ਨਿਊਜ਼ ਡੈਸਕ: ਪਿਛਲੇ ਕੁਝ ਮਹੀਨਿਆਂ ਤੋਂ ਪਾਕਿਸਤਾਨ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਤਾਰੀਫ਼ ਕਰਦਾ ਨਜ਼ਰ ਆ ਰਿਹਾ ਹੈ। ਪਾਕਿਸਤਾਨੀ ਫੌਜ ਦੇ ਮੁਖੀ ਆਸਿਮ ਮੁਨੀਰ ਨੇ ਕਈ ਵਾਰ ਅਮਰੀਕਾ ਦੀ ਯਾਤਰਾ ਵੀ ਕੀਤੀ ਹੈ। ਹੁਣ ਮੁਨੀਰ ਦੀ ਚਾਪਲੂਸੀ ਦਾ ਤੋਹਫ਼ਾ ਪਾਕਿਸਤਾਨ ਨੂੰ ਮਿਲਣ ਦੀ ਸੰਭਾਵਨਾ ਹੈ।
ਅਸਲ ਵਿੱਚ, ਪਾਕਿਸਤਾਨ ਨੂੰ ਅਮਰੀਕਾ ਤੋਂ AIM-120 ਅਡਵਾਂਸਡ ਮੀਡੀਅਮ ਰੇਂਜ ਵਾਲੀਆਂ ਹਵਾ ਤੋਂ ਹਵਾ ਵਿੱਚ ਮਾਰ ਕਰਨ ਵਾਲੀਆਂ ਮਿਸਾਈਲਾਂ ਮਿਲਣ ਦੀ ਉਮੀਦ ਜ਼ਾਹਰ ਕੀਤੀ ਜਾ ਰਹੀ ਹੈ। ਇਨ੍ਹੀ ਦਿਨਾਂ ਪਾਕਿਸਤਾਨ ਅਤੇ ਅਮਰੀਕਾ ਵਿਚਕਾਰ ਨਜ਼ਦੀਕੀਆਂ ਵਧ ਰਹੀਆਂ ਹਨ।
ਪਾਕਿਸਤਾਨ ‘ਤੇ ਅਮਰੀਕਾ ਦੀ ਮੇਹਰਬਾਨੀ
ਇਨ੍ਹਾਂ ਦਿਨਾਂ ਪਾਕਿਸਤਾਨ ਅਤੇ ਅਮਰੀਕਾ ਦੇ ਰਿਸ਼ਤੇ ਲਗਾਤਾਰ ਸੁਧਰ ਰਹੇ ਹਨ। ਮਈ ਮਹੀਨੇ ਵਿੱਚ ਭਾਰਤ ਅਤੇ ਪਾਕਿਸਤਾਨ ਵਿਚਕਾਰ ਚਾਰ ਦਿਨਾਂ ਦਾ ਸੈਨਿਕ ਟਕਰਾਅ ਹੋਇਆ। ਭਾਰਤ ਨੇ ਪਾਕਿਸਤਾਨ ਨੂੰ ਬੁਰੀ ਤਰ੍ਹਾਂ ਹਰਾਇਆ, ਅੰਤ ਵਿੱਚ ਪਾਕਿਸਤਾਨੀ ਡੀਜੀਐੱਮਓ ਨੇ ਭਾਰਤ ਤੋਂ ਸੈਨਿਕ ਕਾਰਵਾਈ ਰੋਕਣ ਦੀ ਅਪੀਲ ਕੀਤੀ। ਇਸ ਟਕਰਾਅ ਤੋਂ ਬਾਅਦ ਪਾਕਿਸਤਾਨ ਨੇ ਅਮਰੀਕਾ ਨਾਲ ਨਜ਼ਦੀਕੀਆਂ ਵਧਾਈਆਂ ਹਨ ਅਤੇ ਕਈ ਵਾਰ ਅਮਰੀਕੀ ਰਾਸ਼ਟਰਪਤੀ ਦੀ ਤਾਰੀਫ਼ ਕੀਤੀ ਹੈ।
ਅਮਰੀਕਾ ਦੀ ਪਾਕ ਨੂੰ ਅਡਵਾਂਸਡ ਮਿਸਾਈਲਾਂ ਦੇਣ ਦੀ ਤਿਆਰੀ
