ਟੋਰਾਂਟੋ: ਕੈਨੇਡਾ ਐਮਰਜੈਂਸੀ ਰਿਪਸਪਾਂਸ ਬੈਨੇਫਿਟ ਤਹਿਤ 2 ਹਜ਼ਾਰ ਡਾਲਰ ਪ੍ਰਤੀ ਮਹੀਨਾ ਲੈਣ ਵਾਲੇ ਸੁਚੇਤ ਹੋ ਜਾਣ। ਫੈਡਰਲ ਸਰਕਾਰ ਵੱਲੋਂ ਉਨ੍ਹਾਂ ਲੋਕਾਂ ਨੂੰ ਵਸੂਲੀ ਚਿੱਠੀਆਂ ਭੇਜੀਆਂ ਜਾ ਰਹੀਆਂ ਹਨ ਜਿਨ੍ਹਾਂ ਨੇ ਰੁਜ਼ਗਾਰ ਬੀਮੇ ਦੀ ਰਕਮ ਵੀ ਨਾਲੋ ਨਾਲ ਆਪਣੀ ਜੇਬ ਵਿਚ ਪਾਈ।
ਉੱਥੇ ਹੀ ਦੂਜੇ ਪਾਸੇ ਵਿਰੋਧੀ ਧਿਰ ਦੇ ਐਮ.ਪੀਜ਼ ਅਤੇ ਮੁਲਾਜ਼ਮ ਜਥੇਬੰਦੀਆਂ ਦਾ ਕਹਿਣਾ ਹੈ ਕਿ ਅਜਿਹੀਆਂ ਚਿਤਾਵਨੀਆਂ ਲੋਕਾਂ ‘ਚ ਡਰ ਦਾ ਮਾਹੌਲ ਪੈਦਾ ਕਰ ਸਕਦੀਆਂ ਹਨ ਅਤੇ ਹੁਣ ਸਰਕਾਰ ਨੂੰ ਰਕਮ ਵਾਪਸ ਨਹੀਂ ਮੰਗਣੀ ਚਾਹੀਦੀ।
ਮਹਾਂਮਾਰੀ ਦੀ ਸ਼ੁਰੂਆਤ ‘ਚ ਕਾਰੋਬਾਰੀਆਂ ਨੇ ਮੁਲਾਜ਼ਮਾਂ ਦੀ ਗਿਣਤੀ ਘਟਾਉਣੀ ਸ਼ੁਰੂ ਕਰ ਦਿੱਤੀ, ਪਰ ਰੁਜ਼ਗਾਰ ਬੀਮਾ ਯੋਜਨਾ ਅਧੀਨ ਅਚਾਨਕ ਵੱਡੀ ਗਿਣਤੀ ‘ਚ ਮੁਲਜ਼ਮਾਂ ਦਾ ਬੋਝ ਬਰਦਾਸ਼ਤ ਕਰਨਾ ਸੰਭਵ ਨਹੀਂ ਸੀ ਅਤੇ ਵੱਡੀ ਗਿਣਤੀ ‘ਚ ਮੁਲਾਜ਼ਮ ਰੁਜ਼ਗਾਰ ਬੀਮੇ ਦੇ ਘੇਰੇ ‘ਚ ਵੀ ਨਹੀਂ ਆਉਂਦੇ ਸਨ। ਜਿਸ ਨੂੰ ਦੇਖਦਿਆਂ ਕੈਨੇਡਾ ਅਮਰਜੈਂਸੀ ਰਿਸਪਾਂਸ ਬੈਨੇਫ਼ਿਟ ਸ਼ੁਰੂ ਕੀਤਾ ਗਿਆ ਅਤੇ 500 ਡਾਲਰ ਹਫ਼ਤੇ ਦੇ ਹਿਸਾਬ ਨਾਲ ਆਰਥਿਕ ਸਹਾਇਤਾ ਮਿਲਣ ਲੱਗੀ। ਕੁਝ ਮਹੀਨੇ ‘ਚ ਹੀ 89 ਲੱਖ ਤੋਂ ਵੱਧ ਲੋਕਾਂ ਨੂੰ 82 ਅਰਬ ਡਾਲਰ ਵੰਡ ਦਿੱਤੇ ਗਏ, ਪਰ ਕਈ ਮਾਮਲਿਆਂ ਵਿਚ ਭੰਬਲਭੂਸੇ ਬਰਕਰਾਰ ਸਨ।
ਸਰਵਿਸ ਕੈਨੇਡਾ ਤੋਂ ਰੁਜ਼ਗਾਰ ਬੀਮਾ ਲੈ ਰਹੇ ਲੋਕਾਂ ਨੇ ਕੈਨੇਡਾ ਰੈਵੇਨਿਊ ਏਜੰਸੀ ਤੋਂ 2 ਹਜ਼ਾਰ ਡਾਲਰ ਪ੍ਰਤੀ ਮਹੀਨਾ ਵੀ ਲੈਣੇ ਸ਼ੁਰੂ ਕਰ ਦਿੱਤੇ ਅਤੇ ਹੁਣ ਇਨ੍ਹਾਂ ਲੋਕਾਂ ਨੂੰ ਰਕਮ ਵਾਪਸ ਕਰਨ ਦੇ ਨੋਟਿਸ ਭੇਜੇ ਜਾ ਰਹੇ ਹਨ। ਕੈਨੇਡਾ ਰੈਵੇਨਿਊ ਏਜੰਸੀ ਮੁਤਾਬਕ ਇਕ ਲੱਖ ਤੋਂ ਵੱਧ ਨੋਟਿਸ ਭੇਜੇ ਜਾ ਚੁੱਕੇ ਹਨ ਤੇ ਖ਼ਤਮ ਨਹੀਂ ਹੋਇਆ। ਜ਼ਿਆਦਾਤਰ ਮਾਮਲਿਆਂ ਵਿਚ ਸਰਕਾਰ ਵੱਲੋਂ ਮੰਗੀ ਗਈ ਰਕਮ 2 ਹਜ਼ਾਰ ਡਾਲਰ ਜਾਂ ਇਸ ਤੋਂ ਘੱਟ ਬਣਦੀ ਹੈ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
