ਟੋਰਾਂਟੋ: ਕੈਨੇਡਾ ਵਿੱਚ ਚੱਲ ਰਹੀਆਂ ਜਬਰਦਸਤੀ ਵਸੂਲੀ ਅਤੇ ਹਿੰਸਕ ਘਟਨਾਵਾਂ ਦੇ ਮਾਮਲੇ ਵਿੱਚ ਲਾਰੈਂਸ ਬਿਸ਼ਨੋਈ ਗੈਂਗ ਨਾਲ ਜੁੜੇ ਇੱਕ ਵੱਡੇ ਨੈੱਟਵਰਕ ਦਾ ਨਵਾਂ ਖੁਲਾਸਾ ਹੋਇਆ ਹੈ। ਗੈਂਗ ਵੱਲੋਂ ਬ੍ਰਿਟਿਸ਼ ਕੋਲੰਬੀਆ ਪੁਲਿਸ ਨੂੰ ਇੱਕ ਧਮਕੀ ਭਰਿਆ ਪੱਤਰ ਭੇਜਿਆ ਗਿਆ, ਜਿਸ ਵਿੱਚ ਦਾਅਵਾ ਕੀਤਾ ਗਿਆ ਕਿ ਕੈਨੇਡਾ ਦੇ ਵੱਖ-ਵੱਖ ਹਿੱਸਿਆਂ ਵਿੱਚ ਉਨ੍ਹਾਂ ਦੇ 1000 ਤੋਂ ਵੱਧ ‘ਫੁੱਟ ਸੋਲਜਰ’ ਜਾਂ ਸ਼ੂਟਰ ਸਰਗਰਮ ਹਨ। ਇਸ ਖੁਲਾਸੇ ਤੋਂ ਬਾਅਦ ਕੈਨੇਡਾ ਦੀਆਂ ਸੁਰੱਖਿਆ ਏਜੰਸੀਆਂ ਅਤੇ ਉੱਥੇ ਰਹਿੰਦੇ ਭਾਰਤੀ ਤੇ ਪੰਜਾਬੀ ਮੂਲ ਦੇ ਕਾਰੋਬਾਰੀਆਂ ਵਿੱਚ ਡਰ ਦਾ ਮਾਹੌਲ ਬਣ ਗਿਆ ਹੈ।
ਇਹ ਮਾਮਲਾ ਉਸ ਵੇਲੇ ਸਾਹਮਣੇ ਆਇਆ ਜਦੋਂ ਕੈਨੇਡਾ ਵਿੱਚ ਚੱਲ ਰਹੀ ਇੱਕ ਡਿਪੋਰਟੇਸ਼ਨ ਸੁਣਵਾਈ ਦੌਰਾਨ ਐਡਮੰਟਨ ਪੁਲਿਸ ਸੇਵਾ ਦੇ ਇੱਕ ਜਾਸੂਸ ਨੇ ਇਮੀਗ੍ਰੇਸ਼ਨ ਐਂਡ ਰਿਫਿਊਜੀ ਬੋਰਡ ਅੱਗੇ ਗਵਾਹੀ ਦਿੱਤੀ। ਉਸ ਨੇ ਦੱਸਿਆ ਕਿ ਇਹ ਪੱਤਰ 13 ਅਗਸਤ 2025 ਨੂੰ ਐਬਟਸਫੋਰਡ ਪੁਲਿਸ ਸਟੇਸ਼ਨ ਵਿੱਚ ਪਹੁੰਚਿਆ ਸੀ। ਹੁਣ ਕੈਨੇਡਾ ਪੁਲਿਸ ਇਸ ਪੱਤਰ ਅਤੇ ਇਸ ਦੇ ਸਰੋਤਾਂ ਦੀ ਡੂੰਘੀ ਜਾਂਚ ਕਰ ਰਹੀ ਹੈ।
ਕੈਨੇਡਾ ਵਿੱਚ ਗੈਂਗ ਦੇ ਵਧਦੇ ਜਾਲ ਦਾ ਦਾਅਵਾ
ਪੱਤਰ ਵਿੱਚ ਦਾਅਵਾ ਕੀਤਾ ਗਿਆ ਕਿ ਲਾਰੈਂਸ ਗੈਂਗ ਨੇ ਕੈਨੇਡਾ ਦੇ ਕਈ ਸੂਬਿਆਂ ਵਿੱਚ ਆਪਣਾ ਜਾਲ ਫੈਲਾ ਲਿਆ ਹੈ। ਗੈਂਗ ਨੇ ਕਿਹਾ ਕਿ ਉਨ੍ਹਾਂ ਕੋਲ ਵੱਡੀ ਗਿਣਤੀ ਵਿੱਚ ਅਜਿਹੇ ਲੋਕ ਹਨ ਜੋ ਕਿਸੇ ਵੀ ਸਮੇਂ ਗੋਲੀਬਾਰੀ ਜਾਂ ਹੋਰ ਹਿੰਸਕ ਕਾਰਵਾਈ ਕਰਨ ਲਈ ਤਿਆਰ ਹਨ। ਨਾਲ ਹੀ ਇਹ ਵੀ ਕਿਹਾ ਗਿਆ ਕਿ ਕੈਨੇਡਾ ਵਿੱਚ ਚੱਲ ਰਹੇ ਹਰ ਕਾਰੋਬਾਰ ਨੂੰ ਗੈਂਗ ਨੂੰ ‘ਟੈਕਸ’ ਦੇਣਾ ਪਵੇਗਾ। ਪੱਤਰ ਦੀ ਭਾਸ਼ਾ ਤੋਂ ਸਾਫ਼ ਸੀ ਕਿ ਇਸ ਦਾ ਮੁੱਖ ਮਕਸਦ ਡਰਾ ਕੇ ਪੈਸੇ ਵਸੂਲਣਾ ਹੈ।
ਜਾਂਚਕਰਤਾਵਾਂ ਦੇ ਮੁਤਾਬਕ, ਪੱਤਰ ਸਿੱਧਾ ਪੁਲਿਸ ਸਟੇਸ਼ਨ ਨੂੰ ਭੇਜਣਾ ਕੈਨੇਡਾ ਦੀ ਕਾਨੂੰਨ ਵਿਵਸਥਾ ਲਈ ਖੁੱਲ੍ਹੀ ਚੁਣੌਤੀ ਵਾਂਗ ਹੈ। ਇਸ ਰਾਹੀਂ ਗੈਂਗ ਨੇ ਆਪਣੀ ਤਾਕਤ ਦਿਖਾਉਣ ਦੀ ਕੋਸ਼ਿਸ਼ ਕੀਤੀ ਹੈ।
ਨੌਜਵਾਨਾਂ ਅਤੇ ਵਿਦਿਆਰਥੀਆਂ ਦੀ ਵਰਤੋਂ
ਜਾਂਚ ਦੌਰਾਨ ਇਹ ਵੀ ਸਾਹਮਣੇ ਆਇਆ ਕਿ ਗੈਂਗ ਭਾਰਤ ਤੋਂ ਸ਼ੂਟਰ ਨਹੀਂ ਭੇਜ ਰਿਹਾ, ਸਗੋਂ ਕੈਨੇਡਾ ਵਿੱਚ ਰਹਿੰਦੇ ਭਾਰਤੀ ਨੌਜਵਾਨਾਂ ਅਤੇ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਨੂੰ ਆਪਣੇ ਨਾਲ ਜੋੜ ਰਿਹਾ ਹੈ। ਆਰਥਿਕ ਤੰਗੀ ਦਾ ਸਾਹਮਣਾ ਕਰ ਰਹੇ ਨੌਜਵਾਨਾਂ ਨੂੰ ਛੋਟੀ ਰਕਮ ਦੇ ਕੇ ਧਮਕੀ ਭਰੇ ਸੁਨੇਹੇ ਪਹੁੰਚਾਉਣ ਜਾਂ ਫਾਇਰਿੰਗ ਵਰਗੀਆਂ ਘਟਨਾਵਾਂ ਲਈ ਵਰਤਿਆ ਜਾਂਦਾ ਹੈ।
ਪੁਲਿਸ ਦੇ ਅਨੁਸਾਰ, ਇਹ ਪੂਰਾ ਨੈੱਟਵਰਕ ਵਟਸਐਪ ਵਰਗੀਆਂ ਇਨਕ੍ਰਿਪਟਡ ਐਪਸ ਰਾਹੀਂ ਚੱਲਦਾ ਹੈ। ਵਸੂਲੀ ਲਈ ਕੀਤੀਆਂ ਕਾਲਾਂ ਵਿੱਚ ਲਾਰੈਂਸ ਬਿਸ਼ਨੋਈ ਅਤੇ ਗੋਲਡੀ ਬਰਾੜ ਦਾ ਨਾਮ ਲੈ ਕੇ ਡਰ ਪੈਦਾ ਕੀਤਾ ਜਾਂਦਾ ਹੈ। ਇਸ ਮਾਮਲੇ ਵਿੱਚ ਹੁਣ ਜੋਰਾ ਸਿੱਧੂ ਦਾ ਨਾਮ ਵੀ ਸਾਹਮਣੇ ਆਇਆ ਹੈ। ਪੁਲਿਸ ਦਾ ਮੰਨਣਾ ਹੈ ਕਿ ਵਸੂਲੀ ਵਾਲੀਆਂ ਕਾਲਾਂ ਕਰਦੇ ਸਮੇਂ ਉਹ ਕੈਨੇਡਾ ਵਿੱਚ ਨਹੀਂ ਸੀ, ਸਗੋਂ ਕਿਸੇ ਹੋਰ ਦੇਸ਼ ਤੋਂ ਇਸ ਨੈੱਟਵਰਕ ਨੂੰ ਚਲਾ ਰਿਹਾ ਸੀ।
