ਪੰਜਾਬ: ਵਾਰਿਸ ਪੰਜਾਬ ਦੀ ਜਥੇਬੰਦੀ ਦੇ ਮੁੱਖੀ ਅੰਮ੍ਰਿਤਪਾਲ ਸਿੰਘ ਦਾ ਮੁੱਦਾ ਹਰ ਪਾਸੇ ਭਖਿਆ ਹੋਇਆ ਹੈ। ਪੰਜਾਬ ਪੁਲਿਸ ਹਰ ਤਰ੍ਹਾਂ ਦੀਆਂ ਕੋਸ਼ਿਸ਼ਾਂ ਕਰ ਰਹੀ ਹੈ ਅੰਮ੍ਰਿਤਪਾਲ ਸਿੰਘ ਨੂੰ ਆਪਣੀ ਹਿਰਾਸਤ ਵਿੱਚ ਲੈਣ ਲਈ। ਕਿਹਾ ਜਾ ਰਿਹਾ ਹੈ ਕਿ ਉਸ ਦੇ ਸਾਥੀਆਂ ਨੂੰ ਵੀ ਪੁਲਿਸ ਵੱਲੋਂ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਪਰ ਹੁਣ ਕੁੱਝ ਨੂੰ ਰਿਹਾਅ ਕੀਤਾ ਗਿਆ ਹੈ। ਅੰਮ੍ਰਿਤਪਾਲ ਸਿੰਘ ਮੋਬਾਈਲ ਫੋਨ ’ਤੇ ਸਿਗਨਲ ਐਪ ਦੀ ਵਰਤੋਂ ਕਰ ਰਿਹਾ ਹੈ ਤਾਂ ਕਿ ਉਸਦੀ ਕੋਈ ਸਰਗਰਮੀ ਟਰੈਕ ਨਾ ਹੋ ਸਕੇ। ਇੰਨਾ ਹੀ ਨਹੀਂ, ਉਹ ਜਿਸਦੇ ਘਰ ਵੀ ਪਨਾਹ ਲੈਂਦਾ ਹੈ, ਉਸਦੇ ਮੋਬਾਈਲ ’ਚ ਵੀ ਇਸ ਐਪ ਨੂੰ ਡਾਊਨਲੋਡ ਕਰਵਾ ਦਿੰਦਾ ਹੈ ਤਾਂ ਕਿ ਬਾਅਦ ’ਚ ਗੱਲਬਾਤ ਹੁੰਦੀ ਰਹੇ। ਅੰਮ੍ਰਿਤਪਾਲ ਸਿੰਘ ਆਪਣੇ ਸਾਥੀ ਪਪਲਪ੍ਰੀਤ ਸਿੰਘ ਨਾਲ ਕੁਰੂਕਸ਼ੇਤਰ ਦੇ ਸ਼ਾਹਾਬਾਦ ਦੀ ਸਿਧਾਰਥ ਕਾਲੋਨੀ ’ਚ ਜਿਥੇ ਰੁਕਿਆ ਸੀ, ਉਨ੍ਹਾਂ ਦੇ ਮੋਬਾਈਲ ’ਚ ਵੀ ਐਪ ਡਾਊਨਲੋਡ ਕਰਵਾ ਗਿਆ। ਇਸ ਤਰ੍ਹਾਂ ਦੇ ਤੱਥ ਹਰਿਆਣਾ ਪੁਲਿਸ ਦੀ ਪੁੱਛਗਿੱਛ ’ਚ ਸਾਹਮਣੇ ਆਏ ਹਨ।ਲਾਡਵਾ ਐੱਸਡੀਐੱਮ ਦਫ਼ਤਰ ’ਚ ਤਾਇਨਾਤ ਹਰਜਿੰਦਰ ਸਿੰਘ ਨੇ ਪੁਲਿਸ ਨੂੰ ਦਿੱਤੇ ਬਿਆਨ ’ਚ ਸਿਗਨਲ ਐਪ ਬਾਰੇ ਜਾਣਕਾਰੀ ਦਿੱਤੀ। ਸ਼ਾਹਬਾਦ ਤੋਂ ਜਾਂਦੇ ਸਮੇਂ ਅੰਮ੍ਰਿਤਪਾਲ ਹਰਜਿੰਦਰ ਸਿੰਘ ਦੇ ਕੱਪੜੇ ਪਾ ਕੇ ਰਵਾਨਾ ਹੋ ਗਿਆ। ਉਸ ਕੋਲ ਬੰਦੂਕ ਵੀ ਸੀ। ਅੰਮ੍ਰਿਤਪਾਲ ਸ਼ਾਹਾਬਾਦ ਤੋਂ ਪੰਚਕੂਲਾ ਡਿਪੂ ਤੋਂ ਦਿੱਲੀ ਜਾਣ ਵਾਲੀ ਬੱਸ ਵਿੱਚ ਸਵਾਰ ਹੋਇਆ ਸੀ। ਸੂਤਰਾਂ ਦਾ ਕਹਿਣਾ ਹੈ ਕਿ ਬੱਸ ਦਾ ਨੰਬਰ ਵੀ ਪੁਲਿਸ ਕੋਲ ਆ ਗਿਆ ਹੈ ਅਤੇ ਆਸ-ਪਾਸ ਲੱਗੇ ਸੀਸੀਟੀਵੀ ਵੀ ਸਕੈਨ ਕੀਤੇ ਜਾ ਰਹੇ ਹਨ। ਇਸ ਵਿੱਚ ਅੰਮ੍ਰਿਤਪਾਲ ਸਿੰਘ ਅਤੇ ਪਪਲਪ੍ਰੀਤ ਸਿੰਘ ਵੀ ਇੱਕ-ਦੋ ਫੁਟੇਜ ਵਿੱਚ ਇਕੱਠੇ ਨਜ਼ਰ ਆਏ ਹਨ।ਦੱਸ ਦੇਈਏ ਕਿ 19 ਮਾਰਚ ਦੀ ਰਾਤ 9.46 ਵਜੇ ਅੰਮ੍ਰਿਤਪਾਲ ਸਿੰਘ ਪਪਲਪ੍ਰੀਤ ਸਿੰਘ ਨਾਲ ਸ਼ਾਹਾਬਾਦ ਪਹੁੰਚਿਆ ਸੀ। ਉਸ ਸਮੇਂ ਹਰਜਿੰਦਰ ਸਿੰਘ ਅਤੇ ਉਸਦੀ ਭੈਣ ਬਲਜੀਤ ਕੌਰ ਘਰ ’ਚ ਸਨ। ਬਲਜੀਤ ਕੌਰ ਪਪਲਪ੍ਰੀਤ ਨੂੰ ਪਹਿਲਾਂ ਹੀ ਜਾਣਦੀ ਸੀ। 20 ਮਾਰਚ ਨੂੰ ਦੁਪਹਿਰ 12.18 ਵਜੇ ਦੇ ਕਰੀਬ ਅੰਮ੍ਰਿਤਪਾਲ ਅਤੇ ਪਪਲਪ੍ਰੀਤ ਸਿੰਘ ਆਪਣੀ ਸਕੂਟੀ ਬਲਜੀਤ ਕੌਰ ਦੇ ਘਰ ਖੜ੍ਹੀ ਕਰਕੇ ਸ਼ਾਹਾਬਾਦ ਤੋਂ ਰਵਾਨਾ ਹੋਏ। ਮਲੂਕ ਸਿੰਘ ਅਤੇ ਬਲਜੀਤ ਕੌਰ ਪਟਿਆਲਾ ਦੇ ਦੁਖ ਨਿਵਾਰਨ ਦੀ ਪਾਰਕਿੰਗ ’ਚ ਸਕੂਟੀ ਛੱਡ ਕੇ ਚਲੇ ਗਏ। ਕੁਰੂਕਸ਼ੇਤਰ ਪੁਲਿਸ ਨੇ ਪੰਜਾਬ ਪੁਲਿਸ ਨੂੰ ਸੂਚਿਤ ਕੀਤਾ, ਜਿਸ ਤੋਂ ਬਾਅਦ ਬਲਜੀਤ ਕੌਰ ਨੂੰ ਪੰਜਾਬ ਪੁਲਿਸ ਵੱਲੋਂ ਹਿਰਾਸਤ ਵਿਚ ਲੈ ਲਿਆ ਗਿਆ ਹੈ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
