ਟੋਰਾਂਟੋ: ਕੈਨੇਡਾ ਵਿਖੇ ਵੱਡੀ ਗਿਣਤੀ ‘ਚ ਕਾਮਿਆਂ ਦੀ ਜਰੂਰਤ ਹੈ। ਇੱਥੇ ਕਈ ਅਜਿਹੀਆਂ ਆਸਾਮੀਆਂ ਹਨ, ਜਿਨ੍ਹਾਂ ਲਈ ਦੋ ਦੋ ਮਹੀਨੇ ਤੱਕ ਕਾਮੇ ਨਹੀਂ ਮਿਲਦੇ। ਸਟੈਟਿਸਟਿਕਸ ਕੈਨੇਡਾ ਦੀ ਰਿਪੋਰਟ ਮੁਤਾਬਕ 2021 ਦੀ ਅਖੀਰਲੀ ਤਿਮਾਹੀ ਦੌਰਾਨ ਕੈਨੇਡਾ ‘ਚ 9 ਲੱਖ 15 ਹਜ਼ਾਰ ਆਸਾਮੀਆਂ ਖ਼ਾਲੀ ਰਹਿ ਗਈਆਂ ਜਿਨ੍ਹਾਂ ਲਈ ਕਾਮੇ ਨਹੀਂ ਮਿਲ ਸਕੇ। ਜਿਸ ਦੇ ਚਲਦਿਆਂ ਹੁਣ ਕਾਰੋਬਾਰੀਆਂ ਨੇ ਵੀ ਆਪਣੇ ਕੰਮ ਦਾ ਘੇਰਾ ਸੀਮਤ ਕਰਨਾ ਸ਼ੁਰੂ ਕਰ ਦਿੱਤਾ ਹੈ, ਤਾਂਕਿ ਜ਼ਿਆਦਾ ਕਾਮਿਆਂ ‘ਤੇ ਨਿਰਭਰਤਾ ਹੀ ਖ਼ਤਮ ਹੋ ਜਾਵੇ।
ਰਿਪੋਰਟ ਮੁਤਾਬਕ ਕਾਮਿਆਂ ਦੀ ਸਭ ਤੋਂ ਵੱਧ ਕਮੀ ਕੰਸਟਰਕਸ਼ਨ ਖੇਤਰ ਦੇ ਮਜ਼ਦੂਰਾਂ, ਰੈਸਟੋਰੈਂਟਸ ‘ਚ ਗਾਹਕਾਂ ਤੱਕ ਸਮਾਨ ਪਹੁੰਚਾਉਣ ਵਾਲੇ ਅਤੇ ਸੋਸ਼ਲ ਵਰਕਰਾਂ ਦੇ ਮਾਮਲੇ ਵਿਚ ਆ ਰਹੀ ਹੈ। ਸਟੈਟਿਸਟਿਕਸ ਕੈਨੇਡਾ ਮੁਤਾਬਕ 2011 ਤੋਂ 2021 ਦਰਮਿਆਨ 65 ਸਾਲ ਤੋਂ ਵੱਧ ਉਮਰ ਵਾਲੇ ਲੋਕਾਂ ਦੀ ਗਿਣਤੀ 14.4 ਫ਼ੀਸਦੀ ਤੋਂ ਵੱਧ ਕੇ 18.5 ਫ਼ੀਸਦੀ ਹੋ ਗਈ ਅਤੇ ਮਹਾਂਮਾਰੀ ਕਾਰਨ ਇਮੀਗ੍ਰੇਸ਼ਨ ਵਿੱਚ ਰੁਕਾਵਟ ਆਈ ਜਿਸ ਦਾ ਸਿੱਧਾ ਅਸਰ ਕਿਰਤੀ ਬਾਜ਼ਾਰ `ਤੇ ਪਿਆ।
ਉੱਥੇ ਹੀ ਦੂਜੇ ਪਾਸੇ ਹੁਣ ਕੈਨੇਡਾ ਸਰਕਾਰ ਵੱਲੋਂ ਵਿਦੇਸ਼ੀ ਕਾਮਿਆਂ ਨੂੰ ਭਰਤੀ ਕਰਨ ਦੇ ਨਿਯਮਾਂ ‘ਚ ਛੋਟ ਦਿੱਤੀ ਗਈ ਹੈ, ਤਾਂਕਿ ਹਰ ਖੇਤਰ ‘ਚ ਕਿਰਤੀਆਂ ਦੀ ਜ਼ਰੂਰਤ ਕਿਸੇ ਹੱਦ ਤੱਕ ਪੂਰੀ ਕੀਤੀ ਜਾ ਸਕੇ।
ਬੈਂਕ ਆਫ਼ ਕੈਨੇਡਾ ਦੇ ਸਰਵੇਖਣ ਮੁਤਾਬਕ 2022 ਦੀ ਪਹਿਲੀ ਤਿਮਾਹੀ ਦੌਰਾਨ 42 ਫ਼ੀਸਦੀ ਕਾਰੋਬਾਰੀਆਂ ਨੇ ਕਿਹਾ ਕਿ ਉਹ ਮਸ਼ੀਨਾਂ ‘ਤੇ ਵੱਧ ਪੈਸਾ ਖਰਚਣ ਦੀ ਯੋਜਨਾ ਬਣਾ ਰਹੇ ਹਨ ਤਾਂਕਿ ਮਜ਼ਦੂਰਾਂ ‘ਤੇ ਨਿਰਭਰ ਰਹਿਣਾ ਪਵੇ।
ਉੱਥੇ ਹੀ ਇੱਕ ਸਰਵੇਖਣ ਮੁਤਾਬਕ ਚਾਰ ‘ਚੋਂ ਇੱਕ ਕਾਰੋਬਾਰੀ ਅਜਿਹੇ ਕਿਰਤੀਆਂ ਦੀ ਭਰਤੀ ਕਰ ਰਹੇ ਹਨ ਜਿਨ੍ਹਾਂ ਨੂੰ ਚੰਗੀ ਤਰ੍ਹਾਂ ਕੰਮ ਨਹੀਂ ਆਉਂਦਾ ਅਤੇ ਤਨਖਾਹ ਦੇ ਮਾਮਲੇ ‘ਚ ਬੋਲੀਆਂ ਵੀ ਲੱਗ ਰਹੀਆਂ ਹਨ ਤੇ ਉਚੀ ਬੋਲੀ ਲਗਾਉਣ ਵਾਲਾ ਲੇਬਰ ਲੈ ਜਾਂਦਾ ਹੈ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
