ਵਾਸ਼ਿੰਗਟਨ: ਅਮਰੀਕਾ ਸਰਕਾਰ ਨੇ H-1B ਵੀਜ਼ਾ ਦੀ ਅਰਜ਼ੀ ਫੀਸ ਨੂੰ ਵਧਾ ਕੇ ਇੱਕ ਲੱਖ ਡਾਲਰ (ਲਗਭਗ 88 ਲੱਖ ਰੁਪਏ) ਕਰ ਦਿੱਤਾ ਹੈ। ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਸ਼ਨੀਵਾਰ ਨੂੰ ਵ੍ਹਾਈਟ ਹਾਊਸ ਵਿੱਚ ਇਸ ਹੁਕਮ ‘ਤੇ ਦਸਤਖਤ ਕੀਤੇ। ਪਹਿਲਾਂ ਇਹ ਫੀਸ 1 ਤੋਂ 6 ਲੱਖ ਰੁਪਏ ਦੇ ਵਿੱਚ ਸੀ।
ਇਸ ਦੇ ਨਾਲ ਹੀ, ‘ਟਰੰਪ ਗੋਲਡ ਕਾਰਡ’, ‘ਟਰੰਪ ਪਲੈਟੀਨਮ ਕਾਰਡ’, ਅਤੇ ‘ਕਾਰਪੋਰੇਟ ਗੋਲਡ ਕਾਰਡ’ ਵਰਗੀਆਂ ਨਵੀਆਂ ਸਹੂਲਤਾਂ ਵੀ ਸ਼ੁਰੂ ਕੀਤੀਆਂ ਗਈਆਂ ਹਨ। ਟਰੰਪ ਗੋਲਡ ਕਾਰਡ, ਜਿਸ ਦੀ ਕੀਮਤ 8.8 ਕਰੋੜ ਰੁਪਏ ਹੈ, ਵਿਅਕਤੀ ਨੂੰ ਅਮਰੀਕਾ ਵਿੱਚ ਅਣਮਿੱਥੇ ਸਮੇਂ ਲਈ ਰਹਿਣ ਦਾ ਅਧਿਕਾਰ ਦੇਵੇਗਾ। ਇਸ ਅਣਮਿੱਥੇ ਨਿਵਾਸ ਅਧੀਨ, ਵਿਅਕਤੀ ਨੂੰ ਸਿਰਫ ਪਾਸਪੋਰਟ ਅਤੇ ਵੋਟ ਦੇਣ ਦਾ ਅਧਿਕਾਰ ਨਹੀਂ ਮਿਲੇਗਾ, ਪਰ ਬਾਕੀ ਸਾਰੀਆਂ ਸਹੂਲਤਾਂ ਅਮਰੀਕੀ ਨਾਗਰਿਕ ਵਾਂਗ ਹੀ ਮਿਲਣਗੀਆਂ।
ਇਹ ਪ੍ਰਕਿਰਿਆ ਗ੍ਰੀਨ ਕਾਰਡ ਵਾਂਗ ਹੀ ਹੋਵੇਗੀ, ਜਿਸ ਨਾਲ ਸਥਾਈ ਨਿਵਾਸ ਮਿਲਦਾ ਹੈ। ਰਿਪੋਰਟਾਂ ਅਨੁਸਾਰ, ਟਰੰਪ ਦੇ ਇਨ੍ਹਾਂ ਬਦਲਾਵਾਂ ਦਾ ਵਿਦੇਸ਼ੀ ਨਾਗਰਿਕਾਂ, ਖਾਸ ਕਰਕੇ ਭਾਰਤੀ ਆਈਟੀ ਪੇਸ਼ੇਵਰਾਂ ‘ਤੇ ਵੱਡਾ ਅਸਰ ਪਵੇਗਾ। ਹੁਣ ਕੰਪਨੀਆਂ ਸਿਰਫ ਉਹਨਾਂ ਕਰਮਚਾਰੀਆਂ ਨੂੰ ਅਮਰੀਕਾ ਬੁਲਾਉਣਗੀਆਂ, ਜਿਨ੍ਹਾਂ ਕੋਲ ਸਭ ਤੋਂ ਵਧੀਆ ਹੁਨਰ ਹੋਵੇਗਾ। ਇਹ ਬਦਲਾਅ ਜਲਦੀ ਹੀ ਲਾਗੂ ਹੋਣਗੇ।
