ਨਵੀਂ ਦਿੱਲੀ: ਦੇਸ਼ ਦੇ ਸਾਬਕਾ ਪ੍ਰਧਾਨ ਮੰਤਰੀ ਆਈ.ਕੇ. ਗੁਜਰਾਲ ਦੇ ਪੁੱਤਰ ਅਤੇ ਸਾਬਕਾ ਰਾਜ ਸਭਾ ਮੈਂਬਰ ਨਰੇਸ਼ ਗੁਜਰਾਲ ਨਾਲ ਜੁੜੀ ਕੰਪਨੀ ਇੱਕ ਵੱਡੀ ਸਾਈਬਰ ਠੱਗੀ ਦਾ ਸ਼ਿਕਾਰ ਹੋ ਗਈ। ਇਸ ਮਾਮਲੇ ਵਿੱਚ ਠੱਗਾਂ ਨੇ ਵਟਸਐਪ ’ਤੇ ਫਰਜ਼ੀ ਪਹਿਚਾਣ ਬਣਾ ਕੇ ਕੰਪਨੀ ਦੇ ਮੁਲਾਜ਼ਮ ਨੂੰ ਝਾਂਸੇ ਵਿੱਚ ਲਿਆ ਅਤੇ 7.80 ਕਰੋੜ ਰੁਪਏ ਟਰਾਂਸਫਰ ਕਰਵਾ ਲਏ। ਹਾਲਾਂਕਿ ਤੁਰੰਤ ਕਾਰਵਾਈ ਦੌਰਾਨ ਪੁਲਿਸ ਵੱਲੋਂ ਕਰੀਬ 4 ਕਰੋੜ ਰੁਪਏ ਫ੍ਰੀਜ਼ ਕਰਵਾ ਦਿੱਤੇ ਗਏ।
ਜਾਣਕਾਰੀ ਮੁਤਾਬਕ ਠੱਗਾਂ ਨੇ ਕੰਪਨੀ ਦੀ ਵਿੱਤੀ ਟੀਮ ਨੂੰ ਨਿਸ਼ਾਨਾ ਬਣਾਇਆ। ਉਨ੍ਹਾਂ ਨੇ ਨਰੇਸ਼ ਗੁਜਰਾਲ ਦੀ ਤਸਵੀਰ ਵਰਤ ਕੇ ਇੱਕ ਫਰਜ਼ੀ ਵਟਸਐਪ ਪ੍ਰੋਫਾਈਲ ਤਿਆਰ ਕੀਤੀ ਅਤੇ ਕੰਪਨੀ ਦੇ ਇੱਕ ਭਰੋਸੇਯੋਗ ਮੁਲਾਜ਼ਮ ਨੂੰ ਸੁਨੇਹਾ ਭੇਜਿਆ।
ਸੁਨੇਹੇ ਵਿੱਚ ਮੁਲਾਜ਼ਮ ਨੂੰ ਆਰਟੀਜੀਐਸ ਰਾਹੀਂ ਇੱਕ ਨਿਰਧਾਰਿਤ ਬੈਂਕ ਖਾਤੇ ਵਿੱਚ ਰਕਮ ਭੇਜਣ ਲਈ ਕਿਹਾ ਗਿਆ। ਮੁਲਾਜ਼ਮ ਨੇ ਇਸ ਨੂੰ ਅਸਲੀ ਨਿਰਦੇਸ਼ ਸਮਝਦੇ ਹੋਏ ਦੱਸੀ ਗਈ ਰਕਮ ਟਰਾਂਸਫਰ ਕਰ ਦਿੱਤੀ।
ਇਹ ਮਾਮਲਾ 16 ਜੂਨ 2026 ਨੂੰ ਸਾਹਮਣੇ ਆਇਆ ਜਦੋਂ ਇਸ ਲੈਣ-ਦੇਣ ਬਾਰੇ ਜਾਣਕਾਰੀ ਨਰੇਸ਼ ਗੁਜਰਾਲ ਦੀ ਧੀ ਦੀਕਸ਼ਾ ਗੁਜਰਾਲ ਤੱਕ ਪਹੁੰਚੀ। ਉਨ੍ਹਾਂ ਨੂੰ ਸ਼ੱਕ ਹੋਇਆ ਅਤੇ ਉਨ੍ਹਾਂ ਨੇ ਤੁਰੰਤ ਆਪਣੇ ਪਿਤਾ ਨਾਲ ਸੰਪਰਕ ਕੀਤਾ। ਇਸ ਤੋਂ ਬਾਅਦ ਸਪੱਸ਼ਟ ਹੋਇਆ ਕਿ ਨਰੇਸ਼ ਗੁਜਰਾਲ ਨੇ ਕੋਈ ਵੀ ਅਜਿਹਾ ਨਿਰਦੇਸ਼ ਨਹੀਂ ਦਿੱਤਾ ਸੀ।
