨ ਤਾਂ ਜੋ ਇਹ ਪਤਾ ਲਗਾਇਆ ਜਾ ਸਕੇ ਕਿ ਅਜਿਹੀ ਸਥਿਤੀ ਕਿਉਂ ਪੈਦਾ ਹੋਈ ਅਤੇ ਇਸ ਲਈ ਕੌਣ ਜ਼ਿੰਮੇਵਾਰ ਸੀ।
ਇਹ ਘਟਨਾ ਮੰਗਲਵਾਰ ਦੁਪਹਿਰ ਕਰੀਬ 2:30 ਵਜੇ ਵਾਪਰੀ। ਰਾਸ਼ਟਰਪਤੀ ਟਰੰਪ ਦਾ ਹੈਲੀਕਾਪਟਰ ਵ੍ਹਾਈਟ ਹਾਊਸ ਨੇੜਲੇ ‘ਐਲਿਪਸ’ (Ellipse) ਤੋਂ ‘ਜੁਆਇੰਟ ਬੇਸ ਐਂਡਰਿਊਜ਼’ ਲਈ ਰਵਾਨਾ ਹੋਇਆ ਸੀ। ਇਸ ਤੋਂ ਲਗਭਗ ਇੱਕ ਮਿੰਟ ਬਾਅਦ, ‘ਐਨਵੌਏ ਏਅਰ’ (Envoy Air) ਦਾ ਇੱਕ ਯਾਤਰੀ ਜਹਾਜ਼ (E-170) ਰੀਗਨ ਨੈਸ਼ਨਲ ਏਅਰਪੋਰਟ ਤੋਂ ਉਡਾਣ ਭਰਿਆ। ਯਾਤਰੀ ਜਹਾਜ਼ ਦੇ ਲੰਘਣ ਤੋਂ ਥੋੜ੍ਹੀ ਦੇਰ ਬਾਅਦ, ਟਰੰਪ ਦਾ ਹੈਲੀਕਾਪਟਰ ਵੀ ਹਵਾਈ ਅੱਡੇ ਵੱਲ ਵਧਿਆ।ਦੋਵੇਂ ਜਹਾਜ਼ ਨਿਰਧਾਰਤ ਸੁਰੱਖਿਆ ਸੀਮਾ ਨਾਲੋਂ ਕਿਤੇ ਘੱਟ ਦੂਰੀ ‘ਤੇ ਆ ਗਏ ਸਨ। ਹਾਲਾਂਕਿ, ਇਸ ਘਟਨਾ ਦੌਰਾਨ ਡੋਨਾਲਡ ਟਰੰਪ ਜਾਂ ਯਾਤਰੀ ਜਹਾਜ਼ ‘ਤੇ ਸਵਾਰ ਲੋਕਾਂ ਨੂੰ ਕੋਈ ਤੁਰੰਤ ਖਤਰਾ ਨਹੀਂ ਸੀ।
ਨਿਯਮਾਂ ਅਨੁਸਾਰ, ਇਸ ਖੇਤਰ ਵਿੱਚ ਉੱਡਣ ਵਾਲੇ ਜਹਾਜ਼ਾਂ ਲਈ ਆਪਸੀ ਦੂਰੀ ਘੱਟੋ-ਘੱਟ 1.5 ਮੀਲ (ਲੇਟਵੀਂ) ਅਤੇ ਲੰਬਕਾਰੀ ਪਾੜਾ 500 ਫੁੱਟ ਬਣਾਈ ਰੱਖਣਾ ਲਾਜ਼ਮੀ ਹੈ। ਅਮਰੀਕੀ ਅਧਿਕਾਰੀਆਂ ਦੀ ਮੁੱਢਲੀ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਭਾਵੇਂ ਦੋਵੇਂ ਜਹਾਜ਼ ਸਿੱਧੇ ਇੱਕ-ਦੂਜੇ ਵੱਲ ਨਹੀਂ ਜਾ ਰਹੇ ਸਨ, ਪਰ ਉਨ੍ਹਾਂ ਵਿਚਕਾਰਲੀ ਦੂਰੀ ਅਸਲ ਵਿੱਚ ਲੋੜੀਂਦੀ ਘੱਟੋ-ਘੱਟ ਦੂਰੀ ਤੋਂ ਘੱਟ ਸੀ।