ਟਰੰਪ ਨੇ 19 ਸਤੰਬਰ ਨੂੰ ਵ੍ਹਾਈਟ ਹਾਊਸ ਵਿੱਚ H-1B ਵੀਜ਼ਾ ਨਿਯਮਾਂ ਵਿੱਚ ਬਦਲਾਅ ਸਬੰਧੀ ਹੁਕਮ ‘ਤੇ ਦਸਤਖਤ ਕੀਤੇ। ਸਰਕਾਰ ਦੀ ਯੋਜਨਾ 80,000 ਗੋਲਡ ਕਾਰਡ ਜਾਰੀ ਕਰਨ ਦੀ ਹੈ।
ਅਮਰੀਕੀ ਵਣਜ ਮੰਤਰੀ ਦਾ ਬਿਆਨ
ਅਮਰੀਕੀ ਵਣਜ ਮੰਤਰੀ ਹਾਵਰਡ ਲੁਟਨਿਕ ਨੇ ਕਿਹਾ ਕਿ ਹਰ ਸਾਲ ਲਗਭਗ 2,81,000 ਲੋਕਾਂ ਨੂੰ ਗ੍ਰੀਨ ਕਾਰਡ ਦਿੱਤਾ ਜਾਂਦਾ ਹੈ, ਪਰ ਉਹਨਾਂ ਦੀ ਔਸਤ ਕਮਾਈ ਸਿਰਫ 66,000 ਡਾਲਰ (ਲਗਭਗ 58 ਲੱਖ ਰੁਪਏ) ਹੁੰਦੀ ਹੈ, ਅਤੇ ਕਈ ਵਾਰ ਉਹ ਸਰਕਾਰੀ ਸਹਾਇਤਾ ‘ਤੇ ਵੀ ਨਿਰਭਰ ਰਹਿੰਦੇ ਹਨ।
ਲੁਟਨਿਕ ਨੇ ਕਿਹਾ, “ਸਾਰੀਆਂ ਕੰਪਨੀਆਂ H-1B ਵੀਜ਼ਾ ਲਈ ਸਾਲਾਨਾ ਇੱਕ ਲੱਖ ਡਾਲਰ ਦੇਣ ਨੂੰ ਤਿਆਰ ਹਨ। ਅਸੀਂ ਉਹਨਾਂ ਨਾਲ ਗੱਲ ਕੀਤੀ ਹੈ। ਜੇਕਰ ਤੁਸੀਂ ਕਿਸੇ ਨੂੰ ਸਿਖਲਾਈ ਦੇਣੀ ਹੈ, ਤਾਂ ਅਮਰੀਕੀ ਯੂਨੀਵਰਸਿਟੀਆਂ ਦੇ ਗ੍ਰੈਜੂਏਟਸ ਨੂੰ ਸਿਖਲਾਈ ਦਿਓ। ਅਮਰੀਕੀਆਂ ਨੂੰ ਸਿਖਲਾਈ ਦਿਓ। ਸਾਡੀਆਂ ਨੌਕਰੀਆਂ ਖੋਹਣ ਲਈ ਬਾਹਰੋਂ ਲੋਕ ਲਿਆਉਣਾ ਬੰਦ ਕਰੋ।”
ਗੋਲਡ ਕਾਰਡ ਦੀ ਭਾਰੀ ਫੀਸ
