ਚੰਡੀਗੜ੍ਹ: ਹਰਿਆਣਾ ’ਚ ਵੀ ਇਸ ਵਾਰ ਮਾਨਸੂਨ ਆਫਤ ਬਣ ਕੇ ਟੁੱਟਿਆ ਹੈ। ਸੂਬੇ ’ਚੋਂ ਲੰਘਣ ਵਾਲੀਆਂ ਯਮੁਨਾ, ਘੱਗਰ, ਮਾਰਕੰਡਾ, ਟਾਂਗਰੀ, ਰੂਣ, ਬੇਗਨਾ, ਰਾਕਸ਼ੀ, ਸੋਮ-ਪਥਰਾਲਾ ਨਦੀਆਂ ਉਫਾਨ ’ਤੇ ਹਨ। ਪਹਾੜਾਂ ’ਤੇ ਭਾਰੀ ਬਾਰਿਸ਼ ਕਾਰਨ ਯਮੁਨਾ ਨਦੀ ਲਗਾਤਾਰ 60 ਘੰਟਿਆਂ ਤੋਂ ਖਤਰੇ ਦੇ ਨਿਸ਼ਾਨ ਤੋਂ ਉੱਪਰ ਵਗ ਰਹੀ ਹੈ। 11 ਜ਼ਿਲ੍ਹਿਆਂ ’ਚ 1932 ਤੋਂ ਵੱਧ ਪਿੰਡਾਂ ’ਚ ਪਾਣੀ ਭਰਨ ਦੀ ਨੌਬਤ ਆਈ ਹੈ। 70 ਤੋਂ ਵੱਧ ਘਰ ਡਿੱਗਣ ਜਾਂ ਉਨ੍ਹਾਂ ’ਚ ਦਰਾਰਾਂ ਆਉਣ ਦੀਆਂ ਖਬਰਾਂ ਹਨ।
ਕਿਸਾਨਾਂ ਦੇ ਨੁਕਸਾਨ
ਸਰਕਾਰ ਦੇ ਈ-ਕਸ਼ਤੀਪੁਰਤੀ ਪੋਰਟਲ ’ਤੇ 76,000 ਤੋਂ ਵੱਧ ਕਿਸਾਨਾਂ ਨੇ ਲਗਭਗ 4.68 ਲੱਖ ਏਕੜ ਫਸਲ ਨੂੰ ਬਾਰਿਸ਼ ਜਾਂ ਜਲਭਰਾਅ ਕਾਰਨ ਨੁਕਸਾਨ ਹੋਣ ਦਾ ਦਾਅਵਾ ਕੀਤਾ ਹੈ। ਹਾਲਾਂਕਿ, ਸਰਕਾਰ ਅਜੇ ਸਿਰਫ ਪਟਵਾਰੀ ਪੱਧਰ ’ਤੇ 1487 ਏਕੜ ਫਸਲ ਦਾ ਸਰਵੇਖਣ ਕਰ ਸਕੀ ਹੈ, ਅਤੇ ਪੂਰੀ ਰਿਪੋਰਟ ਤੋਂ ਬਾਅਦ ਹੀ ਅੰਤਮ ਅੰਕੜੇ ਜਾਰੀ ਕੀਤੇ ਜਾਣਗੇ।
ਮੌਤਾਂ ਅਤੇ ਨੁਕਸਾਨ
ਬਾਰਿਸ਼ ਨਾਲ ਜੁੜੇ ਕਾਰਨਾਂ ਕਰਕੇ ਹੁਣ ਤੱਕ ਸੂਬੇ ’ਚ 18 ਮੌਤਾਂ ਹੋ ਚੁੱਕੀਆਂ ਹਨ, ਹਾਲਾਂਕਿ ਸਰਕਾਰੀ ਤੌਰ ’ਤੇ ਇਸ ਸਬੰਧੀ ਕੋਈ ਅੰਕੜਾ ਜਨਤਕ ਨਹੀਂ ਕੀਤਾ ਗਿਆ।
ਸਭ ਤੋਂ ਵੱਧ ਪ੍ਰਭਾਵਿਤ ਜ਼ਿਲ੍ਹੇ
