ਲੰਡਨ: ਫਲਸਤੀਨ ਸਮਰਥਕ ਰੈਲੀ ਵਿੱਚ ਹਿੰਸਾ ਭੜਕਣ ਤੋਂ ਬਾਅਦ 120 ਤੋਂ ਵੱਧ ਲੋਕ ਗ੍ਰਿਫਤਾਰ

Rajneet Kaur
2 Min Read

ਨਿਊਜ਼ ਡੈਸਕ: ਲੰਡਨ ਵਿੱਚ ਫਲਸਤੀਨ ਸਮਰਥਕ ਰੈਲੀ ਵਿੱਚ ਹਿੰਸਾ ਭੜਕਣ ਤੋਂ ਬਾਅਦ 120 ਤੋਂ ਵੱਧ ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ। ਦਰਅਸਲ, ਸੈਂਟਰਲ ਲੰਡਨ ਵਿੱਚ ਲਗਭਗ ਤਿੰਨ ਲੱਖ ਫਲਸਤੀਨ ਸਮਰਥਕਾਂ ਨੇ ਇੱਕ ਰੈਲੀ ਕੱਢੀ ਸੀ।ਇਸ ਦੇ ਜਵਾਬ ‘ਚ ਸੱਜੇ ਪੱਖੀ ਸਮਰਥਕਾਂ ਨੇ ਵੀ ਰੈਲੀ ਕੱਢੀ ਅਤੇ ਦੋਹਾਂ ਰੈਲੀਆਂ ‘ਚ ਟਕਰਾਅ ਕਾਰਨ ਹਿੰਸਾ ਭੜਕ ਗਈ। ਪੀਐੱਮ ਰਿਸ਼ੀ ਸੁਨਕ ਨੇ ਹਿੰਸਾ ਦੀ ਇਸ ਘਟਨਾ ‘ਤੇ ਚਿੰਤਾ ਪ੍ਰਗਟਾਈ ਹੈ।

ਦੱਸ ਦੇਈਏ ਕਿ ਬ੍ਰਿਟੇਨ ਵਿੱਚ ਹਰ ਸਾਲ ਪਹਿਲੇ ਵਿਸ਼ਵ ਯੁੱਧ ਦੀ ਸਮਾਪਤੀ ਦੀ ਯਾਦ ਵਿੱਚ ਆਰਮਿਸਟਿਸ ਡੇ ਮਨਾਇਆ ਜਾਂਦਾ ਹੈ। ਉਸੇ ਦਿਨ ਫਲਸਤੀਨ ਸਮਰਥਕਾਂ ਨੇ ਗਾਜ਼ਾ ਵਿੱਚ ਜੰਗਬੰਦੀ ਦੀ ਮੰਗ ਨੂੰ ਲੈ ਕੇ ਲੰਡਨ ਵਿੱਚ ਇੱਕ ਰੈਲੀ ਕੱਢੀ। ਜਦੋਂ ਹਿੰਸਾ ਭੜਕੀ ਤਾਂ ਪ੍ਰਧਾਨ ਮੰਤਰੀ ਰਿਸ਼ੀ ਸੁਨਕ ਨੇ ਇਸ ਦੀ ਨਿੰਦਾ ਕੀਤੀ ਅਤੇ ਹਮਾਸ ਦੇ ਸਮਰਥਨ ਵਿੱਚ ਕੱਢੀ ਗਈ ਰੈਲੀ ਦੀ ਵੀ ਆਲੋਚਨਾ ਕੀਤੀ।

ਰੈਲੀ ਦੌਰਾਨ ਯਹੂਦੀ ਵਿਰੋਧੀ ਨਾਅਰੇਬਾਜ਼ੀ ਕੀਤੀ ਗਈ ਅਤੇ ਲੋਕਾਂ ਨੇ ਹਮਾਸ ਦੇ ਸਮਰਥਨ ਵਿਚ ਨਾਅਰੇਬਾਜ਼ੀ ਕੀਤੀ ਅਤੇ ਹਮਾਸ ਦੇ ਝੰਡੇ ਲਹਿਰਾਏ। ਗਾਜ਼ਾ ਵਿੱਚ ਲੜਾਈ ਤੋਂ ਬਾਅਦ ਬ੍ਰਿਟੇਨ ਵਿੱਚ ਕਈ ਫਲਸਤੀਨ ਪੱਖੀ ਰੈਲੀਆਂ ਹੋਈਆਂ ਹਨ, ਪਰ ਸ਼ਨੀਵਾਰ ਦੀ ਰੈਲੀ ਸਭ ਤੋਂ ਵੱਡੀ ਸੀ।ਇਸ ਰੈਲੀ ‘ਚ ਹਿੰਸਾ ਭੜਕਣ ਦੀ ਸੰਭਾਵਨਾ ਪਹਿਲਾਂ ਹੀ ਸੀ ਪਰ ਲੰਡਨ ਮੈਟਰੋਪੋਲੀਟਨ ਪੁਲਿਸ ਨੇ ਰੈਲੀ ‘ਤੇ ਪਾਬੰਦੀ ਲਗਾਉਣ ਤੋਂ ਇਨਕਾਰ ਕਰ ਦਿੱਤਾ। ਪੁਲਿਸ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਉਮੀਦ ਨਹੀਂ ਸੀ ਕਿ ਰੈਲੀ ਦੌਰਾਨ ਇੰਨੇ ਵੱਡੇ ਪੱਧਰ ‘ਤੇ ਹਿੰਸਾ ਹੋ ਸਕਦੀ ਹੈ। ਇਸ ਹਿੰਸਾ ਤੋਂ ਬਾਅਦ ਲੰਡਨ ‘ਚ ਤਣਾਅ ਦਾ ਮਾਹੌਲ ਹੈ। ਪ੍ਰਧਾਨ ਮੰਤਰੀ ਨੇ ਪੁਲਿਸ ਨੂੰ ਇਸ ਹਿੰਸਾ ਦੀ ਗੰਭੀਰਤਾ ਨਾਲ ਜਾਂਚ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ। ਗ੍ਰਹਿ ਮੰਤਰੀ ਸੁਏਲਾ ਬ੍ਰੇਵਰਮੈਨ ਨੇ ਫਲਸਤੀਨ ਦੇ ਸਮਰਥਨ ‘ਚ ਆਯੋਜਿਤ ਰੈਲੀ ਨੂੰ ਨਫਰਤ ਰੈਲੀ ਕਰਾਰ ਦਿੱਤਾ । ਬ੍ਰੇਵਰਮੈਨ ਦੇ ਇਸ ਬਿਆਨ ਦੀ ਲੰਡਨ ਦੇ ਮੇਅਰ ਨੇ ਵੀ ਆਲੋਚਨਾ ਕੀਤੀ ਹੈ।

Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.

Share This Article
Leave a Comment