ਇਸ ਦੌਰਾਨ, ਵ੍ਹਾਈਟ ਹਾਊਸ ਦਾ ਕਹਿਣਾ ਹੈ ਕਿ ਰਾਸ਼ਟਰਪਤੀ ਨੂੰ ਕਦੇ ਵੀ ਕੋਈ ਖਤਰਾ ਨਹੀਂ ਸੀ। ਇੱਕ ਰਿਪੋਰਟ ਵਿੱਚ, ਮਾਮਲੇ ਨਾਲ ਜਾਣੂ ਦੋ ਵਿਅਕਤੀਆਂ ਦੇ ਹਵਾਲੇ ਨਾਲ ਖੁਲਾਸਾ ਕੀਤਾ ਗਿਆ ਹੈ ਕਿ ਮੰਗਲਵਾਰ ਨੂੰ ਅਮਰੀਕੀ ਰਾਜਧਾਨੀ ਦੇ ਉੱਪਰ ਏਅਰ ਟ੍ਰੈਫਿਕ ਕੰਟਰੋਲਰਾਂ ਨਾਲ ਸੰਚਾਰ ਸਬੰਧੀ ਗਲਤੀ ਕਾਰਨ ‘ਮਰੀਨ ਵਨ’ (ਰਾਸ਼ਟਰਪਤੀ ਦਾ ਹੈਲੀਕਾਪਟਰ) ਇੱਕ ਯਾਤਰੀ ਜਹਾਜ਼ ਦੇ ਇੱਕ ਮੀਲ ਤੋਂ ਵੀ ਘੱਟ ਦੂਰੀ ‘ਤੇ ਆ ਗਿਆ ਸੀ।
ਨੈਸ਼ਨਲ ਟ੍ਰਾਂਸਪੋਰਟੇਸ਼ਨ ਸੇਫਟੀ ਬੋਰਡ (NTSB) ਨੇ ਕਿਹਾ ਹੈ ਕਿ ਉਹ 4 ਅਗਸਤ ਨੂੰ DCA (ਵਾਸ਼ਿੰਗਟਨ ਨੈਸ਼ਨਲ ਏਅਰਪੋਰਟ) ਤੋਂ ਰਵਾਨਾ ਹੋਣ ਵਾਲੇ ਇੱਕ ਵਪਾਰਕ ਜਹਾਜ਼ ਅਤੇ ‘ਮਰੀਨ ਵਨ’ (Marine One) ਵਿਚਕਾਰ “ਦੂਰੀ ਘਟਣ” (loss of separation) ਦੀ ਘਟਨਾ ਦੀ ਜਾਂਚ ਕਰ ਰਿਹਾ ਹੈ। ਵ੍ਹਾਈਟ ਹਾਊਸ ਦੇ ਬੁਲਾਰੇ ਕੁਸ਼ ਦੇਸਾਈ ਨੇ ਦੱਸਿਆ, “ਮਰੀਨ ਵਨ ਉਡਾਣਾਂ ਦੁਨੀਆ ਦੇ ਕੁਝ ਸਭ ਤੋਂ ਵਧੀਆ ਪਾਇਲਟਾਂ ਦੁਆਰਾ ਉਡਾਈਆਂ ਜਾਂਦੀਆਂ ਹਨ ਅਤੇ ਰਾਸ਼ਟਰਪਤੀ ਨੂੰ ਕਦੇ ਵੀ ਕੋਈ ਖਤਰਾ ਨਹੀਂ ਰਿਹਾ।”
ਅਮਰੀਕਾ ਦੇ ਹਵਾਬਾਜ਼ੀ ਰੈਗੂਲੇਟਰ, FAA ਨੇ ਕਿਹਾ, “ਜਿਸ ਸਮੇਂ ਦੋਵਾਂ ਜਹਾਜ਼ਾਂ ਵਿਚਕਾਰ ਦੂਰੀ ਘੱਟ ਗਈ ਸੀ, ਉਸ ਵੇਲੇ ਏਅਰ ਟ੍ਰੈਫਿਕ ਕੰਟਰੋਲਰ ਵਪਾਰਕ ਜਹਾਜ਼ ਦੇ ਪਾਇਲਟ ਅਤੇ ‘ਮਰੀਨ ਵਨ’ (Marine One) ਦੇ ਪਾਇਲਟ, ਦੋਵਾਂ ਦੇ ਸੰਪਰਕ ਵਿੱਚ ਸੀ। ਰਾਸ਼ਟਰਪਤੀ ਨੂੰ ਕਦੇ ਵੀ ਕੋਈ ਖਤਰਾ ਨਹੀਂ ਸੀ। ਅਸੀਂ ਇਸ ਘਟਨਾ ਦੀ ਸਮੀਖਿਆ ਕਰ ਰਹੇ ਹਾਂ ਅਤੇ ਆਪਣੀ ਜਾਂਚ ਦੇ ਆਧਾਰ ‘ਤੇ ਲੋੜੀਂਦੇ ਸੁਧਾਰਾਤਮਕ ਕਦਮ ਚੁੱਕਾਂਗੇ।”