ਹਰਿਆਣਾ ਦੇ 11 ਜ਼ਿਲ੍ਹੇ ਅੰਬਾਲਾ, ਯਮੁਨਾਨਗਰ, ਕੁਰੂਕਸ਼ੇਤਰ, ਕਰਨਾਲ, ਸੋਨੀਪਤ, ਸਿਰਸਾ, ਫਤਿਹਾਬਾਦ, ਹਿਸਾਰ, ਗੁੜਗਾਓ, ਨੂੰਹ ਅਤੇ ਫਰੀਦਾਬਾਦ ਸਭ ਤੋਂ ਵੱਧ ਪ੍ਰਭਾਵਿਤ ਹਨ। ਮੁੱਖ ਮੰਤਰੀ ਨਾਇਬ ਸੈਣੀ ਨੇ ਕਿਹਾ ਹੈ ਕਿ 15 ਸਤੰਬਰ ਤੱਕ ਈ-ਕਸ਼ਤੀਪੁਰਤੀ ਪੋਰਟਲ ਖੁੱਲ੍ਹਾ ਰਹੇਗਾ, ਅਤੇ ਪੂਰੀ ਰਿਪੋਰਟ ਆਉਣ ਤੋਂ ਬਾਅਦ ਪ੍ਰਭਾਵਿਤ ਕਿਸਾਨਾਂ ਨੂੰ ਮੁਆਵਜ਼ਾ ਦਿੱਤਾ ਜਾਵੇਗਾ। ਕ੍ਰਿਸ਼ੀ ਮੰਤਰੀ ਸ਼ਿਆਮ ਸਿੰਘ ਰਾਣਾ ਨੇ ਵੀ ਕਿਹਾ ਕਿ ਮਾਨਸੂਨ ’ਚ ਬਾਰਿਸ਼ ਤਾਂ ਹੋਵੇਗੀ ਹੀ, ਪਰ ਸਰਕਾਰ ਪ੍ਰਭਾਵਿਤ ਕਿਸਾਨਾਂ ਅਤੇ ਪਿੰਡਾਂ ਨੂੰ ਰਾਹਤ ਦੇਣ ਦੀ ਤਿਆਰੀ ਕਰ ਰਹੀ ਹੈ।
ਅੰਬਾਲਾ ’ਚ ਸਭ ਤੋਂ ਵੱਧ ਨਦੀਆਂ, ਸਾਰੀਆਂ ਉਫਾਨ ’ਤੇ
ਸ਼ਿਵਾਲਿਕ ਦੀ ਤਲਹਟੀ ’ਤੇ ਵਸਿਆ ਅੰਬਾਲਾ ਜ਼ਿਲ੍ਹਾ ਸਭ ਤੋਂ ਵੱਧ ਨਦੀਆਂ ਵਾਲਾ ਖੇਤਰ ਹੈ, ਜਿੱਥੇ ਟਾਂਗਰੀ, ਮਾਰਕੰਡਾ, ਰੂਣ, ਬੇਗਨਾ ਅਤੇ ਘੱਗਰ ਨਦੀਆਂ ਲੰਘਦੀਆਂ ਹਨ। ਘੱਗਰ ਨੂੰ ਛੱਡ ਕੇ ਇਸ ਵਾਰ ਸਾਰੀਆਂ ਨਦੀਆਂ ਨੇ ਨੁਕਸਾਨ ਪਹੁੰਚਾਇਆ ਹੈ। ਟਾਂਗਰੀ ਨੇ ਸੀਜ਼ਨ ’ਚ ਦੋ ਵਾਰ ਉਫਾਨ ਮਾਰਿਆ, ਜਦਕਿ ਮਾਰਕੰਡਾ ਲਗਾਤਾਰ ਖਤਰੇ ਦੇ ਨਿਸ਼ਾਨ ਤੋਂ ਉੱਪਰ ਵਹਿ ਰਹੀ ਹੈ। ਰੂਣ ਅਤੇ ਬੇਗਨਾ ਨੇ ਨਾਰਾਇਣਗੜ੍ਹ ਖੇਤਰ ’ਚ ਫਸਲਾਂ ਅਤੇ ਜ਼ਮੀਨ ਨੂੰ ਕਾਫੀ ਨੁਕਸਾਨ ਪਹੁੰਚਾਇਆ। ਟਾਂਗਰੀ ਦੇ ਉਫਾਨ ਕਾਰਨ 10 ਤੋਂ ਵੱਧ ਕਲੋਨੀਆਂ ਦੇ ਲੋਕਾਂ ਨੂੰ ਘਰ ਛੱਡ ਕੇ ਉੱਚੇ ਸਥਾਨਾਂ ’ਤੇ ਜਾਣਾ ਪਿਆ। 3 ਸਤੰਬਰ ਨੂੰ ਅੰਬਾਲਾ ਦੀ ਨਿਊ ਲੱਕੀ ਨਗਰ ਕਲੋਨੀ ’ਚ ਟਾਂਗਰੀ ਦੇ ਪਾਣੀ ਨੇ ਭਾਰੀ ਤਬਾਹੀ ਮਚਾਈ।
