ਬ੍ਰਿਟੇਨ ਦੇ ਰਾਜਾ ਚਾਰਲਸ ਨੂੰ ਹੋਇਆ ਕੈਂਸਰ, ਬਕਿੰਘਮ ਪੈਲੇਸ ਨੇ ਜਾਰੀ ਕੀਤਾ ਬਿਆਨ

ਨਿਊਜ਼ ਡੈਸਕ: ਬ੍ਰਿਟੇਨ ਦੇ ਕਿੰਗ ਚਾਰਲਸ III ਨੂੰ  ਕੈਂਸਰ ਹੋ ਗਿਆ ਹੈ। ਬਕਿੰਘਮ ਪੈਲੇਸ ਨੇ ਇਕ ਬਿਆਨ ਜਾਰੀ ਕਰਕੇ ਇਹ ਜਾਣਕਾਰੀ ਦਿੱਤੀ ਹੈ। ਇਸ ਖਬਰ ਦੇ ਸਾਹਮਣੇ ਆਉਣ ਤੋਂ ਬਾਅਦ ਉਨ੍ਹਾਂ ਦੇ ਸਮਰਥਕ ਹੈਰਾਨ ਰਹਿ ਗਏ। ਬਿਆਨ ਵਿੱਚ ਫਿਲਹਾਲ ਇਹ ਸਪੱਸ਼ਟ ਨਹੀਂ ਹੈ ਕਿ ਰਾਜਾ ਚਾਰਲਸ ਕਿਸ ਤਰ੍ਹਾਂ ਦੇ ਕੈਂਸਰ ਤੋਂ ਪੀੜਤ ਹਨ। ਹਾਲਾਂਕਿ ਉਨ੍ਹਾਂ ਦਾ ਕੁਝ ਦਿਨ ਪਹਿਲਾਂ ਪ੍ਰੋਸਟੇਟ ਦਾ ਅਪਰੇਸ਼ਨ ਹੋਇਆ ਸੀ, ਪਰ ਇਹ ਨਹੀਂ ਕਿਹਾ ਜਾ ਸਕਦਾ ਕਿ ਉਨ੍ਹਾਂ ਨੂੰ ਪ੍ਰੋਸਟੇਟ ਕੈਂਸਰ ਹੈ।

ਖਬਰਾਂ ਦੀ ਮੰਨੀਏ ਤਾਂ ਪ੍ਰਿੰਸ ਹੈਰੀ ਵੀ ਇਹ ਖਬਰ ਸੁਣ ਕੇ ਲੰਡਨ ਪਰਤ ਰਹੇ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਹੈਰੀ ਅਤੇ ਕਿੰਗ ਚਾਰਲਸ ਵਿਚਾਲੇ ਗੱਲਬਾਤ ਵੀ ਹੋਈ ਹੈ। ਇਸ ਔਖੇ ਸਮੇਂ ‘ਚ ਬ੍ਰਿਟਿਸ਼ ਸ਼ਾਹੀ ਪਰਿਵਾਰ ਇਸ ਸਮੇਂ ਇਕੱਠੇ ਨਜ਼ਰ ਆ ਰਹੇ ਹਨ। ਬਕਿੰਘਮ ਪੈਲੇਸ ਦੇ ਬਿਆਨ ਵਿੱਚ ਕਿਹਾ ਗਿਆ ਹੈ, ‘ਕਿੰਗ ਚਾਰਲਸ III ਨੂੰ ਹਾਲ ਹੀ ਵਿੱਚ ਕੈਂਸਰ ਦੀ ਇੱਕ ਕਿਸਮ ਦਾ ਪਤਾ ਲੱਗਿਆ ਹੈ। ਅਗਲੇ ਇਲਾਜ ਲਈ ਡਾਕਟਰਾਂ ਦੀ ਸਲਾਹ ਲਈ ਜਾ ਰਹੀ ਹੈ। ਕਿੰਗ ਚਾਰਲਸ ਦੇ ਕੈਂਸਰ ਦੀ ਖਬਰ ਸੁਣ ਕੇ ਦੁਨੀਆ ਭਰ ਦੇ ਲੋਕ ਚਿੰਤਤ ਹਨ। ਕਈ ਲੋਕ ਉਨ੍ਹਾਂ ਦੇ ਜਲਦੀ ਠੀਕ ਹੋਣ ਦੀ ਕਾਮਨਾ ਕਰ ਰਹੇ ਹਨ। ਕਿੰਗ ਚਾਰਲਸ ਦੀ ਉਮਰ 75 ਸਾਲ ਹੈ ਅਤੇ ਕੈਂਸਰ ਤੋਂ ਪੀੜਤ ਉਨ੍ਹਾਂ ਦੀ ਸਿਹਤ ਅਤੇ ਬ੍ਰਿਟਿਸ਼ ਸ਼ਾਹੀ ਪਰਿਵਾਰ ਲਈ ਚਿੰਤਾ ਦਾ ਵਿਸ਼ਾ ਹੈ।

ਤੁਹਾਨੂੰ ਇਹ ਜਾਣ ਕੇ ਹੈਰਾਨੀ ਹੋਵੇਗੀ ਕਿ ਅੱਜ ਵੀ ਰਾਜਾ ਚਾਰਲਸ 3 ਬ੍ਰਿਟੇਨ ਤੋਂ ਇਲਾਵਾ 14 ਦੇਸ਼ਾਂ ਦੇ ਰਾਜ ਦੇ ਮੁਖੀ ਹਨ, ਯਾਨੀ ਕਿ ਦੇਸ਼ ਦੇ ਸਰਵਉੱਚ ਵਿਅਕਤੀ ਹਨ। ਉਨ੍ਹਾਂ ਦੀ ਤਾਜਪੋਸ਼ੀ ਪਿਛਲੇ ਸਾਲ ਮਈ ਮਹੀਨੇ ਹੋਈ ਸੀ। ਪਿਛਲੇ 70 ਸਾਲਾਂ ‘ਚ ਪਹਿਲੀ ਵਾਰ ਬ੍ਰਿਟੇਨ ਹੀ ਨਹੀਂ ਸਗੋਂ 14 ਹੋਰ ਦੇਸ਼ਾਂ ਨੇ ਆਪਣੇ ਰਾਜੇ ਦੀ ਤਾਜਪੋਸ਼ੀ ਦੇਖੀ ਸੀ।

ਉਹ 14 ਦੇਸ਼ ਜਿੱਥੇ ਕਿੰਗ ਚਾਰਲਸ III ਅਜੇ ਵੀ ਰਾਜ ਦੇ ਮੁਖੀ ਵਜੋਂ ਸੇਵਾ ਕਰ ਰਹੇ ਹਨ – ਨਿਊਜ਼ੀਲੈਂਡ, ਆਸਟ੍ਰੇਲੀਆ, ਕੈਨੇਡਾ, ਜਮੈਕਾ, ਟੂਵਾਲੂ, ਬੇਲੀਜ਼, ਬਹਾਮਾਸ, ਸੇਂਟ ਲੂਸੀਆ, ਐਂਟੀਗੁਆ ਅਤੇ ਬਾਰਬੁਡਾ, ਸੇਂਟ ਵਿਨਸੈਂਟ ਅਤੇ ਗ੍ਰੇਨਾਡਾਈਨਜ਼, ਸੋਲੋਮਨ ਟਾਪੂ, ਪਾਪੂਆ ਨਿਊ ਗਿਨੀ, ਗ੍ਰੇਨਾਡਾ, ਸੇਂਟ ਕਿਟਸ ਅਤੇ ਨੇਵਿਸ।