ਬਾਅਦ ਵਿੱਚ ਪਰਿਵਾਰ ਅਤੇ ਕੰਪਨੀ ਨੂੰ ਪਤਾ ਲੱਗਾ ਕਿ ਕੋਈ ਵਿਅਕਤੀ ਨਰੇਸ਼ ਗੁਜਰਾਲ ਬਣ ਕੇ ਵਟਸਐਪ ਰਾਹੀਂ ਸੁਨੇਹੇ ਭੇਜ ਰਿਹਾ ਸੀ ਅਤੇ ਇਹ ਇੱਕ ਯੋਜਨਾਬੱਧ ਸਾਈਬਰ ਠੱਗੀ ਸੀ।
ਨਰੇਸ਼ ਗੁਜਰਾਲ ਮੁਤਾਬਕ ਸ਼ਿਕਾਇਤ ਮਿਲਣ ਤੋਂ ਬਾਅਦ ਦਿੱਲੀ ਦੀ ਸਾਈਬਰ ਏਜੰਸੀ ਨੇ ਤੇਜ਼ੀ ਨਾਲ ਕਾਰਵਾਈ ਕੀਤੀ, ਜਿਸ ਕਾਰਨ ਠੱਗੀ ਗਈ ਰਕਮ ਦਾ ਵੱਡਾ ਹਿੱਸਾ ਸਮੇਂ ਸਿਰ ਰੋਕ ਲਿਆ ਗਿਆ। ਉਨ੍ਹਾਂ ਇਹ ਵੀ ਦੱਸਿਆ ਕਿ ਰਕਮ ਟਰਾਂਸਫਰ ਤੋਂ ਪਹਿਲਾਂ ਬੈਂਕ ਵੱਲੋਂ ਸੀਐਫਓ ਨਾਲ ਪੁਸ਼ਟੀ ਕੀਤੀ ਗਈ ਸੀ, ਪਰ ਨਿਰਦੇਸ਼ ਅਸਲੀ ਸਮਝ ਕੇ ਲੈਣ-ਦੇਣ ਦੀ ਮਨਜ਼ੂਰੀ ਦੇ ਦਿੱਤੀ ਗਈ।
ਨੋਟ: ਪੰਜਾਬੀ ਦੀਆਂ ਖ਼ਬਰਾਂ ਪੜ੍ਹਨ ਲਈ ਤੁਸੀਂ ਸਾਡੀ ਐਪ ਨੂੰ ਡਾਊਨਲੋਡ ਕਰ ਸਕਦੇ ਹੋ। ਜੇ ਤੁਸੀਂ ਵੀਡੀਓ ਵੇਖਣਾ ਚਾਹੁੰਦੇ ਹੋ ਤਾਂ Global Punjab TV ਦੇ YouTube ਚੈਨਲ ਨੂੰ Subscribe ਕਰੋ। ਤੁਸੀਂ ਸਾਨੂੰ ਫੇਸਬੁੱਕ, ਟਵਿੱਟਰ ਅਤੇ ਇੰਸਟਾਗ੍ਰਾਮ ‘ਤੇ ਵੀ Follow ਕਰ ਸਕਦੇ ਹੋ। ਸਾਡੀ ਵੈੱਬਸਾਈਟ https://globalpunjabtv.com/ ‘ਤੇ ਜਾ ਕੇ ਵੀ ਹੋਰ ਖ਼ਬਰਾਂ ਨੂੰ ਪੜ੍ਹ ਸਕਦੇ ਹੋ।
