ਕੈਨੇਡਾ : ਆਪਣੇ ਸੁਪਨਿਆਂ ਨੂੰ ਪੂਰਾ ਕਰਨਾ ਹਰ ਕਿਸੇ ਦੀ ਅੰਦਰ ਦਾ ਇੱਕ ਚਾਅ ਹੁੰਦਾ ਹੈ। ਜਿਸ ਨੂੰ ਪੂਰਾ ਕਰਨ ਲਈ ਨੌਜਵਾਨ ਪੀੜੀ ਵਿਦੇਸ਼ਾਂ ਵਿੱਚ ਜਾ ਕਿ ਆਪਣੀ ਪੜ੍ਹਾਈ ਦੇ ਨਾਲ ਨੌਕਰੀ ਵੀ ਕਰਦੇ ਹਨ। ਅਜਿਹੀ ਹੀ ਇੱਕ ਹੋਣਹਾਰ ਪੰਜਾਬ ਦੀ ਧੀ ਜਿਸ ਨੇ ਪੰਜਾਬ ‘ ਦੀ ਵੋਮੈਨ ਇਨ ਸਪੋਰਟਸ ਐਂਡ ਲੀਡਰਸ਼ਿਪ ਐਵਾਰਡ’ ਹਾਸਲ ਕਰਕੇ ਪੰਜਾਬ ਦਾ ਸਿਰ ਮਾਣ ਨਾਲ ਉੱਚਾ ਕੀਤਾ ਹੈ।
ਦੱਸ ਦਿੰਦੇ ਹਾਂ ਕਿ ਕੈਨੇਡਾ ਦੇ ਸੂਬੇ ਬ੍ਰਿਟਿਸ਼ ਕੋਲੰਬੀਆ ਵਿਚ ਐਬਟਸਫੋਰਡ ਦੀ ਪੰਜਾਬਣ ਅਧਿਆਪਕਾ ਐਸ਼ਲੀਨ ਸਿੰਘ ਨੇ ਭਾਈਚਾਰੇ ਦਾ ਮਾਣ ਵਧਾਇਆ ਹੈ। ਐਸ਼ਲੀਨ ਸਿੰਘ ਦੀ ਵੋਮੈਨ ਇਨ ਸਪੋਰਟਸ ਐਂਡ ਲੀਡਰਸ਼ਿਪ ਐਵਾਰਡ ਲਈ ਚੋਣ ਹੋਈ ਹੈ। ‘ਬੀ ਸੀ ਸਕੂਲ ਸਪੋਰਟਸ’ ਵਲੋਂ ਸਾਲ 2022-2023 ਲਈ ਦਿੱਤੇ ਜਾਣ ਵਾਲੇ ਸਨਮਾਨ ਦਾ ਐਲਾਨ ਕੀਤਾ ਗਿਆ ਹੈ।
ਬੀਸੀ ਸਕੂਲ ਸਪੋਰਟਸ ਵਲੋਂ ਇਹ ਸਨਮਾਨ ਉਨ੍ਹਾਂ ਸਕੂਲੀ ਕੋਚਾਂ ਨੂੰ ਦਿੱਤਾ ਜਾਂਦਾ ਹੈ, ਜਿਨ੍ਹਾਂ ਨੇ ਸਕੂਲੀ ਵਿਦਿਆਰਥੀਆਂ ਨੂੰ ਖੇਡਾਂ ਵੱਲ ਉਤਸ਼ਾਹਿਤ ਕਰਨ ਲਈ ਅਹਿਮ ਯੋਗਦਾਨ ਪਾਇਆ ਹੋਵੇ। ਐਬਟਸਫੋਰਡ ਦੇ ਰਿੱਕ ਹੈਨਸਨ ਸੈਕੰਡਰੀ ਸਕੂਲ ਦੀ ਅਧਿਆਪਕਾ ਐਸ਼ਲੀਨ ਸਿੰਘ ਦੀ ‘ਵੋਮੈਨ ਇਨ ਸਪੋਰਟਸ ਐਂਡ ਲੀਡਰਸ਼ਿਪ ਐਵਾਰਡ’ ਲਈ ਚੋਣ ਹੋਈ ਹੈ। ਉਹ ਇਸ ਵੱਕਾਰੀ ਸਨਮਾਨ ਲਈ ਚੁਣੀ ਜਾਣ ਵਾਲੀ ਸੂਬੇ ਭਰ ‘ਚੋਂ ਇਕੋ ਇਕ ਪੰਜਾਬਣ ਅਧਿਆਪਕਾ ਹੈ।
ਐਸ਼ਲੀਨ ਸਿੰਘ ਐਬਟਸਫੋਰਡ ਬਾਸਕਟਬਾਲ ਐਸੋਸੀਏਸ਼ਨ ਦੀ ਮੁਖੀ ਹੈ। ਸਕੂਲ ਵਿਚ ਪੜ੍ਹਦੇ ਸਮੇਂ ਉਹ ਚੋਟੀ ਦੀ ਬਾਸਕਟਬਾਲ ਖਿਡਾਰਨ ਰਹਿ ਚੁੱਕੀ ਹੈ। ਐਸ਼ਲੀਨ ਸਿੰਘ ਨੂੰ ਇਸ ਐਵਾਰਡ ਲਈ ਚੁਣੇ ਜਾਣ ਦੀ ਖ਼ਬਰ ਤੋਂ ਬਾਅਦ ਪੰਜਾਬੀ ਭਾਈਚਾਰੇ ਵਿਚ ਖੁਸ਼ੀ ਦੀ ਲਹਿਰ ਚਾਰੋ ਪਾਸੇ ਨਜ਼ਰ ਆ ਰਹੀ ਹੈ। ਜਿਸ ਨਾਲ ਖ਼ਾਸ ਕਰਕੇ ਪੂਰੇ ਵਿਸ਼ਵ ਦੀਆਂ ਧੀਆਂ ਨੂੰ ਅਗਾਂਹ ਵਧਣ ਵਿੱਚ ਹੌਂਸਲਾ ਮਿਲਿਆ ਹੈ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