ਲੁਟਨਿਕ ਦੇ ਅਨੁਸਾਰ, ਗੋਲਡ ਕਾਰਡ ਦੀ ਭਾਰੀ ਫੀਸ ਇਹ ਸੁਨਿਸ਼ਚਿਤ ਕਰੇਗੀ ਕਿ ਅਮਰੀਕਾ ਵਿੱਚ ਸਿਰਫ ਸਭ ਤੋਂ ਯੋਗ ਅਤੇ ਉੱਚ ਸ਼੍ਰੇਣੀ ਦੇ ਕਰਮਚਾਰੀ ਹੀ ਲੰਬੇ ਸਮੇਂ ਲਈ ਰਹਿ ਸਕਣ। ਉਹਨਾਂ ਨੇ ਕਿਹਾ, “ਇਹ ਵਿਵਸਥਾ ਪਹਿਲਾਂ ਅਨੁਚਿਤ ਸੀ, ਪਰ ਹੁਣ ਅਸੀਂ ਸਿਰਫ ਉਹਨਾਂ ਨੂੰ ਲਵਾਂਗੇ, ਜੋ ਸੱਚੀ ਬਹੁਤ ਕਾਬਲ ਹਨ।”
ਇਹ ਗੋਲਡ ਕਾਰਡ EB-1 ਅਤੇ EB-2 ਵੀਜ਼ਿਆਂ ਦੀ ਥਾਂ ਲਵੇਗਾ ਅਤੇ ਸਿਰਫ ਉਹਨਾਂ ਨੂੰ ਮਿਲੇਗਾ, ਜਿਹੜੇ ਅਮਰੀਕਾ ਲਈ ‘ਲਾਭਕਾਰੀ’ ਸਮਝੇ ਜਾਣਗੇ। ਸਰਕਾਰ ਸ਼ੁਰੂਆਤ ਵਿੱਚ 80,000 ਗੋਲਡ ਕਾਰਡ ਜਾਰੀ ਕਰਨ ਦੀ ਯੋਜਨਾ ਬਣਾ ਰਹੀ ਹੈ। ਲੁਟਨਿਕ ਨੇ ਕਿਹਾ ਕਿ ਇਸ ਪ੍ਰੋਗਰਾਮ ਨਾਲ ਅਮਰੀਕਾ ਨੂੰ 100 ਅਰਬ ਡਾਲਰ ਦੀ ਕਮਾਈ ਹੋਵੇਗੀ।
ਟਰੰਪ ਦਾ ਬਿਆਨ
ਰਾਸ਼ਟਰਪਤੀ ਟਰੰਪ ਨੇ ਕਿਹਾ ਕਿ ਇਹ ਵੀਜ਼ਾ ਪ੍ਰੋਗਰਾਮ ਖਾਸ ਤੌਰ ‘ਤੇ ਅਮੀਰ ਵਿਦੇਸ਼ੀਆਂ ਲਈ ਹੈ, ਜੋ 10 ਲੱਖ ਡਾਲਰ ਦੇ ਕੇ ਅਮਰੀਕਾ ਵਿੱਚ ਰਹਿ ਕੇ ਕੰਮ ਕਰ ਸਕਣਗੇ। ਉਹਨਾਂ ਨੇ ਕਿਹਾ, “ਹੁਣ ਅਮਰੀਕਾ ਸਿਰਫ ਹੁਨਰਮੰਦ ਲੋਕਾਂ ਨੂੰ ਹੀ ਵੀਜ਼ਾ ਦੇਵੇਗਾ, ਨਾ ਕਿ ਉਹਨਾਂ ਨੂੰ ਜੋ ਅਮਰੀਕੀਆਂ ਦੀਆਂ ਨੌਕਰੀਆਂ ਖੋਹ ਸਕਦੇ ਹਨ।” ਉਹਨਾਂ ਨੇ ਇਹ ਵੀ ਕਿਹਾ ਕਿ ਇਸ ਰਕਮ ਦੀ ਵਰਤੋਂ ਟੈਕਸ ਘਟਾਉਣ ਅਤੇ ਸਰਕਾਰੀ ਕਰਜ਼ੇ ਨੂੰ ਚੁਕਾਉਣ ਲਈ ਕੀਤੀ ਜਾਵੇਗੀ।