ਅਮਰੀਕਾ ਨੇ ਪਾਕਿਸਤਾਨ ਨੂੰ AIM-120 AMRAAM ਮਿਸਾਈਲਾਂ ਦੇਣ ਦਾ ਪਲਾਨ ਬਣਾਇਆ ਹੈ। ਇਹ ਬਹੁਤ ਅਡਵਾਂਸਡ ਮਿਸਾਈਲਾਂ ਹਨ ਜੋ ਹਵਾ ਤੋਂ ਹਵਾ ਵਿੱਚ ਦੁਸ਼ਮਣ ਦੇ ਵਿਮਾਨ ਨੂੰ ਮਾਰ ਸੁੱਟਣ ਵਿੱਚ ਸਮਰੱਥ ਹਨ। ਹਾਲ ਹੀ ਵਿੱਚ ਅਮਰੀਕੀ ਰੱਖਿਆ ਵਿਭਾਗ ਨੇ ਇੱਕ ਸਮਝੌਤੇ ਵਿੱਚ ਪਾਇਆ ਕਿ ਇੱਕ ਹਥਿਆਰਾਂ ਦੇ ਸਮਝੌਤੇ ਵਿੱਚ AMRAAM ਮਿਸਾਈਲਾਂ ਦੇ ਖਰੀਦਦਾਰਾਂ ਵਿੱਚ ਪਾਕਿਸਤਾਨ ਵੀ ਸ਼ਾਮਲ ਹੈ।
ਡਿਫੈਂਸ ਡੀਲ ਦੀ ਕੀਮਤ 2.51 ਬਿਲੀਅਨ ਡਾਲਰ
ਅਮਰੀਕੀ ਰੱਖਿਆ ਵਿਭਾਗ ਦੇ ਹਾਲੀਆ ਸਮਝੌਤੇ ਅਨੁਸਾਰ, ਰੇਥੀਓਨ ਕੰਪਨੀ ਨੂੰ 41.6 ਮਿਲੀਅਨ ਡਾਲਰ ਦਾ ਵਾਧੂ ਆਰਡਰ ਦਿੱਤਾ ਗਿਆ ਹੈ। ਇਹ ਆਰਡਰ C8 ਅਤੇ D3 ਵਰਜਨਾਂ ਦੀਆਂ ਮਿਸਾਈਲਾਂ ਲਈ ਹੈ। ਇਸ ਡੀਲ ਦੀ ਕੁੱਲ ਕੀਮਤ ਹੁਣ 2.51 ਬਿਲੀਅਨ ਡਾਲਰ ਤੱਕ ਪਹੁੰਚ ਗਈ ਹੈ ਅਤੇ ਇਹ 2030 ਤੱਕ ਪੂਰੀ ਹੋਣ ਦੀ ਉਮੀਦ ਹੈ।
ਹਾਲਾਂਕਿ, ਅਜੇ ਤੱਕ ਪਾਕਿਸਤਾਨ ਨੂੰ ਕਿੰਨੀਆਂ ਮਿਸਾਈਲਾਂ ਮਿਲਣਗੀਆਂ, ਇਹ ਸਪੱਸ਼ਟ ਨਹੀਂ ਹੋਇਆ। ਐਕਸਪਰਟਾਂ ਅਨੁਸਾਰ, ਇਹ ਪਾਕਿਸਤਾਨੀ ਏਅਰ ਫੋਰਸ ਦੇ F-16 ਲੜਾਕੂ ਵਿਮਾਨਾਂ ਨੂੰ ਅਪਗ੍ਰੇਡ ਕਰਨ ਵਿੱਚ ਵੱਡੀ ਮਦਦ ਕਰਨਗੀਆਂ। ਪਾਕਿਸਤਾਨ ਕੋਲ ਪਹਿਲਾਂ ਹੀ ਪੁਰਾਣੀਆਂ C3 ਵਰਜਨ ਦੀਆਂ 500 ਤੋਂ ਵੱਧ ਮਿਸਾਈਲਾਂ ਹਨ, ਜੋ 2010 ਵਿੱਚ F-16 ਨਾਲ ਖਰੀਦੀਆਂ ਗਈਆਂ ਸਨ।
