ਕੈਨੇਡਾ ‘ਚ ਪੰਜਾਬੀ ਪਰਿਵਾਰ ਦਾ ਲੱਗਿਆ ਜੈਕਪਾਟ

ਬਰੈਂਪਟਨ : ਕੈਨੇਡਾ ‘ਚ ਵਸਦੇ ਪੰਜਾਬੀ ਪਰਿਵਾਰ ਦਾ ਵੱਡਾ ਜੈਕਪਾਟ ਲੱਗਿਆ ਹੈ। ਓਨਟਾਰੀਓ ਲਾਟਰੀ ਐਂਡ ਗੇਮਿੰਗ ਕਾਰਪੋਰੇਸ਼ਨ ਦੇ ਟੋਰਾਂਟੋ ਸਥਿਤ ਪ੍ਰਾਈਜ਼ ਸੈਂਟਰ ਪੁੱਜੇ ਬਰੈਂਪਟਨ ਵਾਸੀ ਦਲਜੀਤ ਸਿੱਧੂ ਨੇ 50 ਲੱਖ ਡਾਲਰ ਦੀ ਲਾਟਰੀ ਜਿੱਤੀ ਹੈ। ਆਪਣੀ ਖੁਸ਼ੀ ਦਾ ਜ਼ਿਹਾਰ ਕਰਦਿਆਂ ਦਲਜੀਤ ਸਿੱਧੂ ਨੇ ਦੱਸਿਆ ਕਿ, ‘ਮੈਂ ਆਪਣੀ ਪਤਨੀ ਨਾਲ ਕਾਰ ‘ਚ ਜਾ ਰਿਹਾ ਸੀ ਤਾਂ ਉਸ ਵੇਲੇ ਮੈਂ ਪਤਨੀ ਨੂੰ ਲਾਟਰੀ ਦਾ ਨੰਬਰ ਮਿਲਾਉਣ ਲਈ ਕਿਹਾ, ਜਦੋਂ ਮੇਰੀ ਪਤਨੀ ਨੇ ਦੇਖਿਆ ਤਾਂ ਉਸ ਨੂੰ ਭੁਲੇਖਾ ਲੱਗਿਆ ਕਿ 5 ਹਜ਼ਾਰ ਡਾਲਰ ਦਾ ਇਨਾਮ ਨਿਕਲਿਆ ਹੈ ਪਰ ਇਹ ਸੁਣ ਕੇ ਅਸੀਂ ਬਹੁਤ ਖੁਸ਼ ਹੋ ਗਏ ਪਰ ਤੇ ਪਹੁੰਚਣ ਤੋਂ ਬਾਅਦ ਜਦੋਂ ਮੈਂ ਦੁਬਾਰਾ ਲਾਟਰੀ ਦਾ ਨੰਬਰ ਚੈਕ ਕੀਤਾ ਤਾਂ ਇਨਾਮੀ ਰਕਮ ਦੇਖ ਕੇ ਹੈਰਾਨ ਰਹਿ ਗਿਆ। ਸਾਡੇ ਦੋਵਾਂ ਦੀਆਂ ਅੱਖਾਂ ‘ਚ ਹੰਝੂ ਸਨ ਅਤੇ ਅਸੀਂ ਤੁਰੰਤ ਆਪਣੇ ਬੱਚਿਆਂ ਨਾਲ ਖੁਸ਼ੀ ਸਾਂਝੀ ਕੀਤੀ।’

ਦਲਜੀਤ ਸਿੱਧੂ ਨੇ ਦੱਸਿਆ ਕਿ ਉਨ੍ਹਾਂ ਨੂੰ 2 ਡਾਲਰ ਦਾ ਇਨਾਮ ਵੀ ਮਿਲਿਆ ਹੈ ਜਿਸ ਨਾਲ ਕੁੱਲ ਇਨਾਮੀ ਰਕਮ 50 ਲੱਖ ਤੇ 2 ਡਾਲਰ ਹੋ ਗਈ। ਦਲਜੀਤ ਸਿੱਧੂ ਨੇ ਦੱਸਿਆ ਕਿ ਮੇਰੀ ਪਤਨੀ ਨੂੰ ਲਾਟਰੀ ਨਿਕਲਣ ਦਾ ਸੁਪਨਾ ਵੀ ਆਇਆ ਸੀ ਪਰ ਐਨਾ ਵੱਡਾ ਇਨਾਮ ਨਿਕਲਣ ਬਾਰੇ ਅਸੀਂ ਕਦੇ ਨਹੀਂ ਸੀ ਸੋਚਿਆ। ਦਲਜੀਤ ਨੇ ਦੱਸਿਆ ਕਿ ਉਹ ਇਨਾਮੀ ਰਕਮ ਨਾਲ ਨਵਾਂ ਘਰ ਅਤੇ ਨਵੀਂ ਕਾਰ ਖਰੀਦਣ ਬਾਰੇ ਸੋਚ ਰਹੇ ਹਨ। ਇਸ ਤੋਂ ਇਲਾਵਾ ਉਹ ਕੁਝ ਰਕਮ ਨਿਵੇਸ਼ ਵੀ ਕਰਨਾ ਚਾਹੁੰਦੇ ਹਨ ਤਾਂਕਿ ਭਵਿੱਖ ਵਿਚ ਇਸ ਨੂੰ ਵਰਤਿਆ ਜਾ ਸਕੇ।

ਦਲਜੀਤ ਸਿੱਧੂ ਮੁਤਾਬਕ ਉਨ੍ਹਾਂ ਨੇ ਬਰੈਂਪਟਨ ਦੇ ਬਰੈਮਲੀ ਰੋਡ ਤੋਂ ਲਾਟਰੀ ਟਿਕਟ ਖਰੀਦੀ ਸੀ ਅਤੇ ਉਹ ਲੋਟੋ 6/49 ਦਾ ਕਲਾਸਿਕ ਜੈਕਪਾਟ ਜਿੱਤਣ ਵਾ ਪਹਿਲੇ ਸ਼ਖਸ ਬਣ ਗਏ ਹਨ।

Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.